Ngaihsan tur dik

Revd Chuauṭhuama’n zirtirna a lo pek tawhten amah an ngaihsanna leh an chawimawi duhna lantirna lehkhabu ‘Mizote leh Pathian thu - A Festschrift in honour of Revd Chuahthuama on his 70th Birthday’ an ziak tih TV news a ka lo hmuh khan, thil ṭha tih hi up bo theih a nih lohzia min hriat chhuah tir a. Mizo zinga hetiang mi kan nei hian a hnam angin inrintawkna min pe hialin ka hria. Revd Chuauṭhuama hian hetianga lehkhabu ziak tur hian heng zirlaite hi a ngen awm der si lo a, a beisei miah lo bawkin ka ring. Hetiang hi chawimawina a zawnga hlu ber, thil ṭha tih leh midangte tana inpekna thup bo theih loh, ngaihhlutawm tak a ni. Hetiang ang zirtirtu ṭha, zirlaite tana theihna sang ber hlan mi hi kan ramin a mamawh chu an ni.

He chawimawina Revd Chuauṭhuam’an ni 8.5.2017 a a zirlai chhuak tawhte aṭanga a kum 70 tlin lawmna huna a dawng hian thil tam tak min ngaihtuah tir a, lar khel lo, a ṭha zawnga hriat hlawh ta si te; hnam tana an hlutzia leh lansarh khel reng renga hmanhlelte hnawksak sizia hi a ni. Revd Chuaṭhuama hian min hriat vena tur awm a awm lova, vawikhat ka ngaihsan avangin kum li liam ta vel khan ka pu chibai ka tia, min en chiang mang lo chuan min chibai ve tawh tih zawng a ni. Hetiang miin chawimawina an dawn hian ngaihsan tur dik ngaihsan kawngah kawng kan la bo lo tih a lantir a, ka phak tawk chawimawina nopui he thuziak hmang hian ka hlan ve e.

Mizote hian mahni intilar tura kawng zawn chiam hi kan pawm zawng niin a lang lem lo a, thu khuh deuh taka thusawi ṭhin kan ni ber. Kan Prime Minister Narendra Modhi pawh hi mahni thlalak tar chiam chiam hi a ching viau mai a, hengte hi kan Mizo zia nen chuan a inhmeh viau lo in ka hria, ka lo ip deuh ṭhin. Thil ṭha tih avanga mite hriat lo ni ta te hi an lawmpuiawm a, lar tum hrim hrim hi chu a dang daih a ni. Mizo nunah chuan thu thup takin thil ṭha tih pawh sawi hram hram a ni tlangpui a, hun a lo dang ta nge ni, timna nei miah loa mahni infak kan ching chho ta hle. Ṭhangtharte hian fim taka thil thlir dan zir ila, kan ngaihsan zawng zel hi kan nun awmdan tur a nih miau avangin ngaihsan tur dik ngaisang turin kan khawhawi i ti zau zel ang u.

‘Mahni tawnhriat midang­ten lo ṭangkai pui ve se’ tia thuziak hmang emaw film emaw thil dang hmang emaw a thehdarh te hi chin dan ṭha tak a ni a, mi entawn tlakte chanchin hriat tam te hian nun a chawm a, chutiang hriat fo na chuan nun nghet min pe thei a ni. Mawi hawih zawng miah loa lansarh khel ṭhin te avangin vantlang nun a chiri nuai thei a, ngaihsan tur dik kan hai phah hial thei bawk. Ṭhangtharten lar hi a khelha khelh chi emaw an tih phei chuan hnam ngaihtuahawm tak kan ni ang.

Thuziaktu pakhat chuan “a ruka kan thil tih, miten hre lo se kan duh em em, eng emaw ti tia an lo hriat leh si te hian nun a ti nuam ṭhin” a lo ti a, hetianga thil ṭha ti ṭhinte hi chu mite tan an hnawksak lo hle ang. Rilru dik hmanga thil ṭha titu chuan a let leh beiseina a neih a rinawm lo a, a let leh beisei a hmalakna reng reng hi chu thil ṭha tih a tling zo lo. Eng kawngah pawh hriat hlawh fal an awm tawh hi chuan dik hlel deuh hi a awm leh mial ṭhin. Phuba lak nana ṭha ber chu thil ṭha tih hi a ni a, chu kawng chu a tlo ber bawk. Mahni chhungkuaah hian a ṭha zawnga hriat kan nih theih nan bul ṭan ṭheuh ila, kan chenpui leh thawhpuite hian rintlakah min ngai phawt mai se, chu chuan kan mimal nun hi belhchian dawlna kawngah min hruai chauh ang.

Pawn lerah ngaihsan tur zawng lova, inchhungkhura ngaihsan tur kan tu leh faten an zawn hmuh hunah kan hnam hi a ngelnghet sawt ang. Thil ṭha tih lang chhuak nghal zung zung ang chi-ah hian fimkhur ila, daih rei, tlo leh belhchian dawlna hi i zawng ber ang u.

Revd Chauṭhuama zirtir lo ni tawh zirlai 20 (sawmhnih) rualten hetianga an zirtirtu ṭhahnemngaihna mi tam zawkte hriat ve phak pawh ni lo, up bo loa an chawimawi hi an entawntlak a ni. Revd Chuauṭhuama ngalfimin dam rawh se.

- B.Lalchhanzova