KHAWVEL THAR

March 20, 2020 hma lam kha chuan USA aṭanga lo haw hlim nih te, London-a kal tur nih te a nuam a, kan intihtheih pui deuh a, ram thianghlim fang tura inbuatsaih mek nih te pawh ṭhiante zingah sawi a nuam hle. Mahse, March 20 a ral meuh chuan foreign aṭanga lo haw hlim nih te, kal tum mek nihte chu a nuam ta hauh lo.

 

COVID-19 vang

Khawvel thiamna san tawhzia te hahipin kan sawiin kan hria a, thlaah te kan inkap kaiin sikeisena pem hial tumte pawh science khawvel aṭang chuan an awm ṭan tawh a, khawvel sorkar hrang hrang ten ralthuam an neih ṭhatzia te kan hre tlang a. Damdawi thiamna leh science khawvel aṭang phei chuan clone an ti a, beram pa kha inang reng an siam chhuak thei a, mihring pawh siam an tum mek a, chutiang khawvela thiamna sang tak nena kan hawi lai chuan Covid-19 an ti ta thut a. 

Hritlang natna chi khat, keini Mizote phei chuan hritlangte chu mutpui turah kan ruat lo va, hnathawh ṭhulhna thamah kan ngai hek lo, “Hritlang te zawng, kan paldam mai mai alawm” kan ti ṭhin a ni ngai a. Covid-19 hritlang natna chi khat chu khawvel pumah a darh a, mihring thiamna te chuan a ngaihna an hre lo va, changkanna khawvel kal muah muah lai chu a tawp a, a ding ta ruau mai a nih hi.

Khawvelina ngaihna a hre lo!

Khawvelah natna ṭih­baiawm tak, Covid-19 a leng mek a, khawvelin a ngaihna a hre lo! Khawvel ke chheh a buai a, khawvel hi a tawp a, khawvel thar a inṭan ta. March 2020 hma lam kha chuan khawvel ram hrang hranga chengte kan in tlawhpawh zung zung a, engkim kan eiin ka in ho va, mahse Covid-19 in khawvel a rawn tuam hnu hi chuan ram hrang hrang te chu la inbe pawh reng mah ila chen ho a rem ta lo. Mahni ramah, mahni khuaah khawvel thar siam turin kan haw khawm ta zung zung mai a nih hi. 

March 2020 hma lama khawvel ang kha engtikah nge a her chhuah leh ang tih hi ngaihtuahna tibuai tham a lo ni ta. Ram hrang hrangte an inkharkhip a, inkharkhip hi hawn/ hlih a nih hunah pawh a hma anga zalen leh engthawl khan khawvel hi a kal leh thei ang em? Khawvelin a ngaihna a hre lo. 

Ram thar

Covid-19 vangin khawvel a inkharkhip a, khawvel ram hrang hranga chengten mahni ram an ngai thar a, mahni ramah zalenna, damna a awmin an hria a, an awmna hmun aṭangin an pianna an rama haw turin ke an chhep a, an pan khawm mek. 

Hmun hrang hranga chengten mahni ram ṭheuh an thlen kim hunah khawvel hi engtin zel nge ni ang? Kan ram ṭheuh hi ram thar/khawvel thar a ni dawn a ni.

I pianna ram

Covid-19 vangin ngaih­tuahna thar a piang a, ‘Nangmah, mahni hmunah kei ka hmunah’ tih chu a takin kan tawng mek a, ‘I pianna ramah kir leh rawh’ tih chu a takin a lo thleng mek a ni. 

Keini Mizote pawh hmun hrang hranga awmten Mizo­ram an rawn pan khawm a, Mizoramin a tawn ngai loh a tawng mek a, mi leh sa kan inkhawm mek a ni. I pianna ram hian a tana i tih theih sang ber ti turin a phut che a, i pianna ram tan hian eng nge i tih dawn? 

Hri hlauhawmi hmanga ṭangkai ang

Hri hlauhawm leng avang­in khawvel a talbuai a, khaw­vel dang an ngaihtuah thei lo va, hnam tinin anmahni ram bik tan ke an pen a, ṭan an la mek a. Chu chu vawiina kan hun tawn mek hi a ni. 

Hetih lai hian engtin nge Mizoram hi ram intodelh a lo nih ve theih ang a, Mizo hnam hi hnam zahawm, hnam awhawm, hnam ding chhuak kan lo nih ang? Tun hi hun pawimawh a ni a, bul kan ṭan fuha kan rah dik chuan kan ding chhuak ngei ang. A phawvuaka hawi liam mai mai lovin, ngaihtuahna fim tak nen kan ram leh hnam tan ke i pen ang u. 

Kan tih theih hmasa

Tun thleng hian (May 2020 thleng hian) India ram state hrang hrang zingah Covid-19 hri kai awm lohna awmchhun kan la ni a, kan vannei hle a ni; bang lovin Pathian hnenah lawmthu i sawi ang u. 

Chutih rual chuan kan ram leh hnam hian hma a lo sawn a, kan ke pen a dik theih nan tih tur kan nei a, intodelh tura ke kan pen a ngai a ni. 

Ei leh ina intodelh hi changkanna hmahruai a ni a, chutiang ti tur chuan theihna kan nei. Aizawl pa in chung zawlah hian a in luahte nena an ei khawp a thar chhuah theih. Phai lam aṭanga kan ei tur châwk luh ṭhinte bansanin, kan eitur i thar chhuak ang u. He kalkawng hi hrehawm chhete tuarin a zawh theih a, kan hlawhtlinpui thei a ni. 

Khawvel thar rawn piang mek hian Mizoram leh hnam pawh a pianchhuah pui mek a, ram leh hnam ding chhuak kan nih ngei theih nan ṭan la ila, puitling chaw barh ngai ni lovin, mikhualte nena ei tur pawh thawk chhuak ṭhin ni turin hma i la ang u. 

Tun hun hi kan ram leh hnam tan hun ṭha, hun rangkachak a ni e.