Biak in bula speed breaker a hnawk

Aizawl khawpui main road-ah hian speed breaker a awm meuh lo tih theih a ni a, amaherawhchu Indus­tries directorate office bula Khatla North Pres­byterian Biak in bulah speed breaker pahnih an dah a, lirthei kal vel tan speed a tihmuan phah khawp mai.

India ram hi sakhaw tin zalenna ram a nih angin, Mizoramah pawh sakhaw tin Biak in pawh kan in zahsak em em a, inkhawm kal leh bangte pawh kan lirthei kalhtuten an zahin an tlan muang tlangpui ṭhin. Hei hi chin ṭhanah kan nei a, a lawmawm khawp mai.

Aizawl khawpuiah lirthei a tam a, lirthei pakhat a tlan muan deuh hlek pawhin kan in zui duah duah a, traffic flow a timuang hman zel a. Chutiang bawk chuan Biak in inkhawm kal leh bang an tam chuan traffic chevel pawh a timuang hman a ni.

Chuti chung chuan Khatla North Pres­byterian Biak in bula speed breaker pahnih an dah ngawt mai hian traffic kal vel a timuang em em a, thui tak tak an intlar hman ṭhin a ni. Dan a awm a, speed breaker dahna tur pawh dan ang taka kalpui chi a nih laiin kohhran hi kan dah lal ta lutuk deuh niin a lang. Helai Biak in bula speed breaker dah hi tu thu nge ni ang, dah thianna hmun a ni em? Dah ṭulna bik riau a awm em? Biak in bul a nih vang chauha hetia dah ngawt a nih chuan a dik loh khawp mai.

A thu hrimah kan inkhawm kal leh bang hian traffic an zah lo hi ka ti ṭhin. Kan Sunday dress vang emaw, kan Bible zakzeh vang emaw hian lirthei laka him ta riau nia inngaihna a lian lutuk em ni ang? Lirthei khalhtute an fimkhur hlauh a, hun engemawchen chu inkhawm kal leh bang haw turte'n tawhsual an tawk ta lo niin ka hra. Hei pawh hi a lawmawm takzet a, mahse inkhawm kal leh haw lamte hi fimkhur deuh a ṭhat a rinawm. Lirthei ten mihring kawng kan tur an ken a, an ngaihchan thiam viau lai hian kawng kantute erawh han hmanhmawh deuh a awm ṭhin lo a, ngeiawm lamah an ṭang ṭhin.

Chuvangin, kan in­khawm kal emaw, bang lam emaw kan nih pawhin lirthei kawng ken lamah fimkhur hle a ṭul. Chutiang bawkin main road bika kohhran lian, Chamari Biak in bulah te, Dawrpui Biak in bulah te, Mission Veng Biak in bulah te speed breaker hi dah ve awm tak a nih laiin kohhran lamin kawng enkawltu department lam an ngen lem lo niin a lang.

Thuneitute pawh hian ngaihtuah chian a ṭul khawp mai. Kohhran hi a zahawm rualin an dil ang apiang pek tur a ni bik dawn em ni? Pathianni te, Thawhṭan zan, Thawhleh zan leh Nilaini zanah inkhawm a awm a, a bak inkhawm awm loh pawhin speed breaker vang hian lirthei tlan muan viau a ngai ṭhin a, pisa kai hun leh week days-ah a hnawk viau a ni.

- Lalkhirhvela