PU BUANGA AWARD 2022 (A behbawm chauh)

Mizo Academy of Letters, Joint Headquar­ters, Lunglei buatsaiha kum 2000 aṭanga hlan ṭhin Pu Buanga Award chu kumin, 2022 hian hlan leh a ni dawn.

He Award hi Mizo thu leh hlaa thawh hlawkte leh Mizo ṭawng hmasawnna tura tha leh zung lo hmang rim tawhtute hnenah hlan a ni ṭhin a, ṭum khatah mi pakhat hnenah hlan a ni ṭhin. A tir lamah chuan kum nga danah sem ṭhin a ni a, kum 2015 aṭang erawh chuan kum thum danah sem ṭhin a ni. Mi panga hnenah hlan a lo ni tawh a, chungte chu:

Lalsangzuali Sailo

B. Lalthangliana

Prof. Laltluangliana

Khiangte

Lalthangfala Sailo

RK. Lalhluna te hi an ni.

Kum 2021 ah khan hlan leh tur a ni nain hripui leng avangin ṭhulh a ni. Kumin, 2022 ah Pu Buanga Award hi sem theih ngei tum a ni. Tunah hian Top Ten thlan a ni tawh a, heta ṭang hian award dawngtu tur chu thlan chhuah tur a ni. Tuna Top Ten thlanchhuahte chu;

C. Chhuanvawra

C. Laizawna

C. Lalnunchanga

Darchuailova Renthlei

Dr. Lalzuia Colney

J. Malsawma

Lalrammawia Ngente

Prof. RL. Thanmawia

R. Lalrawna

Rev. H. Killuaia

(An hming

hi alphabetical

order anga ziah a ni)

Heng Top Ten thlan chhuahte hi Mizo ziakmiah an ṭha ber a, an tling ber e tihna erawh a ni lo; an ni ang bawka mi ṭha hi tam tak an la awm ang. Anni hi Mizo thu leh hlaah mi thawh hlawk tak tak an nih mai piah lamah Mizo ṭawng hmasawnna atana tha leh zung lo seng nasa tawhtute nia hriat an ni a, sulhnu ropui leh chhuanawm tak tak an nei a ni.

An zavai hian thlan awm tak tak an niin thlang vek thei ila a duhawm laiin pakhat chiah thlan tur a nih avangin ngaihtuahna hman a ngai hle awm e. An kutchhuak lehkhabute hi hnam ro tling khawpa lehkhabu ṭha leh hlu a ni hlawm. Ṭhenkhat phei chu Book of the Year atana thlante pawh a lo ni hial tawh ṭhin.

A mal mala sawi hman ni rih lo mahsela ṭhangtharte hian an kutchhuakte hi kan ngaihhlutsak ngei pawh a tha ngei ang. Zofate zingah thu leh hlaa anni aia thawh hlawk hi an tam kher awm lo e. Mizo ṭawng humhalhna kawngah ngei pawh an hnungzui tura kan inbuatsaih a ṭha ang.

Pu Buanga Award thlangtu Mizo Academy of Letters, Joint Hqtr. Lunglei-te hian ngaihtuahna fim tak leh zau tak hmanga a dawngtu tur hi thlang ṭhin an ni. Hun hmasa lama an lo thlan tawh danah pawh sawihnawmna tur engmah a awm ngai lo.

Top ten aṭang hian Top Five an thlang chhuak phawt ang a, chutah Top three an thlang leh phawt dawn a ni. Heng kan ziakmite lehkhabu ziahte ngei pawh hi an chhiar tam a rinawm. Mizo ṭawng humhalhna kawnga an thawh hlawk dan leh Mizo ṭawng hmasawnna atana an thawh hlawk dante sawi vek sen a ni lo. Amaherawhchu tu pawh hi thlang chhuak se an awm vek thoin a rinawm.

Kan hriat leh hmuh angin tunlaiin hmun hrang hrangah Mizo ṭawng dik mang loa ziak leh chhiar tur a tam a. Mizo ṭawng chu ṭawng har tak a lo ni bawk nen hian ziak dik lo pawh tam tak kan hmu hlawmin a rinawm. Chungahte chuan heng Top Ten an han thlanchhuahte hi chuan Mizo ṭawng an ziak uluk hlawm a, ṭhangtharte hian kan entawn ngei pawh a ṭha a ni.

Kan ṭawng hi a dik thei ang bera kan inhlan­chhawn zel a ngai a, a dik ber zel kan hman pawh a pawimawh bawk ang. Ṭawng hi hnam ro a nih mai bakah hnam hmel lanna pawimawh tak pakhat a nih avangin kan humhalh ṭhat a pawimawh a, tihdanglam tumtute lakah pawh kan ven tlat a pawimawh.

Chutiang a nih avang chuan tuna Pu Buanga Award thlan chhuah tura Top Ten-a hming lang phakte hi chu entawn tlak tur khawpa Mizo ṭawng ziak danah leh Mizo ṭawng hmasawnna tur kawnga mi chhuanawm an ni e.

I lo thlir zel ang le....

- Mahmuaka Chhakchhuak