CSS RELEASE ZARAH RIT PHUR KAN IN CHHAWK TAWN A NI BER E

Hna ṭha taka thawk tur chuan hnathawh man a thawktu a hun takah pek an ngai. Mahni hlawhfate pawh hi hlawh pek ṭhat loh chuan an nawr ngam loh. CSS hnuai a hnathawh kha a nuam vak lo ṭhin a, bill hmu ṭha lo sawi tur an awm thluah a ni.

Kan hre tawh a, PMGSY hnuaia contractor-te dinhmun kha... Anni hi chuan zualkona tur ṭha tak an la nei a, an bill thleng hi pek an nih loh chuan Mizoram sawrkar hi PMGSY hnuaiah black list theih an ni. PMGSY hi titawp mahse, a hming thlakin emaw thingtlang khua kal pawhna tur scheme hi a awm leh tho dawn a, fund lo dawn ve kha a khirh tawh viau ang.

Anni ni lo zualkona tur nei ve lo an awm a, engzat chiah nge an nih sawi thei lo mah i la hlawm hnih hi sawi teh ang.

1. NEDP sum bang hmanga hnathawktute: NEDP hnuai kan tih hian a department changtu chu UD&PA an ni a, a hna changtute hi Party worker hah zual Hnam Run lama mi ṭangkai GS rual te pawh an awm. District khawpui leh Aizawl khawpui a ke a kalna tur dawh kan hmuh ho hi NEDP sum hmanga siam a ni fur hlawm a, a hna tam tak hi 2021 a an thawh zawh tawh te an ni. An bill hi K Deposit sak an ni a, an bill hi a vannei tlemte bak ni lo chuan an la hmu lo.

UD&PA hnuaia NEDP sum hmanga hnathawktute hi pawisa puk chawpa thawkte an ni nawk a, hna hmu hmasa... Pu Zoram­thanga'n "Congress chaw ṭhing ei bang mai mai kan la hmang" a tih a hnathawh kha a ni. A buaithlak lai ber chu CSS fund ni ve lo NEDP sum hi khawi aṭanga pek tur nge ni ve ta ang. He bill hi damchhung lung in tang tur ang mai a ni a, a thawktute pawh a bill pechhuak lovin anmahni pawisa security deposit zawk te pekchhuah an ni.

NEDP pawisa bang hi vaibelchhe 1500 vel zet nia sawi a ni a, an bill tang ta char char hi engzat chiah nge nih ang aw... tih hi ngaihtuah tham tak a ni. Financial Year hnih chu a tang tlang ta chu a ni phawt a, a thawktu zinga ka hriat zinga 95% zet chuan bill an la hmu lo a, contract thawh sim ta hmak te pawh an awm a ni. A la chamban tam viau chuan rulh hunah treasury a thawl duh khawp ang. CSS release ai mah hian kan treasury hian a thawl phah maithei a ni.

Ramri kawng laihna: He bill hi chu nuai 1700/- vel chauh a ni. Thla tir lama tam kan tih leh thla tawp lama tam kan tih hi a inzat lo a, sawrkar sum bawm thawl em em tan chuan a tam viau maithei thung.

Anni hi Assam nena kan buai kai vela "Hnam pasalṭha an ni" kan tihho kha an ni a, an a hun laia an ṭhahnemngaihna hlut em em... Mizoram sawrkar pawhin lawmthu an hrilh te kha an ni. Tunah chuan an ramri laihna bill an lak theih loh avanga JCB loan rul thei lote an awm chho mek. CSS fund kawl tan kha release ni lo se la chuan an bill pawh sunction a ni vek tawh a, K. Deposit ni mang si lovin an bill break hi CSS fund release hian a rawn tlawh sak a ni.

Kamrul-a te, Zoram­chhana te bill pawh tunah meuh chuan a tlang thei ta bik lo a, CSS fund Jail tang reng mai erawh vaibelchhe telin a chhuak ta a ni. Kawng ṭhenkhatah chuan 'rit phur in chhawk tawn' a thleng a ni ber e.

Kan sum dinhmunah hian chiang viau kan awm rih lo a ang... Mizoram Finance Commissioner pawhin "Kan dinhmun chiah kan la hre lo" a ti tlat mai a, i lo chiang viau rih lo phawt mai teh ang.

- Zmp Tlau