INKHUNG ANG U!

India ram map-a Mizoram tih sen bik leh tih var bik hmanga Covid-19 laka kan fihlim chhinchhiahna chu, June 2, 2020 zanlai khan chawh chhiat a lo ngai ve ta a, kan ui vawng vawng hlawm a nih ber hi. 

Hetiang dinhmuna kan awm chhan ber phâia awm lo hawte sawi chhuak ngam chiah si lovin, mi tam tak chuan kan rilruin kan dem deuh ut ut reng mai. "An ni vang kher kher..." kan ti a, kan rilru a hnual a ni. Chutah kan sorkar kan dem leh dawn dawn a, eng mah tak tak han indem chhuah tur a awm chuang si lo - a manganthlak teh e. 

Mi 12 zet mai posi­tive kan inhmuh chhuah tûka TF duty han nih chu a chhangchhiatthlak teh e. Kan post-ah leh tuala kan round-naah mi eng emaw zâtin min fin chhuah tumin min bawm deuh reng a ni ber mai. Hetianga pawn lama min bawmtute hian, sorkhar-in in­khuah­khirpna dan hi hei aia kal strict-pui thut tura an duh thu leh, TF lam te pawh strict thar thut tura min duh thu an thupui ber. A mang­anthlak duh kher mai. 

Chutiang an duh a nih te chuan, a chhuak cheh chehah te ṭang loin, sorkhar thu nghak kher loin tawm im mai se ṭha mai tur hi a nia. Tu mahin chhuak turin kan nawr lui si lo va... 

Sorkharina min khuahkhirh (total lock down/ curfew) kha chu a hahthlak, tu mahin kan zo lo, kan phunnawi sup sup a ni. Hawh u, sorkharin min dan chêp nghak kher tawh loin, thil awmzia kan hriat vek tawh angin chhung tinte mahni duh thuin, zalen takin i han inkhung hlawm tak tak teh ang u. 

Chhungkaw aiawh aṭanga pakhat leh mimal pawimawh em emna bîlah chiah hahdam takin chhuak leh zauh ṭhin ila. Social distancing leh mask vuah ngai pawimawh ila, inlèn pawh mai mai lo bawk ila kan him em em ang. 

Tak takah chuan, ram pawn aṭanga mikhual leh thil lak luhah kan fimkhur a, eng vang teh ngawtin nge he hripui hian min bual ngawt ang ni? A vei leh rinhlelhawmte kan in khung hrang zel bawk si a, han hlauhthàwn em em tur a awm hran lo. Chuti chunga min rawn luh chilh vak tho tho a nih chuan, a ngaihna a awm lo a ni tawh mai. 

Ram changkang ber berte pawhin a tih vak ngaihna an hriat loh hi, keini mawl vanga ILP-ina a hum hram hramate tan phei chuan harsa leh zual deuh asin a nih. 

Ei tur leh mamawh dang lah kan intodelh loh avangin, state dang aṭanga lak luh reng a ngai a, a buaithlak a nih hi. Fimkhur ila, i ṭawngṭai mawlh mawlh mai teh ang u khai.