A TÂWK TÊ-IN AW....

Persian thu leh hla thiam, sakhaw lama mi ril leh zirna lama mi chungnung tak pakhat, kum 1207, September ni 30-a Afghanistan ram Balkh khuaa piang, kum 1273, December ni 17-a Konya, Turkey rama thi ta, Jalal ad-Din Muhammad Rumi, khawvelin Rumi tia a hriat lar, mi ropui tak kha ṭum khat chu zawhna pakhat, 'Tûr (poison) hi eng nge ni?' tih an zawt a. Rumi chuan, 'Thil reng reng, a lutuk chin a thlen tawh chuan chu chu tûr (poison) chu a ni mai. 

Thuneihna leh thiltihtheihna, hau­sakna, mahni inkhaw­ngaihna, duhâmna, thatchhiatna, hma­ngaihna leh ropui ûmna te, huatna leh hlauhna thleng hian a lutuk a thlen tawh chinah chuan, chu chu tûr (poison) hlauhawm tak a ni mai,” tiin a chhang e, an ti. 

Dikna leh felnate hi thil ṭha leh hlu tak ni mah se mi dik lutuk, fel leh lutuk hi miin an ning vat ṭhin. Mi dik nih te, mi fel nih te hi a tawk mai - a lutuk a kâi chuan, tunlai ṭawng takin 'a over' a ni. Hmangaihnate hi hlu teh mahse a lutuk chin a thlen chuan mi dang mit tikhamtu a nih chang a tam ṭhin. 

Kan thuneihna leh thiltihtheihnate hi a hun takah, a ṭul dan angzia zela hman tur a nih laiin, ṭhenkhat chuan kan hmang ta lutuk ṭhin a, kan buai phah a, hmasawnna dâltu a ni fo bawk. 

Mi hausa te hi an awhawm a, an hausakna ang neih ve a chakawm chang a tam. Mahse, mi ṭhenkhat hausa ta lutuk hi chuan lawmpuitu aiin hawtu an ngah. Mi ṭhenkhat sum duh dan huam huam hi chu sim a 

ṭha khawp mai. 

Tunah hian hripui lêng vangin khawvel a buai a. Kan ram pawh min zuah ta lo a, theih tawpa ben per kan tum chungin kan hnenah a rawn cheng ve ta miau si! 

Ram hrang hranga awm mi leh sa an inko haw mek a, keini pawhin kan ko haw ve ta nual mai. Mahni ram ngeia tawrh chu a ziaawm ang a. Mahse, lo haw zinga ṭhenkhatte erawh chuan an duhthusam lo thil an hmuhin duh aiin demna thu an chhak chhuak rang mah mah a, ṭawngkam an duh tui lo deuh ṭhin hi a pawi ngawt mai. 

Social media hman dan pawh kan thiam a ngai. Nakinah kan tu leh fate thinlung khei ngat ngat thei khawpa tûr (poison) hlauhawmah kan chantir ang tih hi hlauhawm tak a ni. 

Mi dang zahpahna nei lêk loa social media a an han tâl âng mai ṭhin phei hi chu, chi loh tak a ni ringawt. Tunah pawh sapṭawng thu mal pakhat a rawn lar chhuah hluai hi! 

He hripui hun thim karah hian chiai lutuk lo i la. Mi thiamte leh kan roreltute thu zawm chung leh hlauh vanga phili chiam loin i awm ang u. 

Engkimah hian mi aia lutuk bik nih theihna lakah inveng ang u. A tâwktê zêlin aw...