In satu apiangin lirthei dahna an siamna tur Dan sorkar hian siam rawh se

Mizoram khawpui ber Aizawl chu kum tam tak chhung kawng­puia lirthei tawt lutuk avangin kan buai ta a. Sawrkar kan hrawn tawh leh hrawn mekte pawhin lirthei tawt tih ziaawm tumin hma han la bawk mahse awmzia a la nei lo a nih hi. 

Lirthei tawt tih zia­awm nan in tlan chhawk te, lirthei neituin lirthei dahna hmun (garage) neih tur titea hmalak a ni a. In tlan chhawk hian lirthei a tipung a, mi tam takin an lirthei tlan loh nia hman tur lirthei dang an lei belh tlat a ni. 

Lirthei dahna neih tur tih te pawh hi Local Council hnenah finfiahna lehkha lak theih a ni a, an nin an en dik vek theih loh bakah mahni hmun lo pawh kawh mai theih a nih avangin hei hian lirthei tawt a ti ziaawm em em lo niin a lang. Engtin nge kan tih tak ang? 

In sak dan aṭang­in bul ṭan a ngai: Ai­zawl-a lirthei tawt tiziaawm turin sawr­karin PAHOSS (Parking House Support Scheme) kaltlangin lirthei dahna in satute ṭan­pui bawk mahse hei hian min chhawk zo dawnin a lang lo. Kan kawng kamte hian eng tikah mah lirthei dahna thawl tak min dawl zo dawnin a lang lo bawk. 

Chuvang chuan lirthei luh theihna hmuna in satu apiangin an in sak len dan mil zelin lirthei dahna hmun an zuah telna tur dan siam a ṭulin a lang. 

Entir nan, ‘In chhawng khat, a dung leh vanga feet 32 a lian sa tur chuan feet 12 tal chu lirthei dahnaa hman theih tur a siam tel tur a ni’ tiin. 

Mi tam takchuan tuna lirthei kan neih rih loh avang maiin in kan sakin lirthei dahna tur kan hisap lo a, an in luahtute lirthei dahna tur pawh a awm lo a, min tibuai a ni.  

Sawrkar hian lirthei luhna hmun leh la luh theihna tur hmuna in sa apiang chu lirthei dahna an siam tel ngeina tur dan siam se. 

Mi ṭhen­khat, bazar leh dawr hmun atana rem deuh in neite chuan lirthei dahna atan kher hmang loin luah pangngai atan emaw dawrah te pawh an hmang thei ang. 

Kan sawrkar kal danah khawpui thawl zawnga hmalakna a la tlem em avang hian lirthei tawt hi kan la buai­pui zel dawnin a lang. 

Khawpui helna kawng siam pawhin roreltute ngaihtuahna a luah zo rih lo. Lirthei nei thar tur ni loin in sa thar tur apiang lakah hmalak ni zawk se khawpuia lirthei tawt hi a ziaawm mahna. 

Aizawl khawpui chauh ni loin kan Zorama khaw lian dang­ah te pawh kei­mahni zawkin hma­thlir neia kan khawpui leh kan ram hi thunun kan tum a hun takzet a ni.