Mizo ṭawng thi tur chhanchhuah te

Kum 25 vel liam ta han thlir let chuan Aizawl mipa tam tak khan lu met lovin sam an met ṭhin a. Lu mehna dawr pawh “Sam mehna” dawr tih emaw “Hair Cutting Saloon” tih kha a ni deuh vek a ni. Sam met tih hi a dik lo lu met tih tur tih pawhin ṭhangthar tam zawk khan sam met tih kha dik zawkin an hre tlat mai a. Amaherawhchu, hemi chungchang hi chanchinbu ah te leh Mizo ṭawng chungchang sawihonaah te ‘lu met’ tih hi Mizo ṭawng dik a nihzia sawilan ṭhin a ni a. Tunah chuan ‘Sam mehna dawr’ tih aiah ‘Lu mehna dawr’ tih a ni ta vek mai a. Ṭawng dik thi bo mai tur kan chhanchhuah pakhat a ni a, a lawmawm a ni.

A dang leh chu July thla Vawkhniah Zawn thla tih pawh hi ‘Vawkhniak Zawn thla’ la ti an awm. Ṭawng un hrilfiahna James Dokhuma ziak (1st Edition 1987) phek 393 ah chuan ‘vawk hniah zawn thla’ tiin a dah a. A awmzia a sawi dan chuan, ‘Mizovin July thla an sawi dan a ni.

He thla-ah hian ruah phing­phisiau a sur reng ṭhin a. Khawlai a diakin vawk hniak a inzawm zat ṭhin avanga vawk hniak inzawm thla tih nana vawk hniah zawn thla tih a ni’ tiin a sawi. Pu Buanga Dictionary phek 547 ah pawh vawk hniah zawn thla tih a ni a, mi ṭhenkhat chuan vawk hneh zawn thla pawh an ti a la ti zawk. Vawk hniak zawn thla tih chu sawi thu a cheng lo a nih chu. Amaherawhchu, thu dik zawk pawh hi pawm mai har kan ti ṭhin a, kum 25 vel liam ta a, ‘lu met’ tih aia ‘sam met’ tih duh tlat ṭhinte ang khan ‘Vawk hniak zawn thla’ tih lunglen tlat pawl an la awm. Nikum July thlaa All India Radio Aizawla ‘Thlirvelna hun’ puangtu khan ni tin ‘vawk hniak zawn thla’ tiin July thla sawi ai khan a sawi lui deuh ṭalh ṭhin. August thla leh thla dangahte khan Mizo thla hmingin an puang leh duh der si lo. Kan pi pute ṭawngkam hman dik zawk ṭhin hi hmang mai ṭhin ila, ṭawngkam dik lo zawk hi chu paih ngam ila, siam dik zel ang u.

Mizo ṭawng zir nana sulsutu thu leh hla lama Mizote tan a thawh ṭhat avanga India sorkarin chawimawina sang an hlan Padma Shri James Dokhuma te leh Pu Buanga te sawi chin phei chu kan hriat dan nen a lo inang lo a nih pawhin, ka hriat dan a lo dik lo a ni maw tia an sawi dan zawm mai hi a ṭha zawk. Internet website pahat http://zotuithiang-thulehhla.w... chuan “Pu Buanga te lehkhabu hi Mizo ṭawng (dik) zir nana ṭha leh rintlak tak a ni a, Mizo ṭawng dik chungchanga kan mithiamte an inhnial nikhua pawhin, "Pu Buanga Dictionary page no...-ah chuan chuti chuan a ziak..." tiin sawi a ni zel” tiin a chhuah hial a ni. Pu Buanga Dictionary hi Mizo ṭawng thu leh hlaa kan Holy Bible angah hial i ngai ang u. Mizo ṭawng dik lo thei lo hriatna a ni.

Thu dang leh deuh, ‘ṭawng­kam bung leh kan mizia’ inti teh ang: Mi hlawhtling, atir te aṭanga thlansa phulkai kawla nichhuak chhiara an hnathawh rah lo puitling ta hmu a, hna tak tak thawk peih si lo, mi hlawhtlingte dinhmuna din ve tum ngawt te hi an awm an ti. Hetiang mize dik lo hausak thut tumte hi ram hmelma an ni. Taima taka ṭhahnem ngai taka hnathawk tura siam kan ni a. Hlawhtlinna hi thawhrimna pumpelha chan ngawt theih a ni lo. Sum bawlhlawh leh hna thianghlim lo tel lo chuan a len thut theih loh. Hetiang pumpelh kawng zawh duhte thinlung ang deuh hian kan ṭawngkam te hi a tluantlingin kan lam ṭha peih lo va. Kan duh dan danin kan tichhum bung a, a zia lo hle ṭhin. Inkhawmpui tih aia khawmpui tia puan nulh maite hi chu ngaihdan a dang deuh ṭhin. Ṭhianho titinaah ṭawngkaa kan sawi lo thei lo a nih pawhin, Radio leh TV a puanahte leh ziakahte hi chuan inkhawmpui tih ṭhin ni ngei se a dik thlap ang.

Thawhṭanni, Thawhleh-ni, Nilaini tih aia Thawhṭan, Thawhleh, Nilai tihte hi chanchinbu leh thu ziak danga hmuh phei chuan mit a ti kham ṭhin. “Thawhṭanni, Thawh­lehni, Nilaini hetiang hian lamin ziak zel ila puitling takin kan ṭawngkam te hi a tluanin lam tum thar ta ila kan ṭawngte hi tan bung rem rum lovang u. Pastor te. kohhran hrang hrang Secretary ṭheuhte pawh hian thusawinaah leh thu puannaah hei hi zawm thei hram hram sela. Mipui tam tak hmaa ding ṭhin an ni si a. Ṭawngkam hman an uluk hi a pawimawh a ni. Zan lam kan ziak dawn a nih pawhin, Pathianni zan, Thawhṭanni zan tia ziak mai tur a ni bawk. A ni hming emaw zan emaw bracket hnan hi ṭhenkhatin an ching a, hei hi thil ṭul lo a ni bawk. Heng bak pawh sawi tur a tam, helam chi hi chu tun atan chuan tawk phawt se la.

Bible thu hi Mizo ṭawng thu ziak dik leh dik lo hriat nan tunhma aṭang khan phak ang tawka zir nan kan lo hmang ṭhin. Lehlin thar ami duhthusam lo lai pakhat han tilang zawk ila. Genesis 40:20 thu a, ‘pian champhaphâk’ tih hi Bible lehlin tharah chuan ‘pianchampha’ tih a ni ta daih a. Bible lehlin thar hian Bible sawi tum min hrilhfiah ṭha a, a bengvarthlah ṭhin hle. Amaherawhchu, a thu awlsam taka hriat theih tura min chhawpchhuah rual hian, a buaipuitute hian a hmalama Bible Mizo ṭawng kau chheh dik tak an hman anga hmang tho hian; Bible siam ṭhat hna hi thawk ṭhin se tiin ṭhahnemngai takin duhthu kan sam ve a ni.

- RC Zosangzuala (Zualmama), Venghlui