SIPMIU hna thawh ka hrethiam lo!

SIPMIU hian Aizawl veng hrang hrangah kawngpui an lai chhia a, tui chhe paihna tur an siam mek a niin an sawi. An kawng laih chhiat hi siam loin a kum tel an kalsan zel a, veng ṭhenkhat erawh an siam thuai a. An siam chhun te lah chu a hma ang thlapa ṭhaa siam awm a nih laiin a chhe leh hma hle.

SIPMIU rua­hmanna hi kawng chhak lama awmte tan chuan a ṭha viau a ni thei; mahse kawng thlang lama awmte hian engtin nge tui chhia an paih ve ang tih te pawh kan hre lo a, mipui kan bangbo viau a ni.

Singapore-ah chuan an ek thli te pawh tui in tlakah an sawngbawl tih India ram kil khawra awmte pawhin kan hria a ni.

Kan kawtkaia SIPMIU project kal­pui mek erawh a tuartu leh chhawrtu tur Aizawl mipuite hian eng ber nge an tih kan hre chiang tlat lo a, an thil tih tum hi rinthu in kan in sawi huai siak a ni ber mai.

Hmanah bawlh­hlawh bawm tur bucket an sem chiam a, tui chawi nana kan hman tak huai huai hnu kha chuan a tui fal leh anmahni hnaivai deuhte bak chuan an hna thawh leh an thil tih tum hi kan hre chhunzawm ta miah lo.

SIPMIU hna thawh mek hi a pawimawh em avangin mipui lamah awareness tam zawk tih ni se. An hna pawh hi uluk zawka vil a ṭha ang.

Aizawl east lam veng pakhata an manhole phum te phei chu a dik tawk lo nia an hriat avangin mi ṭhahnem ngaiten an sawisel a, an engineer-te chuan “hei hi kan vawikhat tihna a ni” ti zawngin an chhang. SIPMIU hian Aizawl kawngpui an lai chhia a, pipe lian an phum mek a ni si a, hmun ṭhenkhata an hnathawh dan hi chu a ngaihṭhatthlak loh a ni. Kawngpui thuk tak takin an lai a, Aizawl khawpui chhiatrupna thlen hial theihna a nih bawk avangin a nih dan tur dik thlapa an tih loh chuan an hmalakna hi Aizawl mipui tan a la hlauhawm viau thei a ni.

SIPMIU hian eng anga hna ṭha leh ropui pawh thawk se khawpuia cheng mipuiten kan hriat­thiam miau loh chuan mipui thlawpna an hmu ṭha tawk lo ang a, chutiang a nih chuan khawi vengah emaw chuan tual chhung mite nena inhmuh thiam lohna te pawh thleng hial thei a ni.

Media-ah SIPMIU kawng laih chhiat siam ṭhat loha hun rei tak an dah thu kan hmu tawh bawk. Mizorama chanchinbu lian ber pawhin khatianga chhuah awma an ngai a nih chuan an thil tih mek leh an thil tih tum hi mipui hnenah an puangzar ṭha tawk lo tih a chiang viau.

- Ramhmangaiha