PI LLOYD-I PUAL : PRESTATYN LAMTLUANG
Kum 1999 August ni 21 kha a ni a, Rev. JM Lloyd-a thih hnu lawk a ni. A fanu, Zohmangaihi te in, Derby-a ka riah hnuah a nu, Pi Joan Lloyd-i tlawh turin an nupa-in Prestatyn-ah min hruai a, eng chen nge kan kal ka hre tawh lo. Pi Lloyd-i in chu kan va thleng a, amah chauhin a lo awm a, kan tlawh tur thu an lo hrilh lâwk avangin min lo beisei sa a, Mizorama an rawngbawl lai hre phâk ve lo mah ila, an tan chuan Mizoram leh Mizo hrim hrim hi kan hlu a, kan ram leh a mite hi min ngaina tih a hriat theih. Khaw dang aṭangin a fapa, Zoliana te pafa za pawh an lo kal ve a, chaw chhun kan kil ho. Chumi hnuah chuan kum 2/3 chu kan Zosap la damte kha Mizoram (DIPR) calendar hi ka thawn ṭhin a, an lawm ve hle ṭhin.
Pi Lloyd-i hi a pasal thih hnu-ah kum 18 a dam a, tun kar Ningani chhun (an sanaa) dar 10:40-ah khan Prestatyn bul, Rhyl khuaa Devon Residential Home-ah a lo boral ve ta. Kum 94 lai a ni a, Alzheimer natna-in rei tak a tihbuai hnuah a lo chawl ve ta a ni. Ka tlawh ni chuan a pasal, Pu Lloyd-a thlàn min tlawhpui a, Mizoṭawng a hmang tam thei tawh lo-in ka hria. Pi Lloyd-i hi nu zakzum tak niin an sawi a, a dikin ka hria. A pasal nen pawh Biak In hranah an lawi a, ani
sapṭawng hmanna Kohhranah, a pasal Welsh hmanna-ah. Prestatyn-ah tho hian Pi Puii (Durtlang-a doctor lar tak, Gwyneth P. Roberts) kha tar enkawlna inah a lo awm bawk a, kan va tlawh dawnin Pi Lloyd-i hian phone-in a be hmasa a, 'Gwyneth' tiin a ko tih ka la hria.
Pi Puii chuan kum 83 mi niin a insawi a, Upa Chawngzika nen an pian kum a inangin ka hria a, Upa Chawngzika chuan kum 84 a inti si a, a hnua ka zawh chuan, "E e e..... China ho phei chuan, kan pian hma-in thla kaw chhung, mi nung kan ni tawh an ti asin.. Engah nge kum 84 ka nih loh ang?" a ti! Pi Lloyd-i chu a lo liam ve ta a, an vui hun tur hi an la sawi chiang lo niin Rev. H. Sangkhuma'n min hrilh a, vawiin (Ningani) hian, Pu Lloyd-a thlàn awmna, Prestatyn Kohhran thlanmualah phum a ni dawn niin a sawi. Zosap la dam pawh an tlem ta hle mai a, Mizoram aṭangin rawngbawltu tlem a zawng kan zu nei ve ta thung.
Zosapte hi Mizo-te hian kan ngaihlu a, heta an rawngbawl hun lai leh, khatih laia thil a la harsatzia te, kan hnufualzia leh an inpêkna thûkzia kha a ropui ngawt mai. Famkim lohna tam tak nei ve mah se, rawngbawltu nih an tling a, an haw hnu daiha zu tlawh hian, pitarte hi mahni ngawt hian an lo awm a, kan ngaihtuah danah chuan an lainatawm viau. Mahse Pi Teii te, Pi Puii te, Pi Lloyd-i te kha Mizorama lo haw leh a, Kohhranho enkawlna hnuaia nuamsa leh ngaih pawimawh hlawh zawka an hun tawp thlenga awm turin sawm mah ila, tuman an bengkhawn lo. 'Mi hi an ṭha a, ka hlim khawp mai... Mizoramah kan tih tur kan ti zo tawh, hnawksak mai kan ni tawh ang' an ti zel. Sap hi chu sap an lo ni. Tunah chuan an liam zo a ni titih ta. An ngaihawm e.
- RK Lianzuala