TEST TEST TEST!

WHO leh ram fing zawkten, hripui léng tihnêpna ṭha nia an sawi pathumte chu (1) Awm khawm loh (social distancing), (2) Invenhim leh invawn thianghlim leh, (3) Enfiah (test) uar a ni. 

Awm khawm loh(Social Distancing)

Lock down, quarantine, curfew, zirna leh inkhawm ṭhulh, ramri ven, dawr hawn tlem leh office inkal chhâwkte hi mipui awm khawm lohtir tumna (social distancing measures) vek a ni. Mipui hian theih tawp kan chhuah mek. Khung hran zinga miin thupek a bawhchhiat chuan, sorkar hian man (arrest) lovin, Rs 50,000 chawitir zel se, sum a tuak a ni mai. 

Invenhim lehinvawn thianghlim

PPE bakah, hmai tùam, kut sil, chil chhâk loh, taksa tihhrisel etc. lam pawh kan ti ṭha thawkhat e. 

Enfiah (test)

WHO-in an ngaih pawi­mawh ber ‘Test, Test, Test!’-ah hian kan che muang a, kan test tlem a, a pawizia kan hre mek. 

Mi ram angin test tam thei lo mah ila, lo lût tharte leh an kaihhnawihte tal hi chu khawl rintlak hmangin kan test thei ngei tur a ni. Test kan uar loh chuan, lock down, LTF leh mask vel ringawt hi chuan kan him zo dawn lovin a lang.

Khung mekte leh khung leh turte bakah, test tâk lohte leh, hmanraw rintlak loh hmanga kan test-te kha (a tam zawk address sorkarin a la nei), an kaihhnawih chhungkua leh official-te nen, sorkarin kovin test leh vek sela. Duh lo chu Rs 50,000 chawitir leh mai teh se.

Inkhung ngepawimawh in-test?

Rinhlelhte test uar si lova rinhlelhawm lo zawk mipui khàrkhip uar vak hi Mizoram economy hian a tlin rei dawn lo. Hri darh hun nghâka ina tawm ṭhup ai chuan, a tidarh theitute zawn chhuah vat hi a fing zawk. Pèt goal tum lova goal vèn ṭhup hi a fing lo.

Test uar loh chhan

Kan test tlèm avang hian hripui leh ṭampui mitthi kan hmabak thei tih hi kan ministry leh a hnuaia doctor leh officer-te hian, keini mipuite aiin an hre chiang zawk ang. Chuti chunga test uar aia inkharkhip an uar zawk a nih chuan, sorkar hian test-na hmanrua leh resource neih belhna turin sum a nei lo va, sorkar tan sawi a mawi si lo a ni ang tih hi mipuite hian hriatthiampui ila, dem lovin i khawngaih ngawt mai teh ang u. 

Eng nge kan tih theih?

Goal vèn tha thlah chuang lovin, pèt goal i tum ang u. Hripui dona tura sorkar sum tam zawk hi Test-na hmanraw ṭha leh resource neih belh nana hman i ui lo vang u. (Inkhung hranna sensote hi an chhungten tum tawh se) test 

ṭha lehzual tura sorkar nghah khawtlai vanga kan thih dawn ai chuan, khawtlang leh kohhran hian a leina turin sum kan tuak thei mai lo’ng maw?