RAMRI NGE RAM RI?

Tûn hnai chhoah hian thumal ziah zawm leh zawm loh chungchângah inhnialna a nasa a, dik ber, hre ber, thiam ber nih inchuhin kan inhriat rilsiak a ni ber mai e! Mizo ṭawng ziah dan chungchângah hian ngaih dân a inrual lo hle mai a, Mizo Language Committee-in 'Mizo ṭawng ziah dân' tih lehkhabu an chhuah hnu-ah pawh duh khawp lohna a nasa hle niin a lang. 

Grammar lamah kan mit a keu ṭan ve chauh a, Mizo ṭawng ziah dân hi grammar-in a thunun emaw kan ti chho ṭan nghal mai hi chu a zia lo deuh a ni. Eng pawh ni se, sawi zâu châkawm tak tak a awm rualin kan thupui lamah lut nghal zawk teh ang. 

'Ramri' tia ziah hi dik lo anga sawina social media lamah hmuh tûr a awm ta zeuh zeuh a, grammar dân aṭanga dik lo anga sawi ni deuh berin a lang. Mizo Language Committee lehkhabu 3rd Edition, phek 189-naa 'ziah zawm tûrte' tihah chuan ramri tiin an dah a, hei hi a dikin a rin tlak em em a ni. 

Mizo ṭawngah hian thumal pakhat aia tam inzawm khawm aṭanga thumal dang lo piang kan ngah em em a, chutiang chu compound word a ni. Hei hi grammar lamah 'chutiang chin chu compound word a ni thei, chutiang chin chu a ni thei lo' tih dân eng mah a awm hran lo. 

Ram (noun) hi thumal a ni a, ri (noun) pawh hi thumal a ni bawk a, chumi pahnih inzawm chuan noun thumal pakhat ramri a rawn siam a, chu chu compound word chu a ni. Hetianga noun pahnih inbelhbawmin noun thumal dang a siam hi a awm nual. Ziah zawm ngei ngei tûr emaw, ziah hran ngei ngei tûr emaw dân eng mah a awm lo.

Noun leh noun inbelhbawmin noun thumal dang a siamte -

Thosi + lèn = thosilèn

Kut + kawr = kutkawr

Khawnvar + tui = khawnvartui

Thìr + ban = thìrban

Van + ram = vanram

Tui + khur = tuikhur adt

Khitianga noun leh noun inbelhbawmin noum thumal dang a siam khi a awm ṭeuh a, ziah zawm tûr emaw, ziah zawm loh tûr emaw dân a awm hran lo a, kan ziah zawm emaw, ziah zawm lo emaw, grammar-ah chuan nihna fel tak an nei thei zel zawk a ni. Eng emaw va kawh bik a neih avanga ziah zawm tûr tih dân eng mah a awm hran lo a, ṭawng neitute'n kan ziah dân apiang kha grammar chuan eng huangah emaw a lo khung vek thei zawk. 

Chumi avanga duh dân dâna ziah tûr tihna a ni lo va, mi nawlpuiin kan hman dân te, kan lo hman ṭhan dan te kha a dik a ni mai a, chu chu grammar-ah a leng vek bawk. Ngaih dân hran neiha mahni ngaih dân sawi grammar vak hi a fuh lo ṭhin a ni. Grammar hian ṭawng leh thumal min pe lo va, kan ṭawng leh thumal mil hian grammar hi chu a lo insiam rem zel mai zawk tih kan hriat a ṭha. 

Ram leh a kawppui thumal aṭanga thumal dang lo piang hi i han thlir ho leh teh ang. 

Ram + huai = ramhuai

Ram + sa = ramsa

Ram + ar = ramar

Ram + ngaw = ramngaw, adt.

A chunga kan tàr lanah khian ram khi a kawppui noun thumal sawi fiahtu (noun adjunct) angin a rawn thawk zel a; mahse, a kawppui thumal nen khian thumal pakhat an siam a, chu chuan eng grammar mah a kalh lo. Chutiang chiah chuan ram leh ri inkawp hian ramri thumal a rawn siam a, hei pawh hian eng grammar mah a kalh lo ve. 

Tin, ṭawngkam ṭhenkhatah chuan ramri leh ri hi awmze thuhmun anga hman kan nei bawk a, chutiang a nih avang chuan ziah zawm hi a fuh zawk em em a ni. Ramah kher ni lo, hmun dangah pawh ri a awm thei a, chu chu ramri tiin kan sawi thei vek tho. 

'Hei hi ka ram chin a nih hi' tiha ram pawh hi lo ni ta teh reng se, chu a ram chin chuan ramri(ri) a la nei thei cheu a, "Ka ram chinah ramri(ri) hungna ka siam dawn" tiin kan la sawi thei fàn. 

Eng pawh ni se, grammar aṭanga han sawi vak theih a ni lo a, a chhan chu grammar hian thumal min siamsak tlat lo a ni. 

Kan thumalte hi grammar chuan nihna fel tak a lo pe mai zawk a, ramri tih pawh hi 'noun' tiin fel takin grammar-ah nihna a nei leh mai a, ziah hran emaw, ziah zawm emaw lam kha eng mah min phut lo; kan ziah dan kha eng huangah emaw a lo khung zel mai zawk a ni. 

Chuvangin, MLC-in ramri tia an lo ziah hi a dik lohna pakhat mah a awm lo va, thin thi dapin ramri tiin kan hmang zel thei ang.