Mizo ṭawng leh hnam dang ṭawng

PROGRAMME

Mi tam tak chuan 'programme' an han lam hian 'a' lai tak hi Mizoṭawnga 'e' riin 'prokrem' tiin an ‘e' ta ṭhin a. AIR leh Local channel a thupuangtu ṭhenkhat paw’n an ti 'e'.

BBC/ CNN leh English TV channel-a thupuangtu leh English dik takte hi chuan 'a' lai tak hi Mizo hawrawpa 'a' ria lamin Beram (sheep) kan lama 'ram' lai tak angin an lam ri.

Chutiang bawkin 'bandh' pawh hi vaiṭawng aṭanga kan lak, kan ṭawng anga kan hman tawh a ni. i.e. Total bandh vangin ka rawn kal thei lo. Hei pawh hi a chunga programme lam rik ang thova 'a' lai tak hi Mizo hawrawpa 'a' ri anga lam tur a ni.

Tin, Chairman, demand, cash leh thank you te-ah erawh chuan 'a' lai tak hi Mizo hawrawpa 'e' ria lam tur an ni. Tuna ka rawn sawi hi English a ni a, Wales ho English lam dan ka sawi lo. Thil mak deuh chu 'surrender' hi tam tak chuan 'salender' tiin zuk lam a! A tlangpuiin ‘salender' ti ho hi chu Matric hnuailam an ni duh khawp mai.

MIZO LEH VAI

Vai hovin Mizo ṭawng a thiam leh thiam lo chung chung leh pai takin mi han bia a. Keini lah chuan thiam lo leh pai taka a hman chu lo copy-in kan han be ve a i.e. “Nangmah chuan keima sawi ngai rawh mawle. Nangmah chu maw… pi hnenah kal la maw, pu in amah chu pu phone-in rawn be rawh pu-in ti va ti rawh. Nakin ni lo tunah kal nghal rawh, phata phat. Nangmah chu keima ṭawng hre thiam maw?” te kan han ti. Hetiang a nih chuan an tan Mizo ṭawng thiam chu a har viau ang.

Ṭum khat chu kan state legislative assem­bly session TV-ah ka lo thlir ve a, member-ten thusawi an inchuh laiin Pu Harikristo Chakma khan rawn sawi ve a tum laiin Pu Vaivenga khan speaker chair aṭang khan “Nangmah chu tam tak sawi tawh maw le” a han ti chuh member dangte kha an nui hak.

Sap leh vai, Meitei te thleng hian an ṭawnga thiam lo chung chunga kan han biak changin kan ṭawng dan angin mi be let ve ngai lo. Chu ai mahin an ṭawng dik takin min be zawk ṭhin.

- Lala Khobung Luangmual vengthlang, Aizawl