KA NUIH A ZA VE TLAT LO!

Zohnahthlak unaute hi tlang leh mual hrang hranga cheng kan ni hlawm a, a ṭhen khawpuiah kan awm a, thingtlang lamah kan awm bawk. 

Kan ṭawng lam rik dan leh tihdan phung inang vek lo lai hi tunlai chu fiamthu thawh nan lek lek a hman kan ching chho ta hi kei chu ka nuih a ti za ve tlat lo nia! Eng dang a ni lo, kan tih dan te kha dik bik tlat a kan pawm vang mai a ni. 

Khawvela ṭawng kan hman tlanglawn ber English/ sap ṭawngah hian thumal eng zat nge awm? tiin inzawt ta ila, chhanna dik leh bulfuk tak a awm thei lo ang hian, chhim lam emaw hmar lama awm te hian tihdan phung inang lo kan neih lai hi inpawm tawn a, inzah sak tawn a ṭul hle niin a lang. 

Social media-ah fiamthu ti tak deuha thingtlang leh khawpui nun dan leh an thil ei leh in te tehkhin a, thing­tlang mite hmusit deuh taka tarlang ṭhin te hi Aizawla piang leh seilian an ni ngai lovin ka hria. 

Insuihkhawm leh zai i rel ang u tih hla te hi kurpui dup dup ṭhin mah ila, keimahni Zofate ngei hian kan khaw tihdan emaw bik dik bera ngaihna kan paih bo hmasak a, kan tihdan phung leh ṭawng ri te a inan lohna lai tak hi Zofate kan ropuina a ni zawk tih kan hriat thar hma loh chuan insuihkhawm hi a awlai lo ngawt ang. 

Thinlunga i pawm theih lo chu i hnaih ngai lovang.