MIHRING SUM HLU KAN NEI EM?

Mihringte hi hlawm hnih, Pathian awm ring Theist/Theism leh Pathian awm ring lo Atheist/Atheism-a ṭhen kan ni a, sakhaw hrang tam tak a awm bawk. Keini hi a percentage zawnga chhutin Kristian rama cheng Kristian kan ni. Kristian tih hming vuah a nih hma hian ringtute, Pathian mite, mi thianghlimte leh kawnga mite tia koh ni ṭhinin AD 40 aṭang khan Antiokei khuaah Kristian tih an lo ni ta a ni. Thil eng emaw ṭulna avanga sakhaw hming ziak a ngaih pawhin Kristian kan inti ṭhin.

Pathian Awm Ringlotu Ka Tawng

1976-1977 khan Kawlnithanga YPSM (Young people's sergeant major) Ramhlun te inah ka thleng zauh zauh a, ṭum khat chu thingtlang aṭangin a pa a lo awm ve a, pa fel leh vengva tak a ni a, sawi tur a hria a; keini ang chuan kan kawm pha lo mahin ka hria. "Ka pu, eng kohhran nge i nih?" ka'n tih chuan, "Roman Catholic ah ka awm," a ti a; "Eng ngati nge? I fapa hi Salvation Army-ah a awm si," ka'n ti leh a, ani chuan, "Salvation Army hi naupang ṭhanlen nan ka duh ber vang a ni e, Pathian awm ka rin vang a ni lo," tiin min chhang leh ta a. Kei chuan, "Pathian awm ring si lo, eng ngati nge kohhranah i awm?" ka'n ti leh a, "Mizoramah te chuan Kristian nih hi rual pawlna a ni a, ka awm mai a ni; Pathian awm ka rin vang a ni lo," a ti leh mai a.

Kei chuan, "Pathian awm rinna hi finna a ni asin, USA te, UK te pawh hi Pathian awm ring an ni a, khawvela mi fing leh ram ropui an nih hi," ka'n tih chuan ani chuan, "E! I hre lo a nih chu; Pathian awm ring lo se la, tun ai hian an fingin, an ropui zawk daih ang chu, Pathian awm lo pui awma rinna hi min timawltu a ni a lawm," a ti thên a, ka nuihsan ta mai mai a.

Jan 1986 khan ICO London-a training turin ka kal a, thil ṭul buaipuiin Kolkatta Red Seal-ah ni thum lai ka cham a, sapho an thleng ve bawk a, min ngaihsak loh em avangin tûk khat chu sitting roomah an bulah 

ṭhuin an lo kalna ram te, eng kohhran nge an nih tihte ka zawt kual hlawm a, anni chuan, "Kohhranah kan awm lo, Kristian kan ni ve lo," tiin min chhang a, "Chu, vanramah in kal dawn lo a ni maw?" ka'n tih chuan, "Vanram aiin hremhmun a nuam zawk daih ang chu, mi an tam zawk ang a; car pawh a tam zawk ang," tiin min chhang a, ka sawipui zui duh ta bik lova. Hengho hi Pathian awm ring lo ka hmuh vawi hnihna an ni a, Israel tlangval pakhat a lo tel ve a, thla ka lakpui a, amah hi hmaichhana Israel ka hmuh hmasak ber a ni bawk.

                Mihring Sum Hlu Chu Eng Nge Ni?

Kan Pi Pute ro leh ngaihpawimawhte chu in leh lo te, mahni intodelh te, tu leh fate an ni ber a, tunlai angin pawisa hi rohluah an dah ve lêm lo. A hunlai leh tun thleng pawha lal ropui, hausa leh fing Solomona chuan, "Mihring sum hlu chu Taimak a ni," (Tf 12:27) tih chiang takin min hrilh. He mihring sum hlu hi a bik takin kan tun hun atan hian a pawimawh zual hlein a lang. Tunah hian hripuiin min nuai mek avangin kan hmaah ṭâmna chhumpui thim chhah takin min hmuak mek a ni a, chu chu taimakna, thawhrimna nena kan paltlang a ngai dawn a ni. Mihring sum hlu kawl apiangte'n he ṭâmna thim chhah tak hi an paltlang thei dawn chauh a ni.

Pathianin a anpuia mihring a siam khan taima tura a duh avangin hnathawhna hmun huanah a dah a, rim taka eitur thawkchhuak turin thu a pe bawk (Gen 2:8; 3:17-19).Isua chuan, "Hnathawktu chu hlawh hmu tlak a ni," a ti a (Luka 10:7), Paul-a pawhin hnathawh a ngaihpawimawhzia tihlan nan, "Tu pawhin hna a thawh duhloh chuan ei pawh ei suh se," a ti hmiah mai (II Thes 3:10). 'Mizote hi hnam thatchhia kan ni ngai lo' tiin sawi a ni ṭhin a, tunah chuan hnam taima tih tur chu kan ni hauh si lo. Bible duh loh zawng takin taimak kawngah kan thatchhe ta ni berin a lang a, a pawi khawp mai, thawh harh a hun ta.

                Pûr Phur Hnam Kan Ni

Kan pi pu, nu leh pate hlauh ber chu pur phurh a ni. Tunah chuan Punjab leh Haryana etc... aṭangin a trip trip kum tin pur kan chaw ta reng mai a, a mualphothlak hle. Pur chaw state a Chief Minister, Minister nihte chu a inchhuan viau theih loh hmel a, hei hi a bo theih nan Sawrkar leh mipuite kan ṭhanharh a ngai tak tak ta; Kristian ram kan ni lehnghal! Pur chaw ram aṭanga Chanchin Ṭha hril chu kan thu leh hla miin awih har an tih pawhin a mawh lo viau mai thei a ni. Chuvangin ei leh bar lama kan intodelh hle loh chuan, tuna hnam tê nau zawka kan ngaihte hian min chhuk en thuai mai dawn a ni.

Pu Phunthanga'n kan khuaa pûr a rawn châwk 

ṭumin, "A malpui lian zawkin buhzem pawnah buara ip kan keu a, a malpui te zawk zem chhungah a awm a," tia a sawi leh Pu James Dokhuma'n a chhungte hnenah, "Kha, banga inzep kha (ration card) kan chhungkaw buhzem a nih kha," a tihte chu ka hre reng ṭhin. Heng thilte hi a bo vek theih nan, taimak kawngah i thatchhe lo hram ang u.

Tahreuh 

Mautam ṭam te, ram buai ṭamte harsa taka kan paltlang hnu pawh a, kan harh zo lo hi chu a pawi thui dawn chauh a ni. Tunah hian Covid-19 avangin ṭampuiin min nuai ṭan mek a, hei hi buh leh bal thar tam nan, taimakna kawngpui zawh nan leh buhzem tihlenna lama harh phah nan hmang ila, Pathian leh kan hnam chu a va lawm dawn tak em! Harsatna hi taima tan thil thar hmuhchhuahna a nih laiin mi thatchhe tan chuan beidawnna ruama min hnuk luttu a ni tlat mai. Chuvangin, kan pute'n an hmanraw tahhriam nan tahreuh an hmang ang khan keini pawhin harsatna hi intahhriam nana hmangin, ram leh hnam dinchhuahpui nan hman tum ṭheuh ila, a ropui ngawt ang.