SIPMIU hnathawh leh kan kawngpui

State Invesment Programme Ma­nagement & Imple­mentation Unit (SIPMIU) chuan central sum sengin Aizawl khawpuiah lian takin hma a la mek a, ek paihna tur pipe leh tui pipe phumin veng tinah vung an chhuah a, hna pawh an thawk chak fu mai, an zawh fel hun erawh a nghahhlelhawm hle.

Ka hriat thiam loh chu ek paihna tur pipe line an phum dan hi a ni. Chhung tin hian septic tank hmang tawh loin he pipe line-ah hian kan ek kan luan luh tir thei dawn em? kawngpuia pipe line-a kan ek luah luhtir turin pipe kan phum fur dawn a nih hmel a, mi huanah emaw, mi building karah emaw pipe kan kaltir fur mai dawn niin a lang a, hriatthiam a har dawn hle mai.

Tui pipe thar pawh an phum mek a, hei hian Aizawl khawpui tui inpekchhawnna turah nasa takin hma a sawn dawn tihna a ni a, a nghahhlelhawm viau bawk.

Pipe line thar hmanga PHE-in tui an pek chuan pipe chhiat vanga tui put bo a tlem dawn hle nia ngaih a ni a, tun aiin tui pawh hnianghnar zawkin kan dawn tawh ngei a beisei awm a, engtihlai pawhin pipe line-ah tui a awm tawh ang a, kan duh hun hunah kan herh haw thei tawh dawnin a lang. Tui herh haw tam leh hmang tam chuan an chawi hnem tawh mai dawn a nih hmel a, hei hi a nghahhlelhawm bawk.

SIPMIU hian con­tractor ruaiin pipe chi hnih phum hna an thawh mekah hian mipui tan har­satna a siam nasa a, mahse mipuiah SIPMIU bawk hian hriatthiamna a lo ngen sa a, hrehawm hle mahse kan hrethiam hram hram chu a nih hi. Amaherawhchu, an hak an zauh mah mah em aw tih theihin kawng an laih chhiat siam ṭha zung zung hman loin hma thar an lak san zel a, hei hian vah velna a ti harsa hle.

Kawngpui ṭhen­khat an laih chhiat chu pipe an phum hnu lawkah an timam a, an blacktop nghal a, kawngpui ṭhenkhat; a mi chengte tlema minister leh officer lian awm lem lohna erawh chu thla khat dawn dawn te, a aia reite an rial ṭhin. Hei hian kawng hmangtu mipui leh a veng neitute a tihrehawm bik em em a ni.

Chuvangin, hak zauh lutuk loin, an zawh tawkin kawng­pui lai chhe ṭhin se, siam ṭha leh zung zung phawt se a ṭha law'ng maw le. Rei tak tak kawngpui chhe lutuk neih hi a hrehawm em hi maw.

- Lalhmingliana