Thlai ching tura kan inzirtir dan hi

Sawhthing dah ṭawih hunlai aṭang tawh khan tun thleng hian Mizoramin kan thar chhuah, hralh tham ve deuh ber chu serthlum hi a ni awm asin.

Mizoram sorkar hnuaia thlai chîn lam kaihhnawihten Mizoramah chîn atana ṭha thil chi hrang hrang min zirtir tawh a, tun thlengin engah mah lah chuan kan intodelh loh bakah, ramdang hriat tham khawpa thar chhuah engmah lah chu kan la nei si lo.

Sawhthing kan ching a, a hralhna lamah kan buai kan buai a, sorkar a inrawlh tak tak loh deuh chinah chuan hman ang em ema hralh lama buai a awm ta meuh lo emaw ni. Sawhthing loan kan ti a, eng ruai chu kan ni tak tak lo. Aieng kan ching a, tung kan ching a, sum chang thlai, 'a hlawk' an tih ang hi chu Mizorama loneitute hian kan ching deuh vek tawh em aw tih tur khawpin kan ching nasa ta.

Chîn tur chi hrang hrang kan inhrilh a, 'A hlawk, a hralhna lamah pawh harsatna a awm lo' an tih pawh kan ching ngun tawh a, hlawkpui tak tak erawh kan tam lo hle a, zungṭanga thliah tham chauh an awm ang. Hetianga kan hlawhtlin theih loh chhan ber chu thlai chîn dan tur kan inzirtir dan a fuh tawk loh vang niin ka hria.

Oil palm chîn kan intihhmuh a, oil palm herna pawh kan nei. Oil palm herna hian Mizoram puma oil palm kan thar chhuah chu ni rei loteah a her zo nghal vek thei a, a bak zawng chu her tur nei loin a awm a ni. Kan chîng uar hle emaw kan tih pawh hi hralh chhuah tham tak tak kan ching lo tih a lang reng mai awm e.

Hlawkpui a, a leitute tan pawha lei chakawm khawp a nih theihna tur chuan kan thar hnem a ngai a ni. Chhungkaw sang hnih khat lekin an chîn hi a hmunpuiah chuan eng tham mah a ni lo. Sorkar pawh hian thlai chi hrang hrang ching turin min zirtir lo se la, thlai chîn thiam bik hi ram pum mai hian nei ila, thar chhuak

ṭeuh ila, a leitu turte tan pawha lei tham lawih awm tura kan chîn loh chuan kan thawhrimna rah hi kan seng tak tak thei lo ang.

Mizoram loneitute pawh hian thlai chi hrang hrang leh, keimahni eikhawp tharna tur lek ngaih­tuah lo hian eng thlai emaw bik chîn hi intihhmuh ila, tam tham tak thar nghek mai ila, a leitute tan pawha innghah ngamna khawp kan thar chuan hriat kan hlawh thuai ang a, kan hlawk zawk ang.

- Lallunghnema Hlawnchhing