KA SAWINA APIANGAH KA ZÊP ANG!

June 1 zan dar 11:00 vel khan Mizorama Novel Coronavirus kai hmuh chhuah thar, mi 12 lai an awm thu Whatsapp lamah a darh chiam a, kan phawklek tlang viau. RAT reactive an hriat sual nge, mi thusawi an dawngsawng fuh lo zawk ni ang, tih rilruah a awm. 

Group ṭhenkhata rawn post darhtute ka han zawt kual an 'confi' em em lehnghal! An ṭhian medical lama thawkten 'status' atan an hman tawh thu min hrilh ta deuh deuh! 

Tichuan zing dar 07:00 velah official-in sawrkar lamin DIPR Mizoram (twitter) kaltlangin a puangzar ta a, chawhnu dar 01:00 hian chiang zawkin Press Briefing neih a ni dawn e, tih te a ni. Hemi chungchanga ka ngaih pawimawh tak em emte chu :

Nge, an va hrilha tezawk hi dem tur? 

Committe mawng pawp pawh kan huat ṭhin em kha. 

Ropui rapthlak taka puanzar kher hi a la ṭul ber em?: Case kan neih ṭum hnihna chauh a nih avangin miin an hriat vek tawh hnu, a tuk chhun dar 01:00 vela puanzar hi a ṭul tho pawh a ni mahna. Nakin zel atan erawh a ṭul kherin a rinawm tawh lo. 

Kan ṭhenawm state Assam angah te pawh an Health Minister Himanta Biswa Sharma hian a Twitter account aṭangin zan rei hnu thleng pawhin a puangzar mai a, thil chiang kan hre thuai zel. Meghalaya leh Tripura-ah pawh an CM ten Twitter hmangin an puangzar zung zung mai. 

Tun ang hun 'hmeh keuh era' ah hi chuan khawvel a hmanhmawh tawh a, veng ṭhenkhat Task Force ten positive hmuh chhuah belh an nih vang tih hriat taka dawr hawn rih loh tur tih thuchhuah an siam fel hnu fe a, thuthar han puanzar ve chauh mai te hi a hlui deuh tawh ṭhin. 

Tichuan: Kan boruak thlirin positive hi kan awm belh zel turah ngai ta ila, kan fimkhur zual sauh sauh a ngai. 

State dang aṭanga rawn hawte dem ngawt tur a ni lo. Hei hi an ram, an In leh lo, an lu nghahna hmun a ni alawm, khawiah nge an kal chuan ang? 

Thlawhnaa thlipuiin min nuai ṭuma Mizoram chin kan thlen ve leha ka thla a muanzia kha! Mahni ram chinah chuan a chhe ber pawh lo thleng dawn ila thla a muang tlat tawh. 

Pum lamin ro a rel chang pawhin mahni Ina inthiarna ngei kan rilruah a lian ṭhin a ni ngai e. 

India rama Covid-19 kai enkawl dam pawhin 48% a kai tawh a, dam chhuak tam zawng a sang tial tial, thihpui ngei ngei natna a ni lo ve. Chutih rualin mi tam takin an vanduai pui theih, natna in kai chhawn awlsam tak a ni. 

Kan economy-in a zir miau loh avangin hna kan thawk lo thei lo, partial lockdown bak kan tlin tawh lo. Chuvangin, mahni himna ṭheuh ngai pawimawhin beiseina nen hmalam i thlir zel ang u. 

Kumkhuain hri a leng dawn lo.