ECONOMIC WAR…Covid-19 hrin chhuah!?

Tunlai khawvel thil thleng (COVID-19/Lockdown) hian Mizoram mipuite leh India ram hruaitute (Modia Sawrkar) te hi, kan duh leh kan tum lawk vang pawh ni lovin ‘Economic War’ ah min hnuk lut lo thei ta lo a ni ber mai. Entirna tlem sawi ila :-

1.    Lockdown vanga inkharkhipna chuan kan nitin mamawh ei tur hnephnawl thlengin Mizorama lakluh a theih loh avangin Mizoram mipui (Aizawl, etc.) ten thlai hring ei turte pawh kan tlachham thuai a, chutah kan ram chhunga tharchhuah awmchhunte lakhawmin mamawh zual kan insem hrâm a, Local Task Force-te chuan hri hlauhawm laka invenna ai maha hautak, ei tur tlachham turte dapchhuakin ‘sem sem dam dam, ei bil thi thi’ tiin an hmanhlel em em kha a nia.

2.    He hripui lo thlen avanga ṭampui mitthi lo thleng thei tur laka inven nan Zokhaw lam mipui tam tak chuan vahsan lak hun pelh hnu (April/May) ah pawh buh leh bal chin/tharchhuahna turin chul rih turte zawngin kan dam khawchhuah nan beihpui kan thlak nasa hlawm tak meuh mai. Nehemia-hova Jerusalem din ṭhat dawn laiah Israel mipuite chuan, “Chu hna ṭha thawk tur chuan an kut an tichak a,” (Nehemia 2:18) tih ang khan Zoram mipui chuan hma kan la nasa ve hle a, ‘Economic War’ kan tawngin kan bei ṭan a ni ber mai. Sawrkar Agri. Dept. in vaimim chîn tur qt. 374 mipui hnena a sem pawh a ching duhtute'n kan duh khawp lo zel zawk a ni a. Mipuite hian thawhchhuah tam kan tum hlawm ta tak meuh a ni. Tin, Horti Dept. pawh hian thlai chi hrang hrang Mizoram hmun tam takah chin tur a sem char char bawk a ni.

3.    Bairabi Zophai leilet, a enkawl thintu vai te an awm loh/tlanchhiat avangin leilet neitu mi (chhungkua) 17 te hman turin Agriculture Minister chuan Bialtu MLA nen kalin Power Tiller 4 lai an pe a, chutah leilet nei­tute ngei chuan an lawmthu sawiin anmahni ngeiin phur taka enkawl an tumzia an sawi kha a ni a. Tin, Siaha District a Phura phai hectare 670 (Buh tin 1680 hmun tiat vel) chu Food Security Consultative Com­mittee chuan buh bal tam thei ang thar tura leileh hna thawh an tum a, MLA te MDC te Earth Movers (JCB etc. neitute) leh mi inphalte thawh­khawm hmanga thawh tum a ni.

4.    Ramria ral/hri ven hna thawka duty-te'n hrehawm hle mah se anmahni goal ven chu chhuah an tum lo hle a; chutihrualin, anmahni chhungkaw tan pawha thawk lo leh eiin harsate an nih ve tho avangin, rilṭam chunga ralven hna thawh chu ram mipuiin rem ti thei lovin, khawpui lam leh hmun hrang hrang aṭangin mi tlawmngaiten an ei tur mamawhte pek ve zel chu kan tih turah kan ngai thung a; COVID-19 hri ven mai bakah ruihhlo damdawi ṭha lo chi hrang hrangte Mizoram chhunga lut tur vengtute an ni nghal si a. Jerusalem din ṭhat hna thawktute pawh khan an kut khingkhatin hriamhrei an keng (ral veng) a, khingkhat dangin kulh siam hna an thawk kha a ni a, chutiang deuh chuan he kan ram tundin hna hi kan thawk tlang vek a ni ber mai.

