Sorkar mualphona Zu bawk

Mizoram sorkar hmasa Congress kaih­hruai tluk chhiat chhan kha Zu kan puh lo thei lova, Congress khan corruption scandal lian tham pawh an nei lova, hmasawnna pawh an kal tir ṭha pangngai a, mahse Zu an zawrh avangin mipuiin an duh lo. A bikin Kohhranin an duh lo a, Congress chu mualphona langsar nei si lovin MLA 34 aṭangin mualpho takin MLA 5-ah an tla ta a ni. 

Mipuiin Congress zu zawrh an ngai thei lova, Kohhran mipuiin an duh loh avangin a thlakna an zawng ta a, chu chu ZMP lamin, "Keini hi kan ni e," tiin thiam takin an campaign a. Kohhran party anga inchhalin zei takin an campaign a, MLA pakhatmah nei lo, unit pawh nei lo khan MLA pariat an nei a ni. ZPM ṭhat leh ṭhat loh kan hre lova, Congress zu zawrh duh loh rah chhuah a ni. 

Mipui chuan 'sorkar thei' an zawng ta a, Unit lo nei tawh sa, party kumhlum leh sorkarna pawh lo chelh tawh MNF bawk an thlang tling leh ta. 

MNF hi mualpho taka kum 10 kal taa hnawl hnu tho kha ni mahse mipuiin Zu an duh loh vanga tling an ni. Nuai 3 an zawrh vang a ni bawk. 

MNF tlin chhan hi anmahni mipuiin an duh thar vang ni lovin Zu duh lohna kal zel bawk a ni. 

MNF chu an sorkar ta a. Zu duh lo party chu an han inleng ṭan ta a, 2018 December chawhnu lama lakluh kha Krismas dawnah te chuan Minister hovin Rangvamual leh mual lote tlawhin Zu tirem thei tur angin an han che vel a, tun thlengin Mizorama Zu chu sawi loh Rang­vamuala Zu pawh an tirem thei lo. 

Sorkar hi zu vangin a mualpho der a ni. Lockdown ni bawk, curfew ni bawk, Zu khap ni bawk chungin Zu hmun pui Rangva­mual (Aizawl daifema mi mai) pawh an veng zo lo. Sorkar muapho­na chu zu bawk a ni.