MONTHLY AVERAGE BALANCE

“Bank account-ah khan eng zât nge dah char char ngâi tawh kha? Rs. 3000/- em ni kha?” “Ni lo. Dah char char tûr tih a awm lo, ‘average’ an tia lawm. ‘Average’ i hre lo em ni? Average chu... ih... eng nge kha aw?”

‘Average’ hi pâwl 4 vel aṭangin kan zir hlawm em kha? Tu ma’n kan thiam leh tawh lo a ni âwm e. Lehkhathiam lo chu ngaihhnathiam an ngâi a; vantlang chunga lêng, mi naran aia sâng, kan dinhmun hi step ni ta se, kan inlal hleih avanga a ban pawh kan ban phak loh turte pawh hian, ‘dah char char tur em ni kha?’ an ti fo mai. A khat tâwkin, ‘average-a lâkin chutiang khatiang chu a ni...’ te kan ti ve ṭhin, a awmzia kan hre lo. Chhût chian ngâi awm lêm loah average ka hre thiam, chhût chian ngâi a awm chuan kan buai nghal; average-a lâkin average awmzia hre lo vek ang kan ni mai awm mang e.

SBI Savings Bank Account-a dah ngâi an sawi rik hluai kha Monthly Average Balance (MAB) tih a ni a, khua a pui dan azirin MAB a inzât lo. Mizoramah chuan Aizawl khaw chhûngah MAB Rs. 3000/- a ni a, district khawpui dangah (Mamit tiam loin) Rs. 2000/- a ni; Mamit leh khaw dang zawng zawngah Rs. 1000/- tih a ni. Monthly tih a nih avangin calendar thla ang zêla chhût a nih hmel. 'Chuan, thla khat chhunga zan tin balance belh khawm kha thla tâwpah ni zât belh khawmin an sem ang. Chumi sem chhuah chu Aizawl khaw chhung tan Rs. 3000 a tlin loh chuan pawisa châwi a ngai dâwn tihna a lo ni ta a ni. Heta pawisa châwi pawh hi ‘tax’ ti ṭhin an awm; tax a ni lo, charge a ni zawk.

Thla khat chhûng ni tin balance belh khawm = MAB

Thla khat chhûnga ni awm zât

June thlaah hian ni 30 a awm a, June 1-a i balance kha an chhinchhiah ang a, June 2-a mi an chhinchhiah leh ang a, June 3... June 30 thleng, i ni tin balance kha an belh khawm ang a; chumi belh khawm chu June thlaa ni awm zat, 30 hmangin an sem ang a. Chumi sem chhuah chu Rs. 3000/- a tlin chuan châwi a awm dâwn lo tihna a ni. Engtik lai pawha Rs. 3000/- dah char char tur tihna a ni lo.

Hetiang huphurha nei lo inti kan awm chuan ‘zero balance’ awm thei chi account hawn daih tur; mahse, pawisa nei lote tana tih a nih avangin pawisa tihchêt sek tur a neih ve ngawt chi loh ang.

- Rempuia R. Lûtmâng