POLITICAL PARTY LEADER HUHANG

“Pro Pastor aṭanga pension ṭhak thlengin, nikhat te pawh office a ṭhu ve lovin ka awm a, pension thlenga bial vawngtu Pastor-te lo nih tawh chuan mipuite hi an zahawmzia leh dimdawi an ngaihziate kan hre chiang hle a. Kan thusawi leh ṭawngkamte avangin Kohhran hi chhuahsan em lo mah se Kohhran an ngainat loh phah kan hlau em em a, kan inah te lokalin mihlim ṭhenkhatin min rawn hau bawrh bawrh mahsela thiam tak leh lungawi taka lo siam thiam an ngai ṭhin a, chu chuan Kohhranah inlungrualna a thlen ṭhin a ni” tiin ka ngamtlak ve tak Pastor pension-in min hrilh ka hre reng ṭhin.

Kohhrana a hnarkaitu tling pha ngat tam takte hian political party leader-te huhang natzia hriatpui lo hian opposition party inbeihna tiat hialin awka kan chhuah ve ṭhin te hi ngaihtuah chian a ngai ta hle mai. Chutiangte avang chuan mi tam tak chuan kohhran chhuahsan kher lo mah se kohhranah tui lohna leh ngheh lohna te, inkhawm peih lohna a thlen ṭhin a, inkhawm zat percent chhiat tak em em chhan te pawh hi a ni thei ve tho mai awm e.

Mizorama kan political party leader-te hi a mal mal pawhin ngaihtuah ta ila, huhang ngah tak vek an ni a, an kalna apiangah zui duh mi sang tam tak an nei ve deuh vek awm e. Hetiangin -

1. Vawiin nia MNF Hnam Run a mipui tling hmur te pawh hi Pu Laldenga huhang vek an la ni a, thih pawh hlau hauh lova ramhnuaia kum tam tak lo tal tawhte an ni a, tam takin chawr chhuah loh nan hmang mah se an paukhauh reng a ni.

2. Tun thlenga MPC office a tap ṭhiap ṭhuap te pawh hi, Brig. T. Sailo huhang vek a la ni a, amah thi daih tawh mahsela vawiin ni thlenga la phuarkhawm tlattu chu Brig. T. Sailo thu leh hla tho kha a la ni a, thil dang zawng zawng ai pawhin a thu leh hla kha an la tuipui ber reng a ni.

3. A nih leh ZNP Offi­ce a la ṭhu muk ṭhup mai reng te pawh hi, an hotupa Lalduhawma chuan a sawrkar pui emaw, a Chief Minister pui emaw chu an beisei em em pawh a ni lo, chuti chung chuan amah zui tlattu, khawiah pawh kan zui zel ang ti tlattu hi voter sing ruk chuang fe a la nei reng a ni. Ṭhalai sang tam takin a ruala kal hi an la duh reng a, a zuitu rinawm tak nih pawh an zak chuang lo, a chhan pawh Lalduhawma huhang na tak an ring mai a ni.

4. Tuna sawrkarna chelh mektu Lal Thanhawla hi vawi tam tak MLA leh Chief Minister lo ni tawh a ni a, Mizo Union Party lianin an han belh (merger) pawh khan, a tawpa ding chhuak zawk chu amah tho a ni. MNF thlipui tleh vanglaia interim sawrkar an han siam dun leh pawh khan, a tawpa ding chhuak leh zawk chu amah tho a ni leh tlat - Pu Hawla huhang hi na tak a ni.

Hetia han ngaih mai pawh hian, mipuite hian ngaihdan inang ṭhup kan neih chu a inang vek mai - political party-te platform chu politics khelmualah a ni a, Kohhran thiltih leh rorelnaah an inrawlh a mawi lova, an lo sawisel ve pawh a mawi lo chang ni loin, an lo tih ve turah kan ngai lo ṭheuh awm e. Chuti chungin a mihringte erawh chu ram rawng an bawlsak turte an ni tho va, chungte avang chuan Kohhran huang dai lovin, Kohhran hruaitute kutah an dah mai a, sawrkara Minister engemawzat chu Kohhranah te awm mahse la, sawrkar thil chu Kohhranah rawlh an tum lo a, tin, political platform-ah Kohhran an kheng ngai lo bawk.

Kohhran kan ngaihdan pawh, sawrkar thiltih nasa taka dodal zawnga hmalak emaw, sawisel chiam chiam emaw chu an tih loh zawk turah kan ngai tlangpui a, amaherawhchu, thil ṭha lo laka Kohhran mipuite ven leh zirtir chu an tih turah kan ngai leh vek tho a ni. A chhan chu, Kohhran mipuite pawh hi party a mipui an nih vek tho avangin. Kohhranin platform a neih chu pulpit a ni a, pulpitah chuan Pathian thu ṭha, thlarau lama Kohhran mipuite chawm lenna lam sawi tura ngaih an ni. Leilunga kan awm chhung hi chuan sual hi kan ban phakah a awm reng dawn a, Kohhran mite chuan sual awm reng kha khawih lo tura zirtir mai kha Kohhran hnarkaitute sawi tur zawk chu a ni awm e.

India rama politics inlum­leh dan chu mi pangngai chin chuan kan hre vek a. Kris­tian ram, Mizoram tan hian Koh­hran hnarkaitute pawh hian ngaihtuahna kan hman hle a hun ang, ka ṭawng­kam hian central sawrkar neitu thurualpuite tha a ti chak zawk thei ang em, kan Zoram Kristian ram hian kan ṭhatpui zawk ang em tih pawh ngaihtuah a ngai hle awm e. Kan duh loh zawk thil thlen tir thei zawnga ṭawng­kam hman palh awl tak mai a ni a, Kohhran a nghet taka awm thiamte thinlung tina zawnga thu sawi te, an duh loh thlenga hmun danga kal chhuah ngai hial zawnga ṭawngkam dengkhawng te hman loh a him ber awm e.

- K. Hrangluaia, Mission Vengthlang