Kan official-te an fakawm e

Zan khat riakin Union De­fence Minister pahnih mai bakah NE state Chief Minister leh official ṭhahnem takin Aizawl an rawn chim huk a, Mizoram sorkarin a lo mikhual dan kha a lungawithlak thawkhat hle a, official-te an fakawm hle mai.

Zankhat chauh riak tura lokal mah nise, an rawn thawk rip hle a, a lo buaipuitu tan pawh luhai ram ramna tham a ni. Chief Secretary hoin Civil Service te, Police Service te leh official dangte inpekna kha a ropui khawp mai.

Kan Union Minister pahnih leh official-te chu June 12 khan Delhi aṭangin an lo thlawk a, Lengpui Airport-ah mi pawimawh ṭhahnem takin an lo hmuak a. Lengpui aṭangin Ṭhuampui Helipad-ah Copter-in an rawn thlawk chho a, chuta ṭang chuan by road-a Raj Bhawan kal tur an ni. Mahse khami ni leh a tuk kha Mizorama khaw chhiat ber ṭum ni awm takin chhum leh ruahpui vanawn nen a khuh ta si a, Copter tan chet ngaihna a awm ta lo.

Kei pawhin Ṭhuampui Heli­pad-ah camera nen ka lo va chang ve a, hetah hian Chief Secretary Pu Lalmalsawma, DGP Pu Thianghlima, DIG Pu Joseph Lalchhuana, Aizawl SP Pu Lalhuliana Fanai bakah Sipai lal pui puite nen kan lo hmuak a. Khuain a zir tak loh avangin Ṭhuampui aṭanga Lengpuia zu phurtu tur Helicoper chu a che eih ngam ta si lo.

Hetah tak hian ruahmanna a ṭha ngawt mai. Khuain a zir loh thulha Lengpui Aiport aṭanga by-road a kan khualliante dawnsawn dan tur ruahman lawk angin tluang takin khaw chhe em em karah Aizawl an lo lut thei tho a ni. Khatiang khaw chin hriat loh, khual ṭhate tluang taka an lo thleng thei kha a lawmawm zual hle.

Chief Minister hoa meeting an neih te khan rah ṭha chhuah mawlh se a duhawm. A tuk June 13 ah Parva emaw, Champhai emaw Coper-a tlawh tur an ni a, khua bawkin a zir loh avang khan tlawh kual ta lo chuan an haw ta a ni.

Sawi tawh angin kan official-te chet ṭhatzia kha fakawm hle in ka hria. Khatiang khaw chhe hnuaia Police emaw, Civil Service an ni emaw an duty tlin taka an hlenchhuak kha a ropui a ni. Khaw ṭha tak hnuaiah pawh lokal se buai map mapna tham khuallian an lokal kha a ni a, khua a chhe si, traffic tawt tak karah harsatna awm loa lo mikhual kha a mawi ka ti.

Traffic SP-in a hmain mipui hnenah ngenna siamin, harsatna an tawk palh a nih pawha hrethiam tura a ngenna pawh lirthei khalhtute'n hrethiam taka kawng an lo kian dial dialte kha Mizo nih a mawi mang e.

Engpawh nise Mizoram sorkara lu ber Chief Secretary hoa ruahmanna tluang taka an kalpui kha a lawmawm hle. Police lam lah an hah, venhimna lamah harsatna a awm lo niin a lang. Traffic Police ho mawlh kha an che ṭha. Khaw chhe hnuaia kan Police unit hrang hrangte an fakawm.

Khatiang kha a nih chuan kan sorkar official leh force ho khan eng khuallian pawh thleng leh dawn i la a zanawn lo a, Mizoram hian tih theih loh kan nei lo tih a chiang reng mai.

- Lal Rinmawia