MZUSC-TE HIAN KAN TIH TUR TAK KAN TI

Dt 30.05.2017 Vanglaini Editorial-ah khan, 'Lehkhathiam chu an thiltihah lang se' tih kha kan lo hmu hlawm ṭheuhin ka ring a, hetianga chanchinbu lian editorial meuha keini MZU zirlaite demna a rawn chuang ta mai hi a mak ang reng hle a. Thu thiam leh ziakmi ni ve lo mah ila, MZU zirlai aiawhin thiam ang tawkin thil nihna dik tak han tarlan ve ṭhain ka hria a. Tute nge tih tur dik tak ti lova dan leh thupek pawisa lotute leh, dan leh thupek kengkawh lotute chu ni zawk tih chu he thuziak aṭang hian in lo hmuh thiam ngei kan beisei.

Kum kal ta aṭanga MZU zirlaite, zirlai hruaitute leh MZU chhunga Association hrang hrangten FCI Godown-a buhfai phur lut leh phur chhuak ṭhin truck-ten MZU kawnga parking mumal lo taka an din ṭhin avanga harsatna kan tawh nasatzia te, thuneitute kan nawr nasat ṭhinzia te min hriatthiampui pha erawh kha chu a lawmawm hle a ni.

He kan buaina chinfel a nih theih nan hian kawng hrang hrangin Mizoram University Students' Council ang te, MZU Joint Action Committee, Mizoram University Non Teaching Staff Association, Mizoram University Teachers Association ang tein lehkha tam tak proper channel takin thuneitu hrang hrang sawrkar laipui leh Mizoram sawrkar hotute hnenah FCI Godown sawn chhuah a nih theihna tura hma la turin vawi duai lo kan lo ngen tawh ṭhin reng a ni. Kum 2014-15 chho-ah HRD Minister, Ram Shankar Katheria-in Prime Minister hnena thlen tura kan hruaitu kal ta te a lo tih anga lehkha an siam te, PM hnen ngeiah a man a pek sak te, nikum lawka MZU a HRD minsiter of States Mahendra Nath Pandey hnena kan thlen te pawh sawi tur a awm a. Central leh State level-a kan hmalak tawhna tam tak vawiin hian rawn sawi ka tum ber a ni lo va, sawi sawiin awmzia a nei lo tih pawh keini hi a hre chiangtute kan ni.

Nikum 2016 kum laihawl vel aṭang khan kan hmalak tawhna hrang hrang, kum kal ta aṭanga dilna kan lo thlen fo tawh ṭhin chu hmalakna leh chhanletna ṭha tak kan beisei kan dawn loh avangin Mizoram university Joint Action Committee chu din a ni a. Chu committee-ah chuan MZUSC, MUNTSA, MIZUTA, MURSA, Tuivamit leh Tanhril khawtlang hruaitute chu member an ni.

Nikum khan MZUJAC te chuan kum danga thuneitute hnena kan lo thlen fo tawhin awmzia a nei lo tih hre reng chungin ‘bei nge sei run dung’ tiin, FCI Godown sawn chhuah a nih ngei theihna tura hma la turin sawrkarah ngenna hnuhnung (ultimatum) Chief minister hnenah kan theh lut a. Chu kan ngenna hnuhnungin ngaihsak emaw, chhanna emaw, kan hmuh loh chuan, MZUJAC chuanin engtiang pawha hmalak a ṭul a nih chuan hma kan la ang tih pawh chiang takin kan tarlang a ni. Hetih lai hian CID te pawhin kan chanchin hi an ngaihven em em a ni. Kan ngenna hnuhnung kha kan hun tiam chhungin chhanna kan dawng dawn lo a ni ang, a ṭul anga hmalak a ngai a nih hi tia kan inkau dawn lai takin kan Chief Minister chuan, kan ngenna chu FCS & CA Minister Pu John Rotluangliana hova sawi ho turin a ti ta a. Chuti chuan Minister John Rotluangliana Office Chamber-ah chuan Joint Meeting kan nei ta a ni.

