PHAI ATANGA LO HAWTE

Ṭhenkhat hi chu kan nata thisen min petu, kan thiha kan ruang rawn thawntu, Mizo welfare leh kohhran mite an ni a, an thawh chhuah hmanga an chhungte rawn chawmtute leh chhungkaw zahawm taka mite pawh an ni ang. Anni hi Mizoram tlin tâwk an dawn mila lawmthu sawi theite an ni a, hetiang mi, Mizo leh Mizoram hmangaihtute hi kan zahin kan chhuang a ni.

Ṭhenkhat ve thung chu an lú meh kawlhsaka kan lo hnawhchhuah tawh, Mizo nih zak, inla Korean, Mizo welfare-ah pawh tel duh lote leh, AIDS vei ngei tura tlang rinte pawh an ni nual mai thei.

Awmpui hna thawka zuk inhlawhte leh game khèla zuk mu nileng ṭhin angte phei hi chuan, he state pachhe takin hripui kan hahpuizia leh, assymptomatic vanga darh thei a ni  tihte hi an hre kher lo vang.

Hri Do Pawl zinga mâwl fál deuh kan awm ang tho hian, lo hawte zingah pawh, mahni ram timualpho zawnga thil thehdarh nachang hre tawk vela fing an awm ve niin a lang. Indem tur chuang kan awm lo. Kan laka an pangchang ngam hi i lawm zawk ang u.

Chutiang mi, kan zah êm êmte leh kan zahpui ngawih ngawih te, màwl vanga thawvengte leh fin vanga thaw ṭha ngam lote chu, voters ID-a Mizoram address nei an nih tawh phawt chuan, báwm khatah an rawn khungkhawm chho ta a nia! Ka lainat ngawt mai. 

Fapa tlanbo pawh ni se hripui vanga mahni Inpui rawn pantu chu, Inpui neitu chan changa lo dawnsawn hi, Pathian leh Mizoram laka kan bat a ni. Inhnar hi Krista rilru a ni lo.

Kan mamawh ber chu inhriatthiam tawnna a ni.