2Wheelers Taxi service hi

Aizawl khawpuiah taxi sang tam a service laiin tunhnai aṭang khan transport department chuan tow wheelers taxi service turin engemawzat chu permit a pe a, an service ṭan tawh a; mi tam tak tan a ṭangkai dawn khawp mai.

Khawpui leh lirthei tam lutuk kara 2wheelers taxi service hian a mamawhtute tan remchamna nasa tak a siam a, traffic jam karah pawh hunbi neia kal duhna neite tan a ṭangkai a, chu mai bakah taxi aiin a rate a tlawm zawk fe bawk si a, tih chi tak a ni. Hei aia tam deuh hi service thei se a ṭha ngawt ang.

2wheelers taxi service chungchangah hian sorkar a fimkhur erawh a ṭul. Permit pek kawngah a khalhtu chanchin kimchang a theih hram chuan hriat a ṭha ang. Nun khaw lo deuh leh nun inthlahdah ve takte permit an pek a, a hnu-ah an passenger-te laka harsatna a thlen loh nan tun aṭanga lo inven lawk a ṭul hle. Permit diltu particulars-ah an awmna Local Council leh YMA lehkha awm thei ngei se.

Mi ṭha leh mi pangngai tak tak service karah mi ṭha vak lo, passenger te lo phur bo duhte pawh a awm thei a, hetah tak hian eng mizia nge tih chu permit petute lamin finfiah hmasa se a ṭha hle ang. A tira guideline an siamah khan mipa chuan mipa chauh a phur tur a ni a, hmeichhia pawhin hmeichhia chauh a phur tur a ni tih kha niin ka hria a, mahse thil theih a nih loh vangin hotu lam pawhin an thlahdul a, mipa pawhin hmeichhia, hmeichhia pawhin mipa an phur ta vek ni awm a ni.

Engpawh nise state ṭhenkhat tihdan kan lak zingah 2wheelers taxi service hi a ṭha dawn hle niin a lang a, hei aia tam hi service ta se, mipui tan a ṭangkai leh zual ngei ang. A rate chungchangah pawh sorkar bituk aia tam lak loh ni se. Rs. 50 a ni mai tih a, "A ni mai" tih ngawt ni lo hram se. 2wheelers taxi khalhtute pawhin thil thar a nih hre rengin dan dik thlapin service se a lawmawm ngawt ang. Khawpui a ṭhang zel a, mipui kan pung zel dawn a, kan la mamawh belh zel dawn si a.

Tuna service mekte hian whatsapp group an siam a, an location an report fo a, a hmang duhte tan pan emaw, koh mai awlsam turin an in report ṭhin a, hei hi kei pawhin ka thlawp khawp mai.

- Mama