HER EXCELLENCY DROUPADI MURMU (The second female and first tribal President of India)

Khawvela democracy ram lian ber India chuan a vawi 15-na atan President thar a nei ta. July ni 21, 2022-ah President thlanna vote hi chhiar zawh niin hneh takin thlan tlin a ni. A hming chu Pi Droupadi Murmu a ni.

Aizawl Theological College-a kan zir laiin kan Hostel chaw chhum zingah Murmu-a kan nei a, India President thar tura Pi Droupadi Murmu rawtna thu chanchin thara kan hmuh hmasak ber khan ATC Murmu-a rilruah zuk lang hmasa ber tlat peka mawle! India President 15 kan neihte zingah hmeichhia pahnih an awmna a ni ta. Amah hi hmeichhia a nih mai bâkah India traibal hman zinga President ni thei hmasa ber a ni - keini tribal tan chuan hei hi a chhinchhiah tlak riau.

Pi Murmu-i hi kum 1958 June ni 20 ah a piang a, 1971 ah Uparbeda UPME School aṭangin Primary (up to Class VIII) a zo. Kum 1974 ah Bhubaneswar Girl's High School aṭangin High school a zo a, Ram Devi Women's College aṭangin kum 1979-ah college a zo leh a, tichuan kum 1979 aṭangin Odisha sawrkar hnuaiah Junior Engineer niin hna a thawk tan a. Kum 1981 khan Shyam Charan Murmu nen an innei a. 1994 ah Rairangpur khuaa Sri Aurobindo Integral Education and Research-ah zirtir hna a thawk leh a, kum 1997 khan BJP party zawmin Rairangpur khuaah Councillor atan thlan tlin a ni a. Kum 2000 ah hemi khua vekah hian BJP ticketin MLA atan thlan tlin a ni zui leh ta a ni.

Kum 2000-2004 chhung khan Odisha Chief Minister Naveen Patnaik-a sawrkar hnuaiah Commerce and Transport Minister leh a hnuah Fisheries and animal resources development minster hna a chelh leh a. Kum 2004 ah khan Rairangpur MLA atan thlan nawn leh a ni a, hna a thawk th bawk aniang kum 2007 khan 'Best MLA of the Year' award a dawng. Kum 2006-2009 chhungin Odhisa BJP Scheduled Tribe Morcha Presdient hna a chelh a, kum 2013-2015 khan Mayourbhanj-a BJP district President hna a chelh leh a, kum 2015-2021 chhungin Jharkhand Governor hna a chelh a, he hna a chelh lai hian India President tura sawm a ni ta a ni.

Pi Murmu-i hian vote a hmu tha hle a, India ram puma MP leh MLA vote 2,824 a hmu a, heng mite vote hlutna belhkhawm chu 6,76,803 (64%) a ni. A khingpui Yashwant Sinha hian Vote 1,877 hmuin, amah vote tute vote hlutna belhkhawm chu 3,80,177 (36%) a ni. India ram state thenkhat Andhra Pradesh, Nagaland leh Sikkim ah chuan Murmu-i hian 100% vote a hmu a. Mizoramah chuan Pi Murmu-i hian vote 72.5% hmuin a khingpui Yashwant Sinha hian vote 27.5% a hmu thung. A pumpui thuah Pi Murmu-i hian a khingpui Yashwant Sinha hi vote 28.1% a hnehin hei hi India ram President thlanah inhnehna tlem ber pathumna a ni. Kum 1969 khan VV Giri chuan a khingpui N Sanjiva Reddy chu vote 10.5% in a lo hneh tawh a, hei hi inhnehna hniam ber a la ni. A dawt leh chu kum 1967 khan Zakir Hussain-a chuan a khingpui Kota Subbarao chu vote 12.8% in a lo hneh tawh bawk a, anni tih lohah chuan kumina Pi Murmu-in Yashwant Sinha vote 28.1%-a a hneh hi inhnehna hniam ber pathumna a ni ta a ni. He inthlanah hian vote thi 53 a awm bawk.

Traibal hnam zinga India rama dinhmun pawimawh ber President luah thei kan nei hi a lawmawmin a chhuanawm a, India ram, hnam leh chi inthliarna ten ro an relna hmuna hnam hnuaihnung leh hniam zawk, tlem zawk aṭanga dinhmun sang ber luah thei kan nei hi a chhinchhiah tlak hle. India rama hruaitu hlun tak tak ten Pi Murmu-i lawmpuina thu an thawn nual a. Chung zingah chuan President kalchhuak ta Ram Nath Kovind te, Prime Minister Modi-a te, Naveen Patnaik te, Sonia Gandhi te, Arvin Kejriwal te, Hemant Soren te, Dalai Lama te chu a langsar pawl an ni. A hneh tak Yashwant Sinha chuan lawmpuina thu a thawn bawk.

Pi Murmu-i President zinkawng hi a tluang purh bik lova, kum 2009 khan Lok Sabha MP atan a lo in candidate ve tawh a, hemi tum hian a tling zo lo va, hemi hnu kum 6 chhungin a chhungte mi 3 ngawt mai a sun a, kum 2009 khan a fapa upa ber Laxman Murmu in a boralsan a, kum 2013 khan a fapa naupang ber Sippun Murmu in a boral san leh a, kum 2014 khan a pasal duhtak Shyam Charan Murmu in a boralsan bawk a. Lusunna boruak rit tak tak a lo paltlang nual tawh a ni. Hnam hnufual zinga mi a ni bawk a, hnam hnufualte chawikan leh chhawldawl hi a rilru luahtu lian ber pakhat a ni reng a. Hetia India President meuh a nih takah chuan India rama hnam hnufualte leh tlêm zawkte pawhin amahah beiseina lian tak an nei thar mek a ni.

India-in President thar kan nei leh ta hi a lawmawm a, kan lawmpuiin hna tha taka thawk turin duhsakna kan hlan e.

Congratulations Her Excellency

- PC Nghaklianmawia