MIZOIN THIHNA CHI HRANG HRANG KAN NEIHTE

Mizoin thihna hming chi hrang hrang panga (5) kan nei a, Hlamzuih, Raicheh, Sarthi, Awmlai leh Za chham lak te hi an ni. Heng thihna hming koh chi hrang hrangte hi han sawi zau i la. 

Hlamzuih : Pian hlima thi nghal, sen laia thi, thla tling lo a thi tihna a ni. Nuin nau a neihin he thumal 'hlam' tih hi kan hmang lar viau mai a. Hlam tih hi 'chhul' tihna a ni tiin Zoṭawng dictionary siamtuten an hrilh fiah a. Nuin nau a hrin hnuah a chhuak ṭhin a, chu chu 'hlam tla' tih a ni. Hlam tih hi hmanna dang a awm a, 'hlui/ hmasa' tih tlukpui a ni. 'Hlam ha/ha hlam' ti tein kan hmang. Ha hlam hi naupang kum 6 bawr vel an tlinin a tla tlangpui a, ha thar a lo ṭo a, he ha thar hi a bal palh chuan (mi ṭhen khatah) a ṭo thar leh tawh ngai lo a ni. 

'Hlam tla' tih pawh hi nau neih thu-ah chauh ni lo, thlai leh thing rah a puitlin hmaa ṭil/ tla sawina atan kan hmang bawk. Nausen, a pian aṭanga ni sawmkua (90) a tlin hmaa a thih chuan hlamzuih a ngaih a ni a. Hei hi mitthi chungchanga YMA dan ding lai a ni. (Mizoram Presbyterian Kohhran chuan 2013 aṭangin hlamzuiha thite chu mitthi dang ang bawkin a vui a ni. 2013 Synod no.74) 

Raicheh : Nau hrin/ nau neih laia a hringtu nu a thihin raicheh tih a ni a. Raicheha thite hi tunlaiah chuan 'nau chunga thi' tiin kan sawi mai a, thil thuhmun a ni. Raicheh tih hi a chiang teh khawl em mai kan ti ni fa hmiang. Ṭawngkam mawi hawih zawk hman tum hram thin kan nih avangin kan tawngkauchheh ṭhen khat chu kan hmang hreh tlat ṭhin zu nia! 

Sarthi : Natna nei lo, dam ṭha pangngai ni si, tawhsual (accident) tawka thi sawina a ni a. ‘Sarah a thi’ emaw ‘sara thi’ tiin emaw kan sawi ṭhin bawk. Tui tla, khama tla, lum hlum, thing tla, thing delh, sakei seh, rul chuk, khuai seh, lirtheia chesual, mahni intihlum, mi kut tuar, hriamhrei hmanga thah, silai leh fei hmanga inral palh, kang hlum leh a dangte avanga thite hi sarthi thi tih a ni. 

Sarthi hi thi Mizoten kan ṭih hle a, ruang pawh kawngkapui aṭanga la lut loin kawmchar aṭangin an la lut ṭhin a, an lumen ngai lo a, khua tlai hle tawh mah se an phum nghal chuk chuk ṭhin. Sarthi te hi thlai an chhiah ngai lo a ni. Tunlaiah chuan mitthi pangngaite anga sawngbawl a ni tawh a, a lawmawm hle. 

Hmanlai ata tawh chawhnu thlang herah, khawthlang/tlak lam vanah sar a zam chuan 'thih sar a zam' kan ti a. Ngaihbel tur tingin sara thi an awm ṭhin. Tin, khaw ṭhat lai, khawdur emaw leh thli thaw tur inmung emaw awm loh laia thli thaw thut, thaw deuh vuk a awmin sarthli kan ti a. Sarthi an awm tur thu hrilh lawktu niin kan ngai bawk. 

Awmlai : Awmlai tih hi thihpui theih natna zawng zawng sawina a ni a. Natna chi hrang hrang avanga thite hi 'awmlaia thi' tih a ni. Awmlai thi, awmlaia thi tih hi mi ṭhen khatin 'tar thi' tihna em maw an ti a. Mizo zingah tar thi sawina a ngai nghet tlat tam tak kan awm tawh a, hei hi hriat fuh tawk loh vang a nih a rinawm. The Mizo Customary Law, Law & Judicial Department, Govt. of Mizoram siamah chuan Awmlai tih hi 'natna avanga thi' tiin tawi fel takin a hrilh fiah a. Anni bakah hla phuahtuten awmlai tih thumal an lo hman dan han bih thuak i la. 

