AMC hian engnge min thlen?

AMC a lo awm a, man neia bawlhhlawh kan paih ta hi a ṭha ka ti a, mahse AMC lam hian awmze neiin kan bawlhhlawh paihte hi an sawngbawl si lo lai hi a pawi ka ti thung. Bawlhhlawh paihna hmunah opposition party lam kha an zu kal ni khan ka hria a, awmze neiin kan bawlhhlawh te hi thliar hran a ni tlat lo.

Chumi awmzia chu AMC hian bawlh­hlawh paih man te tisangin mipuiah pawisa an khawn belh theihna remchang an zawng a, bawlhhlawh paih man tihsanna remchangah chiah bawlhhlawh kha min thliar hran tir a ni mai. Anmahni ber hian awmze neiin an sawngbawl peih chuang miah lo.

Zuk leh hmuan thil ṭul lo taka pawisa kan seng ral ang chiah hian bawlhhlawh thliar hran a nih hnua AMC a pawisa kan chawi zat lo pung ta pawh hi thil awmze nei lo, AMC sum tuakna mai a ni e.

Kan ram lui alo thianghlim zawk nan leh kan khawlai fai nana khawtlang hruaitute'n bawlh­hlawh bawm thler tina an han dah ta te hi a lawmawm a. Mahni in leh a vel ṭheuh hi tifai zel bawk ila, AMC emaw tu emaw ten min nawr luih vang ni lo hian Mizote hian fai leh thianghlim hi i zir ve hrim hrim bawk teh ang u.

AMC kan mawh­puh rual hian mipuite pawh kan bang bik lo. Kan kawt kawng chhe lai te reuh te hi sawrkar siam hun nghah kher a ngai lo a, kan siam ve thei vek a ni. Keini aia ram rethei zawk Myanmar-ah ka zin tawh, an kawngpui te pawh sorkarin a siam loh chuan mipuiin pawisa an thawh khawm a, an siam vat mai zel a ni. Kan va tluk lo em. Cement leh balu, rora tlem nen ni tumbung tha pawh sen a ngai miah lo, kan kawng chhe lai te te te hi hnawh ping zel ang u, a chhawrtu chu keimahni bawk kan ni. Khua leh tui ṭha tih tur a ni bawk.

Chuan, Aizawlah AMC a awm hnua kan hmasawnna ka teh ṭhin a. Veng chhung tuichhe paihna kawr leh step vel chei a siam ṭhat ngai lai siam a, rawng hnawih leh AMC fakna ziah hi kan hmasawnna lian ber ni ta in ka hria.

Hetiang thil langsar leh holam lutuk buaipuitu atan chuan AMC hi a lian mah mah a ni. Sorkar hnuai ni loa direct a fund nei thei thil tih atan chuan a holam lutuk tlat a ni.

AMC chuan ram ro tling infrastructure kan neih theih nan te hma la in hna lian tham te thawk se. Free wifi leh thil holam langsar si buaipuia term hmang zo leh tur chuan ka ui a ni.

Lunglei-ah pawh sawn AMC an indin dawn nia sawi a awm a, hei pawh hi thil ṭul lo tak a ni. Aizawla AMC ang chauha an function leh chuan Lunglei khawpuiin hma a sawn lo ang a, an chawk buai ve vek zawk ang.

- Lal Pekhlua