I Day football lam hawi ang aw

Mizoram Football Association chuan ṭum danga a tih ṭhin ang thoin Inde­pendence Day Football Tournament a buatsaih leh dawn a, Ningani zan khan MFA facebook page lamah chuan fixtures hmuh turin a awm tawh nghe nghe.

Hetihlai hian district hmun hrang hrangah Inde­pen­dence Day pual football tournament kalpui a ni nual bawk a, a lawmawm takzet a ni.

Tualchhung foot­ball-a sum zawn a harsatzia te, tournament huai­hawt a hautak­zia te ngaihtuah chuan kan football hruai­tuten hetiang inelna an buatsaih chhunzawm zel thei hi a lawmawm a ni.

Tun hnaiah MFA buatsaih tho, LBS Suzuki All Mizoram Inter Village Football Tournament siam a lo ni tawh bawk a, team 200 chuang zetin football thiam nih an inel a nih kha.

Team tel an tam piah lamah, entu mipui lam pawhin kan hlut hle tih a lang a, chumi tilang chiangtu chu a bik takin semifinal leh final-a inkhel entu tamzia khan a tilang chiang a, Aizawl traffic chu a luhai thlak zawk hial a nih kha.

Awle, ka sawi tum tak chu hei hi a ni - football hmangin Mizo ṭhalai tam takin ei an zawng tawh a, Indian Super League-a khel pha chin ngat phei chuan kum khatah vaibelchhe khat chuang chuang hlawhin, ei an zawng tawh tih kan hria.

Heng zawng zawng a thlen theih chhan hi tualchhung football tuipui a, sum tlemtêa mah­ni inthap chunga football hmangaihtute vang a ni a, a bik takin sum tam tak senga Mizoram Premier League club chhem nung hram hram tute hian kan duhsak let an phu hle.

Inter Village tour­nament-ah khati zat mipui kan kalkhawm thei a nih chuan I Day football-ah pawh local football tan tiin, a hmunah ticket lei ngeiin inkhel en tum ila, kan tih theih ve chinah football ngainatute i ṭang tlang teh ang u.

European football kan hlut a, a ṭha em em tho mai a. Mahse, keimahni tualchhung football ber kan ngaihthah leh si chuan a ṭha lo maithei.

Covid-19 vangin MPL phei chu kum 2019 hnuah khelh a ni leh tawh lo a, tun season-ah a vawi khat nan khelh a ni leh dawn. Tuna kan ISL player tam tak hi MPL aṭanga inzir chhuak ve tho an ni tih te pawh hi theihnghilh lo ila.

Kan tih ve theih, a entu lama ṭan hreh loin, theihtawpin local football in chawi nung leh dawn leh ang u hmiang.

- Robin H. Lalmuanawma, Phd.