THIL LO THLENG TUR ATANA INBUATSAIH NACHANG HRIA MIZORAM SORKAR

Kum 26, July 2019 (Zir­tawpni) khan tuna kan Chief Minister Pu Zoramthanga leh a hote chuan Thingdawl Farm tlawhin India rama Ruihhlo enkawlna lian ber leh ṭha ber dinna tur thu a sawi - vawiin hi a kum thumna cham chiah a nih chu. Ruihhlongai enkawlna lian ber chu kan nei ta em tih leh kan thlen chin hre lo mah ila rilru erawh a ti thui hle.

Vanglaini 18, June 2020 chhuakin a tarlan danin Mau/rua chi supply tura Horticulture department-in tender a koha chhànna lutte chu June 16, Thawh­lehni leh ni 17 Nilaini khan enfiah a ni. Tender hi mi pakhat chiahin a chháng a, pawm a ni. Mau chi supply-na atan hian Covid19 hripui leng karah cheng nuai 90 ruahman a ni. Horticul­ture department chuan thuchhuah siamin, "Mau chi leina turin Covid-19 dona tur pawisa a tibuai lo," an ti a nih kha.

Vanglaini chhuak 1/8/2020 ah khan Mizorama mau/raw chi supply-tu tur tender chhángtu chu Growmore Biotech Ltd., Tamil Nadu a ni a, an director chu Dr N Barathi (Chief Minister-in House-ah "an Monu a damlo" a tih kha) a ni. Growmore Biotech Ltd. hian Mizoramah mau/ rua tihchanna hmun (second hardening nursery) an lo nei thlip thlep nia tarlan a ni bawk.

Vanglaini-in Right to Infor­mation Act (RTI) hmanga a zawhna Hor­ticulture department-in a chhan danin, mau/ raw chi supply tur zawnna tender hi Growmore Biotech hian an autho­rised distrubutor F Lalhriat­puii, Ramhlun South hmingin an chháng a nih kha.

Vanglaini July ni 25.2022 (Thawhṭanni) chhuakin a tarlan danin Mizoram sorkar hian Mau/Raw ṭiak lei nan hian cheng nuai 450.14 a hmang tawh a. Khaw hrang hrangah mau/ raw ṭiak 7,16,725 sem a ni tawh bawk.

Kum 2022 hi Mizoram chan­china ruihhlo, a bikin No.4 kan tih ang chi an man tam ber kum a ni. Hetiang taka ruihhlo tawlhruk hluar leh man nasat hi Mizoram chanchinah a la awm lo. A tawlhrutu nia sawi an man tam zawk hi an tawlh ruk tur ruihhlo leina tur bulṭanna nei tur hmel hi an vang thei hle - a phenah awm leh tirtu awm nia ngaihna hi Mizoram mipuiin an nei lian hle.

Ram leh hnam hma­sawn, chang­kang zawkten ruihhlo ngai enkawlna awm lohna hmun leh ram siam an tum laia Mizoram hotupa berin ni 26, July 2019 (Zirtawpni)-a Thingdawl Farm a tlawh ṭuma India rama ruihhlo ngai enkawlna lian ber siam tuma hma a lo la zawk mauh mai hi a mak ngawt asin. Mau chi supply tu tur Horticulture department-in an zawng a, sorkarin mau chi a lei dawn tih hriaa Lengte ramah Mau ṭiak lo nei fel leh thlip thlep an awm ang bawkin.

Heng kan sawi chhan chu thil lo thleng tur atana inbuatsaih lawkna hi tuna kan sorkar hian a nei ṭha hle. Ramin hma a sawnpui leh pui loh chu mipuiin kan hmuin kan hre vek a nih hi.

- C. Lalrochhara