He meeting-ah hian MZUJAC bakah, FCS&CA hotute, FCI Area te leh sawrkar mi pawimawh dangte an tel a ni. A tawi zawngin sawi ta mai ila, MZUJAC ten FCI Godown sawn chhuah a ṭulzia leh harsatna kan tawhte chu kan sawi a, sawrkar pawh nasa takin kan ngen a ni. Minister te leh FCI lam hotute sawi dan aṭangin FCI godown chu sawn chhuah mai theih a nih loh dan te leh sawrkarin ram pe mah se, FCI lama hotu lianten an approve theih loh avanga tun tut tuta sawn chhuah a nih theih lohzia leh, sawrkarin FCI duh dan anga ram a zawn mek thu te an sawi aṭangin, MZUJAC pawhin kan hriat thiampui em em a. Theih loh ngen rual kan ni lo tih kan hre chiang a ni.

Chuvang chuan tuna harsatna chinfel dan awmchhun nia kan hriat chu MZU kawng chhe vela truck ding tam lutuk chu a hmun ngeia enfiah a, mumal zawka parking mumal taka kalpui a nih theihna tura hmalak chu kan remti tlang ta a ni.

Tichuan, Dt 15.9.2016 khan, Tuivamit leh Tanhril Ramrikawn area chhunga motor kawngpuia lirthei tluang zawka a kal theih nan te, lirthei che vel leh he kawng hmangtu mipuite an lo him zawk nan te, MZU lam pana lirthei kal leh haw lam tih ziaawm nan; FCS &CA Department hotute, Traffic Police hotute, MZUJAC hruaitute, Tuivamit leh Tanhril khawtlang hruaitute leh Mizoram Truck Drivers Association hruaitute chuan a hmun ngeia en fiahna an neih hnuah an remtih tlan ang ngeiin Traffic SP Pu C.Lalthanmawia chuan Mizoram State Sawrkar Notification B 12021/10/04. TRP dt 22.8.2005 leh Section 117 of MV Act, 1988 in thuneihna a pek ang ngeiin thupek a chhuah a. Chu mi notification-ah chuan chiang takin MZU kawng dunga motor park theih chin siam a ni a. Kawng dungah hian motor 12 ding turin SP hian thupek a chhuah a ni. He thupek hi tunah hian hmuh theihin a copy pawh kan nei a ni. He thupek/ notification hi ni 19.9.2016 aṭanga thu leh awm hma chu hman a nih tur thu leh 26.8.2016 a lo chhuah tawh Notification no. RO/TRF SP - Noti. 7/08/1037 Dated 26th August 2016 a luahlan nghal ang tih a ni a. Hemi thupek bawhchhiate chu MV Act Section 177&179 hmanga man leh hrem theih an nih tur thu Dt 16 September 2016 ah khan chiang takin thupek a chhuah nghe nghe a ni. Hemi bakah hian FCI Godown compound chhungah FCI Area Manager-in motor 30 vel chu dah thei tur thu a sawi a. Hemi atan hian Security Police lamin dah thei se a duh thu sawiin FCI Godown bula Traffic Management hi ngun takin Traffic Police pahnih talin vil se - tih chu resolution passed a ni.

