'Chauva Isua tlu' tih lai hi

Ni 4 April 2017 khan he huangah hian 'Chauvin a tlu maw? (kei chu ring lo mi ka ni e)' tih thupui hmangin Kristian Hlabu No. 223-na; 'Lalpan min hmangaihna chu' tih hlaa a thunawn 'Lungngaihna thing Kross chu ka tan a pu a, Chauvin a tlu a' tih laia, 'Chauva Isua tlu' tih lai hi Bible thu nena a inmil loh thu ṭanhmuna hmangin Pu F.Aihnuna khan a rawn sawi a. Pathian hla Bible nena a lo enmil thlip thlep hi a fakawm hle. Mahse... kan ti teh ang.

Hla phuahtute hian Zalenna zau tak (poetic licence) an nei tih hi kan hriatsak fo a ṭha. Patea'n 'Ka lawmna tuifinriat angin a liam a' a tiha 'tuifinriat a liam thei lo' ti ṭal loa, a lawmzia sawinaa kan pawmpui ang mai leh, 'Ni tla ngai lo Zion khawpui, Ngaiin ka rum ka ṭap chhun nitinin' tiha 'nitina

ṭah' hi a rinawm hran lo a, mahse a ngaihzia sawi nan kan pawmsak ang nen hian en mil i la. Hla phuahtute'n sawi uarna ṭawngkam (hyperbole) an hman­ah lo pawmsak mai hi a ṭhat a rinawm.

'Bible thu nen a inmil lo alawm' a la tih ṭalh theih a. Mahse, he hla phuahtu hian Bible thu nena inmil chiah chiah phuah a tum kher a rinawm lo! Isua ṭawngkam leh thiltih hlaa kan hmuh ho te hi ngun takin en i la, Bible sawi dan nena inmil chiah chiaha dah theih a nih lohzia chu kan hre tlang ang a, thu pangngaia sawi leh hla thu tura rem luh danglam theihzia chu kan hre fo awm e. He hlaah pawh hian Isua tuarna, kan tan kraws a putna kalkawnga a tuar natzia hla thu tawitea tilang tur chuan hei aia pawm nahawm leh Isua tuarna kalkawng sawifiahtu hi a vang viauin a rinawm.

Isua film hoah mah vawi tam an tluktir a, kan sawisel chuang em ni? Tlu lo se chhawk kha a ngai dawn em ni? Bible thu nena inmil thlip thlep thei nise a duhawm viau rualin, Bible thu tineptu leh tibawrhbang khawpa an la kawi a nih loh chuan, hla phuahtute'n an zalenna thiam taka an hman hi kan hmuh thiam fo a ngai a ni. Vanram la hmu ngai miah loin thlirna tlang (context) hrang hranga kan thlir mah Bible nena a inmil leh mil loh kan en ziah lem lo anga ngaih theih pawh a ṭha tho.

Pathian fakna hla, Bible nena lo enmil ṭhin kan awm hi a thlamuanthlak a, thil lawmawm tak a ni. Kawng tam takah kan kalsual tur pawh a ven ngei a rinawm. Chutih rualin hla phuahtute zalenna, an licence an hman hi kan chhutpui thiam ve fo erawh a ṭha.

Isua tuarna kal­kawng hi hlaah phuah ve dawn ta i la, chauva ka tluktir ve ngei ka ring a ni.

- Rs Zuala Renthlei Leng Khua