PMGSY KAWNG SIAMNA LEI BA CHUNGCHANG HI
PMGSY sum hmanga kawng siam hna a muan thu Mizoram hmun hrang hrang aṭangin min rawn hrilh hlawm a, hmasawnna hnathawh muang hian mipui harsatna a thlen nasat avangin PIL te pawh thehluh mai ṭha tihna ka nei hman a ni.
Thil a thlen hian a chhan leh avang a awm ṭhin a, a chhan pakhat nia MPWD Engineer-ten an sawi chu, PMGSY hnuaia contractor tam tak hi khawl pawh nei mang lo an ni a, hei hian hna a timuang hle niin an sawi. PMGSY contractor lam kan han be ve leh a, an bill sawrkar-in a bat nasat lutuk avanga hna an thawh hleih theih loh thu an lo sawi thung a ni. PWD Division hrang hrangah bill ba a awm leh awm loh RTI hmangin kan zawt ta a. A chhanna a darh nasat dawn lutuk avangin EnC MPWD lamah RTI hi a hlawmin ka thehlut leh ta a ni.
RTI hmanga chhanna kan dawn chu, Mizoram pumah PMGSY hnuaiah hna 91 thawh mek a ni a, bill ba hi nuai hlir singkhat leh sang li leh sawmruk pakua leh sing ruk sangnga (14869.65) contractor bill ba a awm mek a ni. Tunhnai khan vaibelchhe 72 bawr vel PMGSY contractor te bill tur a rawn thleng a, hetah hian state-in a thawh ve tur vaibelchhe 7 bawr vel a dah ve a la ngai bawk a ni.
Thudawn dan chuan state sum dinhmunin a zir rih loh avangin, contractor te hi an bill pek an ni lo. Hnathawk chak tura han nawr viau pawh a hun rih lo niin a lang ta a, sawrkar sum dinhmun enin sawrkar pawh pechhuak tura nawr vak a finthlak loh lutuk chuang ta lo a ni.
Amaherawhchu, pawisa rawn thleng hian contractor-te bill ba erawh a phuhruk zo lo hle hrim hrim niin a lang. A hmaa rawn thleng tawh pawhpen nia sawi ṭhin hi a lo dik tak tak zawk em ni? tih hi ngaihtuah tham tak a ni ta a ni.
Mizorama PMGSY hna hi 2018-2019 a mi deuh vek kha a ni tawh a, RTI chhanna a tarlan tel loh bill kal mek final la ni si leh ba anga tarlan theih loh nen chuan; PMGSY bill ba anga sawi theih chu vaibelchhe zahnih aiin a tlem lo niin Contractor te chuan an sawi. MPWD Engineer te pawhin bill kal mek chu bâ a la tling lo niin an sawi vek mai bawk a ni.
National Highway leh State Highway tlawh pawh loh khua te kawng tur hi sawrkar laipui lamin a ngaih pawimawh avangin, Prime Minister Programme Pradhan Mantri Gram Sadak Yojana (PMGSY) hi rawn piang a ni a. State-in thildanga a pawhpen mai mai hi Sawrkar laipuiin rem a ti lo a, file hi tang miah loa kal a kal tlangna hun ni 15 State sawrkar a pek zingah PMGSY fund pawh hi a tel ve a ni.
Tunah hian eng atana hman nge a nih tih hriat lutuk lem lohin CSS fund release vek tur zingah PMGSY fund chu release tel a ni lo a, state sawrkar sum dinhmun ngaihtuahin a hriatthiam theih viau. PMGSY contractor-te bill pawhpen nia an lai an bill hun rei tak a tan ṭhep ṭhuap lai, an JCB loan a an lak bill tang avanga pawisa an rulh theih loh lai, khawl hralh saka vau an nih mek lai hian, Meidum leh Hortoki kawng siamna atana Work Order crore 23 chuang tihchhuah a ni an ti!
Chief Minister motor thachhawng dal tur motor changkang nuai 30 man zet lei an ni ta luau mai te hi chu hriatthiam tel hram hram tum pawhin, a harsa ve deuh chu a nih hi maw!
- Zmp Tlau