"Hnam ka len nuam mang e, Hmuh theih chang se doral ang hian; Awmlai lianin hringnun par mawi, Vul lai a thliak mai ta si a," Laithangpuia. 

"Awmlai lengin tlang tin a fang, Vanduai keini kan run chhungah; Ka tuai duh chawnbanah a kai," Upa Thanherha. 

"Awmlai lung mawl, i hrang lua e! A riang kan tuarah hian; Ka tuai vul lai par ang a thliak," Hrangchhuana.

"Awmlai vei leh lusun fate chan tawk hi dawn ve teh, hnutiang mual liam hnu ngaiin an ṭap e," Rokunga.

Hnam ka len nuam mang e tih hla hi Pi Kutdengi tana a Pu Laithangpuia'n a phuah nia sawi a ni a, Pi Kutdengi'n pasal a sun hnuah a fapa Lalhleia a sun leh avanga a phuah a ni. (Laithangpuia 1885 - 1937 by KC Vanlalruata, phek 82-na) 

Thu leh hla lama kan mi hmasaten awmlai an hmanna hi en thuak pawha thil chiang tak chu awmlai tih hi tar thi sawina a ni lo tih hi a ni. 'Ka tuai vul lai thliaktu, tuai duh chawn-bana kaitu' chu awmlai a ni a. Upa Thanherha leh Hrangchhuana te thlawpin Pu Rokunga'n, "Awmlai vei leh lusun fate," tiin u-a-ma laia damlo te leh lusun fate lunglen khawhar tur zia a dawnpui thu a au chhuahpui a ni. 

Tichuan, awmlai chu vei theih chi natna, tlang hri leng, tuihri, santen, kawṭha­lo, ngawr, khawsikpui, sik­serh, cancer leh natna dang zawng zawng khaikhawmtu, khaikhawmna hming a ni a. Chu'ng natna chi hrang hrang avanga thite chu awmlaia thi tih a ni tih i hre thar leh teh ang u. 

Za chham lak : A chunga kan sawi tak thihnate ni lo, nat lawk nei lo, dam ṭha pangngai thi thut-te hi ‘Za chham lak’ tih a ni a. ‘Sanu lak’ tia sawi an awm bawk awm e. A ṭobul hi sawi dan chi hnih a awm a, hmanlai pi pute ngaih dan chuan khawvelah hian ni tinin mi za an piang a, mi za dang an thi ṭhin a, ni khata mitthi za an tlin loh chuan za tlinna'n, za an chhamna tlin turin dam ṭha pangngai an thi ṭhin niin an ngai. 

Sawi dan dang leh chu, Mitthi khaw kawtchhuah vengtu, Pawla'n a nupui Sanu hnenah mitthi khuaah ni tin mitthi thlarau za tal hruai turin a ti a. Sanu'n za a hmuh zawh dawn loh ni chuan hrisel ṭha pangngai tak leh nat lawk nei lem lote pawh kha an thlarau a hruai sak ṭhin a, chuvang chuan an thi ta thut ṭhin niin an ngai a, nat lawk nei lo a thi thutte hi, "Sanu lak an ti thin a ni," tiin an sawi bawk. 

Za chham lak tih leh Sanu lak tih hi thu hmun a ni a. Sawi tak angin natna/ dam lohna nei lo, sarthi ni bawk si lo thih thutna hi za chham lak/ Sanu lak tih a ni. Tunlaiah chuan za chham lak/ sanu lak tih hi kan hmang ta meuh lo a, thih chhan sawina, tarnaah pawh, "lungphuchawl, stroke leh a dangte" tiin hming dang kan hmang ta zawk a. A ral mai lohna turin ching thar leh thei i la a ṭha ngawt ang. 

Mitthi an awmin thih chhan ziahna bakah ṭawngkaa kan sawiin, Awmlaia thi te, za chham lak leh sarthi te pawh cancer, pneumonia, malaria, lungphu chawl, stroke, tui tla, accident etc. tiin kan sawi a, hei hi thih chhan hming ni loin an thihpui natna hming sawina zawk niin a lang. Thih chhan hi a chang chuan han thup deuh ngai a awm ṭhin a, thu thupna'n Mizoin thihna hming kan neihte hi a ṭha ngawt nia! 

Engtirna'n : 'Thih chhan : sarthi, awmlai, za chham lak, raicheh/ nau chunga thi' tia ziah hian mahni intihlum te, hepatitis, hiv leh lungphu chawl kan tihte a huam vek vang a ni.