MR bill atan hman phawt ni zawk se
Chief Minister Pu Zoramthanga chuan July ni 25, Thawhṭanni khan Serchhip District Hospital thar sakna kaihhnawih atan sawrkarin cheng vaibelchhe 13 a pek dawn thu Serchhipah a han puang leh ta cher mai a ni âwm a. Mizoram sawrkar sum dinhmun chhiatzia leh Treasury pawh khâr a ngai hial mai thei ni awma sawi huai huai lai a ni nen, a mak viau mai.
MNF press release leh chanchin thara kan lo hmuh danin, Serchhip damdawi in atana Mizoram sawrkarin cheng vaibelchhe 13 a pek tura Chief Minister-in a sawi chu a bul ṭanna tur leh damdawi in thar tur panna kawng leh thawktute quarters sakna tur a nih hmel a.
Serchhip damdawi in thar sakna atan Power Grid Corporation of India chuan cheng vbc. 21 an pe dawn tih kan lo hre tawh ṭhin a. DPR/ project engkim tihfel a ni tawh a, a sakna tur pawh a hmun ngai, tuna damdawi in awmnaah a ni a, chumi mil chuan a sak dan tur ruangâm leh sum pawh an ruahman ngeiin a rinawm.
State sawrkar sum pawt chiam loa damdawi-in sakna tur sum vbc. 21 lai hmuh a ni hi a lawmawm em em a, sum petu PGCI pawh an fakawm.
Chutih laia Chief Minister-in cheng vbc. 21 awm sa bakah cheng vbc. 13 lai pek a nih dawn thu a'n puang leh ta ngawt mai hian ngaih a ti ṭha lo duh ang reng fû; sawrkar sum dinhmun chhiatzia kan sawi sup sup lai a lo ni bawk nen.
Cheng vbc. 13 chu kawng siamna leh 'thawktute quarters' sakna tur tih a ni a. Damdawi in sak hma hauha thawktute quarters sakna tur sum sawi rîk a ni leh nghal mai hian thil hlui min ngaihtuahtir a. MNF sawrkar hmasak laia Referral Hospital sak puitlin hmaa quarters tam tak sak puitlin hmasakte kha mitthlaah a lang uai uai mai!
Tunah hian Mizoram sawrkarin damlote inenkawlna senso an hmuh let tur (MR bill) cheng vbc. 70 vel a pe thei lo mek nia sawi a ni a; ṭhenkhat chu kum khat chuang kal taa bill thehlut tawhte an ni.
Damlo, tam tak chu khawsak harsa tak takte sum hmuh tur ngei ngei pawh a pek theih loh lai leh damdawi in sakna tur cheng vbc. 21 lai a awm sa reng chunga Mizoram sawrkarin cheng vaibelchhe 13 lai pek tur a nei leh mai si hi a mak.
Hei hian Mizoram sawrkar sum dinhmun chhe viau mah se, a duhnaah chuan sum pek tur a nei thei reng tih leh, damlote MR bill hi a ngai pawimawh lo hle tih a tichiang a ni.
Pu Chief Minister duh tak, Serchhip damdawi in sak thar tur kaihhnawiha cheng vbc. 13 pek i tum hi thil hmanhmawhthlak em em a ni lo bawk a, pe rih loin, chu cheng vbc. 13 chu a hmanhmawhthlak zawk health care bill cheng vbc. 70 i bat, ṭhenkhat chu kum khat chuang i batsak tawhte rulh ṭhenna atan hmang rih zawk mai la mipui an va lawm dawn em!
- Zoramchhana