POLITICAL PARTY NIHPHUNG

Hun danglam tak a thleng te a nih loh chuan kum 2018 tawp lamah MLA General Election chu kan nei leh dawn a, inthlanpui kan hnaih hian sorkar lai paih tumna boruak hi a sang hle ṭhin.

A thu maia kuthna­thawktute VIP na ram, ‘NLUP hi khawvela development programme ṭha ber a ni’ ti sia hlawhchham na ram, corruption a zung nena pho ro na, eirukna chi hrang hrang a hluar em em si na ram, kawngpui chhia vantlangin hnatlanga an siamna an tih tur reng a ni an tihna ram, hotu ber rum tak taka inhrosakna ramah kan cheng mek a nih hi. Heng vang te leh thil dang tam tak avang te hian Congress Party sorkar pawh hi nin boruak a na hle tawhin a lang. Tunlai hian Party te deuhten Congress ni lo, MNF ni lo sorkar thar siam tumin inhlawm khawm dan an tintuah thawmte a ri ret ret a, eng tak ang zel ang maw?

Pawl thar din hi a duh tan chuan thil harsa lutuk phei zawng a ni lovang. Mahse sorkarna siam thei tur khawpa chak erawh din a harsa hle thung awm e. Mi ṭhahnemngai inti te leh ram hmangaih inti a thil ṭha duhtu niawm takte hian Political party pangngaiah zuang lut duh chiah si lo hian, party thar dina miṭha thlanchhuaha sorkar ṭha siam mai thei tura an inngai ṭhin hi thuneihna atchilh vang mai mai te pawh a ang hle.

Thawh thut Political Party, inkaihhruaina leh kalphung fumfe pawh nei bawk si lo leh hruaitu tur tunge pawh hriat loh leh inchuh chung hi chuan bel keh phuar khawm tui pai thei lo ang chauh an nih duh hmel. A fel nazawng te, a ṭha nazawng te, a thianghlim nazawng te, a ṭawng rum nazawng te, a lehkha thiam nazawngte hi Politics-ah an hmantlak kher chuang lem loh a ni.

Tunah hian Congress leh MNF te hian Unit nung ṭha tak (functioned) 1000 chuang an nei ve ve a, Block pawh 60 chuang nung ṭha tak an nei bawk a, heti chung hian duhtawk mai lovin nasa takin ṭan an la reng a, Unit an din belh a, a hmasawn zawngin an kal reng a ni. Heti chung hian chak loh hlauin nasa takin hma an la char char reng bawk. Chuti lova Unit fumfe pawh nei lo, Block pakhat pawh nei lo insawi phur chawpa Party tenawi nena sorkar ṭha siam tum chu thil theih loh, pialtlepa liluh tum ang chauh a nih duh hmel.

Congress ni lo, MNF pawh ni lo, sorkar tir tum hi chu thil namai lo, satliah lo tak a ni ang. Thiam taka midang sawisel mai hi a har lem lo. Mi ṭha tak niawma mahni inlantirte a har lo,

ṭhat ziktluak erawh a har a, kan sawisel a te tawn hriat zat hi kan hre ve tawh em? Kan sawiselte aiin kan ṭha dawn em? tihte hi kan in enfiah a va ngai em? Midang thuhnuaia awm peih si lo, lalber nih tuma tei tei ho hian rorelna hi chang ta se tun ai hian kan ropui ang em? Mizorama Political Party lian pahnih Indian National Congress leh Mizo National Front te hi an ṭha viau emaw, ṭha lo emaw, he kan ram Political Party ah chuan hun rei tak aṭangin a sur a sa hnuaiah hun harsa tak tak lo paltlang tawh Party pahnih an ni a, heng hi Political Party nihphung chu niawm tak a ni. Kan ram kan vei a, siam ṭhat kan duh tak tak a nih chuan pawn aṭanga bei bei lovin a chhunga luh chilh a siamṭhat tum hi kan tih tur niawm zawk tak a ni. Mi ṭha hlang serafim MLA kan duhthusam sawisel bo hi chatuanin kan nei dawn si lo.

Inthlan dawn apianga rawn pawng hluai ho hian an daih rei lo hle ṭhin a; arbawm hal ang deuhin an alh hluai a, inthlan zawhah an reh leh mai ṭhin a ni.

Third front chungchang hi a ri zeuh zeuh bawk a, an din duh chuan din mai se. Mahse hei hi hria se ka duh, engmah an ang chuang lo ang tih hi. Mahni ṭha inti miin ṭha an tih lutuk lem loh, mahni ropui inti miin ropui an tih lutuk lem loh kan lo ni reng ang tih a hlauhawm. PRISM-te pawh eiruk chhuina kawngah an thawk ṭha kan ti, an ngaihsan awm pawh kan ti. Mahse kan ram rorel khawl ni meuh tur chuan an ṭha kher ang em? Zoram mipui hian kan pawm ang em? tih te ngaihtuah ngun a va ngai em. Mi aia sorkar ṭha siam thei tura kan inngaih lai hian kan siam thei ngut ang em? Nge kawng ngai zawh zel ila, kan ram tan ka ṭangkai zawk ang tihte hi ngaihtuah ngun a va ngai em.

Kan thlirna tlang a zir hian thil hi a ṭha in a ṭha lote pawhin a lang thei awm e. Mahni theihna leh thiamna zawn ṭheuhah rinawm tak leh taima taka thawh hian mi zahawm leh rintlak a lo nih theih mai chauh zawk a ni e.

- Lalthanliana, Salem Veng