I luangliam zui zel ang u aw...

"Hnam ka len nuam mang e" ti a Mizo hla phuah thiam Pu Laithangpuian a lo phuah kha ka hre chhuak uai uai mai. Heta 'hnam' a tih hi tui put, tui hnam kan sawi a lam fan tur a ni a, Chem a sawina a ni. A fa thihna a tuar lutuk chuan thihna chu hmuh theih nise chema han sah sawk sawk mai a duh thu a sawina a ni tiin kan zir ṭhin kha a nia. 

Covid hrik te hi hmuh theih nise mei hmanga han hal ral vek mai te hi a chakawm. Mit lawngin kan hmu thei mai si lo a, kan nunphung a tibuai ta em em mai a nih hi. 

Mitin min hrut rual lai hian a tuarna zual tur chu rethei leh pachhia te bawk an ni leh dawn a, Mizo ṭawng upain 'meialh en' tia a lo sawi ṭhin ang deuhthaw a chhuanchham an awm thei. Chungho tana luang liama van malsawmna hmanrua ni tur chuan "hawh teh u, kan Mizo thinlunga midang hmui duhna/ ṭanpui ngai ṭanpui ṭul tihna kha a volume i herh ring leh teh ang u." 

Kan vengah,veng dangah, hla deuh zawkah ṭanpui mamawh ngawih ngawih an awm em tia zawng ruai ruaiin, kan rilru siam leh ila; he Covid hri chimawm tak vanga kan inkharkhipna hi a theiten kan ṭhatna lantirnan i hmang leh teh ang u hmiang. 

Mimal, pawl leh kohhran ang pawn kan puanin zauh zui zel ila, panic buying avanga lei tur lei khawma mi tam tak kan buai lai hian sum hum lo chhungkaw tan hawina khua a kaw lo, it loh bik vang ni lo a mamawh lam khawmna tur sum hum lote tana luangliam turin zo pa leh zonuten hmangaihna thinlung i chhem vam thar ang u. 

Hetiang ang hun hi a la liam ngei ang a, kan tuar chhuak em em ang. Chumi hunah chuan retheih lutuk vanga ei tur leh ṭul zual neih loh vanga mualliam an awm loh thu kan hriat theih nan mi thilphalte tan hun ṭha a inṭan ve chiah e. 

Ṭanpui ngai ṭanpui hi ro khawlkhawmna ṭha ber zinga mi a nih a rinawm; midang ṭanpui ngai ṭanpui ṭhin inchhir an awm ngai lo. Ṭanpui ngai kan ṭanpui a nih pawn kan ṭanpuite zahawmna zahsak kha kan ṭanpui belhchhah theihna hlu tak a ni tel tih hre bawk ila.