Kawngpui laih chhiat
Tlem lai deuh aṭang khan Aizawl khawpui thli hi hmun khata luan khawm tira sawngbawl turin hmalakna lian tak a awm a, SIPMIU hmalaknain kawngpuiah pipe lian tak tak an phum a, hei hi an sawi dan chuan Aizawl khawpui thlir luan khawmna tur a ni. A tawpah Chite lui kamah an sawngbawl ang a, an thlifim dawn a ni awm e.
Keini ang duang, chhiar zau vak lo chuan zawhna kan nei nghal pang a, hei hi mithiam leh hre zawkte’n min chhan sak se ka ti khawp mai.
1. Kawngpuia pipe phum hi kawng chhak lama mite thli luanna atan chuan a ṭhat ka ring a, kawngpui thlang lama cheng, pipe an phumna aia hniama awmte thli hi engtin nge a luan ve ang?
2. Kawngpui an lai khuar a, pipe an phum a, heti a nih chuan kawng hi a sa khat tawh lova, a hnuai a kawrawng tawh tihna a ni. Ṭawng thu chhe loah lirnghing lo thleng ta se, kan pipe-te hi lo khiin emaw lo bung ta se, kan khawlai hi a uih hum hum mai dawn tihna a ni em?
3. Kan thli sawngbawl dan hi chu tlang ram kan nih avang hian a la chhe vak lovin ka lo hria a, ek paihna hmun hi ṭha tak siam se, septic tank khat hi chu thianfai zung zung mai se a ṭha tawk lek lo em ni?
4. Vairam phai pheia ṭha leh ṭangkai pipe phuma khawpui thli luantir hi Mizoramah hian a takin a hman ve theih ang em? Project a lian si a, sum a tam si a, lo neih ve loh kha a uiawm avangin phaia hman tur model kan lo khar chhawng ve lek a nih chuan a pawi dawn a, tuna mi hi tlang ram mila mithiamte duan a lo ni zawk reng em?
Heng zawhna te hi thuneitu lam emaw, engineer lam emaw, a chinchang hre chin khan min chhang thei se. TV-a advertisement tawi te te hmanga an sawi hi ka fiah ve meuh lova, kei ang bawka chiang lo leh kei aia chiang lo lehzual hi kan ṭhenawmah pawh an la tam teh a ni.
- Lalremmawia, Bethlehem Vengthlang