5.    State Sawrkarte harsatna : Ram pumpui (India)-ah Economic activity zawng zawng a chawlh ṭhup avangin Sawrkar laipui pawhin a sum hmuh tur ang a hmu lo nasa em em a, State Sawrkarte hnena a sum sem ṭhin 1/10 (hmun sawma hmun khat) velte bak a pe thei hlawm bik lo ni tur a ni. Delhi-a chief minister  Kejriwala chuan, “Kum danga vaibelchhe 3500 kan dawn ṭhin hunah tun ṭumah chuan vaibelchhe 300 emaw chauh min pe si a, heti chuan sawrkar hnathawkte hlawh pek tur kan nei dawn lo a ni,” a ti hial a ni. Tin, Kerala Sawrkar mangang pawhin sawrkar hnathawkte chu thla tin ni 6 hlawh thla 5 chhung ‘cut’ a tum a; mahse sawrkar hnathawkten court-ah an thlen avangin court chuan a stay tir ta a, chutah sawrkar chuan ordinance siamin (promulgate) sawrkar hnathawkte hlawh aṭanga 25% cut zel turin thu a titlu ta a (Rs. 20,000/- hnuai lam hlawhtute tel lovin). Ordinance hi ‘Concurrent list’ (Central leh State) sawrkarten an siam theih ve ve a ni a. Tin, Minister-te leh MLA leh Board Member-te chu kum khat chhung an hlawh atangin 30% cut zel tura tih a ni bawk a. Heng state te hian Disaster lo thlen huna Economic War an hmachhawn zel dan tur an siam (promulgate) chu a ni deuh ber a, keini Mizoramah erawh Voluntary Donation anga sum thawhkhawm a ni hrih deuh vek thung.

 6.    Prime Minister Modia Economic Package : Ram pum­puia lockdown kenkawh a nih vangin hna kal lai zawng zawng pawh tihtawp vek an ni lo thei lova, chuvangin sawrkar tana sum luhna zawng zawng pawh a tawp ṭhup a ni ber a, entirnan Central sawrkarin rail chuan man/phurh man te ni tina cheng vaibelchhe tel a lak luh thinte, sawrkar sum hnarpui ber tax (chhiah) chi hrang tam tak lut turte an awm ta lo a ni ber a. Sawrkar laipui chuan state sawrkar hnenah kum danga a pek ṭhin hmun 10 dawna tlemte chauh a pe thei a ni mahna. Heti khawpa ram economy tlakchhiatna aṭanga dingchhuak leh turin Prime Minister Modia chuan Economic Package a puang chhuak ta hial a. Hun pangngaia Central Sawrkar budget pumpui hmun 10-a pakhat (1/10) cheng vaibelchhe nuai sawmhnih (20 lakh crores) hmanga COVID-19/lockdown vanga tuar zualte chhawmdawl nan leh ram economy khaichhuah nan Programme chi hrang hrang, sector hrang hrangah siama puan nghal (May 12 - 17 chhungin) a ni a. A mamawh tak tak leh thawk hlawk tak tak thei turten awlsam zawka chhawmdawlna leh tanpuina (Loan awlsam, etc.) inpek dan te hman tum a ni a. 

Huan leh lo lam (Farming) thawktute tana Programme hnemhnang tur chi hrang hrangte, ran vulhtute leh ran hriselna atante duhsakna tam tak pek tum a ni a. MSME (Micro Small Medium Enterprise) Industry kaihhnawih lama eizawngtute tan ṭanpuina chi hrang (Loan pawh Quarantor-ah Central sawrkar tang turin) siam tum a ni a. Ramhmul damdawi (Herbal Cultivation) beih uar te, Micro Food Enterprise te, Rural Health tihchangtlun te, Employ­ment tam thei ang ber siam tumte, Education thrust siam tumte, Uni­versity 100 hnenah May ni 30 aṭanga Online Course siam tumte, a!! thil tam tak India ram hi Economic lama nasa zawka hmasawnna nghet nei tur ruahmanna tam tak a awm a. Pu Modia Economic War beih duh dan programme kenkawh duh dan a nih ber mai hi.

Lal Kura chuan Jerusalem kulh chhe tawh siamṭha turin sum leh pai ṭul apiang hman zel phalna thu a pe a (II Chro. 36:22&23, Ez:1:2-5, Neh. 6:3-12). Chutiang deuh chuan Prime Minister Modia chuan India ram Economy a Covid-19/Lockdown avanga tluchhe mek chu tungding ngei turin sum tam tham deuh (Vaibelchhe nuaih 20) senralna tur Economic Package chu a puang ta rup mai a ni a. He Economic Programme hian a huam zauvin Mizoram tan chuan Development Board 10 chuang kan neih zinga a tam berte hian tumah initsik ṭul lovin, mahni seh seh mual ṭheuhah hmasawnna hna thawh tur (leh sum ruahman) an tam hlawm hle dawn a ni a. Heng sumte haichhuak tur erawh chuan Central lamin chet dan tur a ruahmante zulzuia Development Board hrang hrangte chet nghal char char erawh a finthlak dawn niin a lang, state dang ten kan chan tur angte thlengin sum hnar pui Central atang hian minlo thal khalh pawh a hlauhawm thei mahna!! Tichuan he Economic War-ah hian sawiselna leh harsatnate lo awm ṭhin bawk mah se, tumruhna leh thawhrimna nen chuan (ṭawngṭai zel chungin) Zofate hian hmasawmna kawng dik kan zawh theih ngei a beisei awm lawm ni?