Mizo mipui tham lotu politician

Tun hnaiah hian ruling party zingah Mizo mipui hi mimawl leh thil hre lo emaw tia statistics leh sum tam tak a awm thu sawia bum theiha min ngaitu pahnih pathum an la awm tlat mai a.

Hei hi MNF tan chuan tlak phahna tham a nih avangin mipui zah lo leh thu ngam lutuk politician pahnih pathum hi an thunun vat a nih loh chuan 2008-a MNF paihtu Mizo mipui bawk hian an paih leh ngei dawn niin a lang ta.

He Mizoramah hian mipui ngawi reng an hlauhawm tluk zetin social media lama mipui phun mur mur pawh hi a hlauhawm tho a ni tih hi ruling party hian an hriat a hun ta viau mai.

Hun kal tawh kha en ila. Congress hunlai khan hotu lamah khan mipui tham lotu politician an awm tih tlang hriat a ni a, NLUP-ah cheng 1,00,000 lai mai te an sem avang khan tling leh turah an in ngai a. An in ring tawk em em a, an duh duh min sawi khum a ni. Mahse inring tawk taka an awm lai khan cheng nuai an pek Mizo mipuite bawkin kan ngai thei lo leh tlat mai a, tlin leh inring em em chung khan an chesual ta tho a nih kha.

Mipuiin Rs 1,00,000 an dawn tawh hnu khan a petu lam kha an lo ngaizawng tel aw zawng lo tih a lang chiang viau mai a. Tichuan kum 2018 inthlanah chuan Congress chu chiang mangkhengin an tla ta dawp a nih kha. Ṭawng mawi lo ni lo se an tlinna bial 5 hi kan thlir chuan bial kilkhawr lam deuh vek a ni. Thil hrethiam phak chin chuan mipui tham lova ṭawng pung pung chu kan duh lo a ni.

MNF phei chuan Rs 1,00,000 pawh an sem lova, kan dil ni miah lovin Rs 3,00,000 min tiam hnuah tunah chuan Rs 25,000 sem chhuah pawh an harsat lam a ni ta. Heti chunga pawisa tamzia min sawi khum a, kan budget kal dana min bum an tum a, Mizo mipui min hnuai chhiaha mawl tak hmuha min hmutute hi MNF tlakna hmahruai a ni thei.

Mipui hian kum 2023 ah hian min tham lotu politician te paih nachang hi chu an hre leh mai ang.

- Lalremruata