Tuna MZUSC tena kan buaipui ber ni ta chu, he thupek chhuah tawh, FCS & CA Department hotute, MZUJAC, Tuivamit leh Tanhril khawtlang hruaitute, Mizoram Truck Drivers Association hruaitute hriatpuina ngeia thupek lo chhuah tawhin awmzia a neih loh avang leh, a hma ang bawka truck parking mumal loh avanga MZU kawng hmangtute zawng zawngin a hma ang chiaha harsatna kan tawh leh avangin a chunga kan sawi tak Traffic SP thupek kha a taka kenkawh a nih ngei theih nan Traffic SP pawh kan ngen a, keini lam pawhin thuchhuah siamin a rang thei ang bera hma lak a nih a, dan leh thupek kengkawh turin kan nawr a, chu chuan awmzia a neih loh chuan MZU zirlaiten kan kengkawng tawh mai ang kan ti ta tawp mai a ni. Kan kenkawh dan tur hi kan sawi lang lova chiang taka kan hmalak dan tur sawilan a nih loh laia kan ngaih dan dana hma la tura min lo ngaihna ang deuh thu ka hmu ta mai hi, hrehawm kan tiin, a zia lo hlein kan hria a ni.

MZUSC hian sawrkar thupekin awmzia a neih loh avangin a nih dan tur ang taka dan leh thupek hi kenkawh a nih theihna turin kan Traffic SP hi kan nawr mai a ni. Keini lam chuan kan tih tur dik tak ti-ah kan inngai a, dan leh thupek siamtu leh kengkawhtu turten an tih tur tak an tih tawk loh avanga buai zawk mai kan ni. He kan thil tihah hian FCI lam emaw, MTOA, MTDA te kan bei a ni lo va, dan leh thupek kengkawhtu turten an tih tur an hlen loh avanga zirlaiten harsatna kan tawh chu chinfel a nih ngei theih nan kan theih ang tawkin thuneitute kan nawr zawk a ni tih hi min hriatsak turin mipuite kan ngen a ni.

MZU zirlaite hi zirna chhungah pawh buaina tur tam tak kan neih tehlul nen, hetiang thila kan hun leh tha kan senral a ngai ṭhin hi a pawi kan ti hle. Dan leh thupek kenkawh a nih loh reng rengin a tuartu tur chu keimahni ṭheuh kan ni si a, chuvangin he rama zirna in lian ber leh sang bera zirlaite hian dan leh thupek kengkawh tura thuneitute kan nawr hi kan tih tur dik tak a ni a, kan inchhir lo. Zirlai kan ni emaw, ni lo emaw, khua leh tui kan nihna zawn ṭheuhah pawh dan leh thupek zawm chu kan tihtur a ni tih kan hria. Eng kawngah pawh dik lo taka thil tih a awm reng rengin dik lohna hai lang ngam kan nih ṭheuh hi MZU zirlaite chuan kan duh ber a. Tuna kan buainaah pawh hian MZU kawnga truck park ṭhin hian dan ang takin an motor hi park mai se, traffic lam pawhin an tih tur dik tak tiin traffic rules zawm lo chungah hian action la ṭhin mai se la chuan, hetianga buai chung chunga keini kan lo pen chhuah hi a ngai lo tur tih kan sawi nawn leh duh a ni.

30.5.2017 vek khan tunlai thil awmdan hriain FCS & CA Minister Pu John Rotluangliana chuan a Office Chamber-ah joint meeting a ko a. He meeting-ah hian sawrkar mi pawimawh leh pawl hruaitu tam tak an tel a. FCS&CA, UD & PA, AMC, Traffic SP, Tanhril Local Council, Aizawl SP, FCI Area Manager, MTOA, MTDA, MZU Incharge of Transport, MZUSC te bakah Dean of Students Welfare, MZU pawh a tel a ni. He meeting-a kan thutlukna ni ta chu Parliamentary Secretary hova a hmuna en fiah a, Traffic SP hova thupek lo chhuah tawh pawh en nawna siam ṭhat leh tum a ni. Eng thupek pawh siam ni se la, MZUSC chuan dik takin kalpui a ni em tih hi kan lo ngaichang reng dawn a. Dan leh thupekin awmzia a neih loh zel chuan ngawih bo pui mai mai kan tum lo a ni. Dik tak leh fel taka tih hi kan duh leh tum ber zawk chu a ni tih mipuiten min hriatsak turin kan ngen bawk che u a ni.

- C.Vanlalzuata General Secretary, MZUSC