Mipui Tan Rawn Zarkawt BCA In MSL A Awp - 4 'Peat!

July ni 16 zan khan R. Dengṭhuama Hall panin lirthei an inzui duah duah a, traffic a jam hial! Aizawl mipui, a bikin ṭhalai an phur a, hall leng lo mihring an pungkhawm - boruak a pui hle. Inkhel hmuhnawm tak karah Zarkawt BCA in Khatla TBL an hneh a, MSL season 7 champion an ni zui. Champion team hi Zarkawt kawnah ruah sur karah mipui pungkhawmin an lo hmuak hial. Ṭum li a zawna (4 'peat) champion thei hi khawvel huap pawhin hriat tur a vâng pharh.

Ṭhalai ngaihsan zawng

Kan hawina leh thlekna lam a zirin sawisel tur leh fak zui tham hi an lo kuh tul zel. A vei lam ringawt hmuh chat chat a, sawi pawr luai luai aiin ding lama fak tlak vâl rual te lam kan sawi ang. Ni e, Mizoram Super League (MSL) season 7-na hmawrbawk zana final (game 3) en tura pungkhawm te kha zan dar 8:30 a inkhel ṭan hun hma darkar khat a la awmin hall-ah an khat hmur tawh nia - ṭhutna leh dinna a awm tawh lo! Mahni hnampui ngaihsan leh ngaihven nachang hria Aizawlah hian an va tam em.

Infiammite thawhrimna leh insum theihna hmuh hmaih ngai lo kha ti zat a hmun ngeia pungkhawm leh TV aṭanga entu sang rualte ngaihhlut zawng (value system) khan he hnam hmabak thim pik bik lohzia a lantir tih kan sawi ngam sak e. Hlemhletna leh thamna thim tham hnuaia bawlhlo bawlhhlawh hmanga buaipui ṭhin te hi an liam zel ang - chuti ang mi chu he khawpui hian a ngainep tih kha mi zan khan kan hmu e.

BCA Rorelna, MSL

Mimal ṭha ringawt aiin team inrelbawlna tha in a nghawng chhuah chu champion trophy - chu chu a zawna MSL tum li champion thei BCA club hian a tarlang nawn e. He club hi Zarkawt pa hlun, Pu Biakchhunga (L) hriat rengna atana a chhungten kum 2010 a an din a ni a. Awmze nei leh hmathlir thui tak neiin, ṭhalai tân an sum an thap a, chumi rah chu hmuh a va'n nuam ve le. Mi inpe te hian ṭhalai talent upbo a awm tur an chhanchhuak a, chutiang mihring club mahni lam insengso a din ṭhinte hi an va hlu em - anni hi awm lo se kan ṭhalai tam tak hi an zuzi ngei ang!

BCA hian MSL season 7 neih tawhah a hnuhnung season 4-ah champion trophy an hui vek. Champion-in a ken tel sum zawng zawng BCA charity fund lamah chhung lutin ṭanpui ngaite tan ngawi rengin bân an phar chhuak thin a - tun ṭum chu he an thil tih ṭha zet ṭhin hi ka'n phochhuak e, anni lam hian tarlan loh chu an duh viau ang!

BCA Team Bihchianna

Dawrpui vâl an head coach Afela hi tualchhung coach ṭha bik a nihzia leh star player rual paw'n an chung en, amah a invawn em avanga MSL coach zinga hlawhtling ber a nihna te kan sawi rualin, a kianga Zarkawt veng pa pahnih, Asst. Coach Tetea leh manager Lalsawma te nena an thawhhona leh team changtlung tak an din tlâng thei hi a rah a ṭha em a, hei an result-ah kan hmu zel e.

Coaching staff inthlak leh siksawi reng hian hlawhchhamna bak a hlawhchhuak ngai lo - chuti ang ep chiah chu he club-ah hian kan hmu. Mizoram basketball hi BCA-in a thunun zel dawn a nih chuan anni pathum thluak inbelhbawm hi an club hian a mamawh zel e.

Player lamah Fit 6'5 zeta sang, an captain Matthew Sailo hi season tin a che tha tawlh tawlh a - defensive player of the league tun ṭuma a hlawhchhuak ta lo kha a mak ti awm se, a awm viau! Tin, Lalrina Renthleiin defensive role khel a, fit 6'8 zeta sang TBL American player a hup bo thei leh Mizo player zinga basket ngah ber a la ni tel cheu thei kha mi bik te chauhin an tih theih a ni. An American player Allen-a tharum ngah zia te, Ramthar tlangval Zonuna game thunun hnehzia mawlh kha - ani hi BCA-in an chelh zui zel loh chuan langsar si lova an team innghahna hi an hre fuh lo ang a, an team in a tuar khawp ang. Tak a, Sangkima kha game 3 zana a chet dan enin mamawh chhanna rintlak player pawimawh a ni.

Heng kan sawi tak an first five phena NBA academy chhuak Hnehpuia thiamna leh theihna bakah Durtlang duo Mafela leh Faka te tangkai zia te, an theihna hre ran chungin Reuben-a, K-a leh Chhana hi team dang laka chhuah BCA hian an phalin an ngam ang em? Season thar ti nghahhlehawmtu a ni der e. He team ti ngaihnawm bertu chu club neitu lamin anmahni inthup thiam taka an biru a, mipuite tâna tan rawn awl thei ang bera an inphochhuak thiam hi a ni. Langsar tur zawk an thehchhuak thiam hian mipui ngainat an club hi a hlawh tir a ni.

Mizo In Kan Zo

Cricket chu vai vawm, basketball hi midum tih chi leh volleyball chu keini bawp tawi chawnpuar tih chi loh tia khawi lai kawn emaw vêla rak pung pung ṭhinte pawh an ngawi ngam ta - Mizo hian tih chi loh kan nei bik lo!

Khiti ang kan sawi mêk lai erawh khi chuan a nawlpui leh a tui nazawng tân bawrhluai avanga hlawkpui theih a ni lem lo! Huang hrang hrangah infiammi zingah rau rau pawh a ti thei fâl bik te chauhin hlawhtlinna an chang dâwn. "Ka tih ve chi a ni em?" tih hre thei tura mahni inhriat chian hi kawng hrang hrangah kan mawh a ni - mimal mawhphurhna a ni kan tihna. Hei erawh hre nawn fo ila - Mizo basketball player zin kawng in tanna chu lehkha zirlaite school leh college inelnaa player che ṭhate hi MSL team leh club hlawhtling ber ni mek - he BCA team pawh hian player a an thlan (select) thinna a ni. Lehkha zir chhunzawm zel chi zawngin he game hi a inher tlat a, chumi chu player naupang zawkin zawm ngei ngei a ngai.

Khai le, MSL season 8 hi BCA champion kawng dal zawngin club dang in thahrui an seng nasa zual sauh dâwn - a va nghahhlelhawm ta ve. Club pakhatin a zawna trophy vawi nga a chawi hi tu club mahin an phal dâwn lo - i lo thlir ang.

- Tpa Bunghai