Aizawl traffic ti-jam tu party office

Kan hriat angin Aizawl khawpui chhunga lirthei che vel hi traffic jam vangin awmze nei mang loin a awm fo a, ṭul loah hun leh tha tam tak kan seng ṭhin. Hetiang taka kan khawpui traffic a buai chhan hi khawpui plan a fuh tawk loh vang a ni ber awm e.

Hetianga kan khaw­pui plan a fuh tak lohah chuan Aizawl khawpui traffic jam nasa lutuk tih ziaawm nan ruahmanna hrang hrang siam a ni a, taxi te pawh intlak chhawk tir an ni a, traffic jam tibo tur erawh chuan tuna kan hmalakna te hi a la tawk lo viau. Sorkar pawhin Traffic Jam Free Aizawl City Programme te a siam a, kum li chhung velin Aizawl chu traffic jam awm lohna khawpuiah siam a tum a ni.

Ram dangah pawh traffic hi a jam ve fo a, mah se harsatna sukiang tur leh mipui tana ṭha tur a nih phawt chuan khak ngam loh emaw nek ngam loh emaw an nei lo a, an thil tih duh chu an ti a, harsatna pawh an sutkiang mai ṭhin. Aizawl khawpui traffic ti jam fotu pakhat chu party office leh Vanapa hall a politicial party thil tih a awm changin a ni a, hei hi kan traffic hotute hian an chin fel ngam a hun khawp mai.

MNF an ni emaw Congress leh ZNP etc. pawh ni se func­tion engemaw an neih tawh chuan Aizawl traffic hi a jam ni leng a, chu chu mipuiin kan tuar tlawk tlawk ṭhin a, ngaiah kan nei tawh emaw tih mai turin political party-te hian traffic ti jam tham in koh khawm ngei an tum a. Aizawl traffic tibuai tham an in koh khawm chuan an function chu a hlawhtlingah an ngai mai ṭhin.

Hetiang ngaihdan an nei hi chapo vang a ni a, mipui harsatna siam an hreh lohzia chiang taka tihlanna a ni bawk. Aizawl khawpui harsatna lian ber chu traffic jam hi a ni. Congress party an ni emaw opposition party te pawh ni se fuction lian neih apianga khawpui traffic jam an siam ziah hi tih bo ngam a hun e.

- Lalpekhlua