AMC STICKER CHUNGCHANG

Vanglaini chan­chinbua 13.6.17 a lo chhuak Aizawl Municipal Corpo­ration Secretary-in hriattirna a siam kha ka lo chhiar a. A thuchhuah kha han chhiar mai pawhin AMC official sticker siam hmang sual an awm ṭhin niin a lang nghal mai a, chung hmang sual ṭhinte chu anmahni AMC mi leh sate bakah an ṭhian, AMC a thawk­te zara AMC official sticker lo nei ve ta maite pawh an ni thei awm e.

Secretary thu­chhuah aṭanga a lan danin AMC official sticker hmang sual­tute hian an hman sual dan ber chu parking fee an awl phah ṭhin niawm tak a ni a, AMC sticker hi parking fee khawntute lakah free ticket ang deuhin an leklam ṭhin tihna a nih chu. He thil hi thil zahthlak tak, Secretary-in ti tawh lo tura hriattirna a chhuah phah hialna tlak a ni tihna a ni a, AMC official sticker hi a hmang lo tur chuan an lirtheiah te lo tar ve ngawt tawh lo se a ṭha ngawt ang.

Chutihlaiin hemi letling chiah hian thil thleng a awm ve thung niawm tak a ni. AMC property liau liau AMC mor­tor ṭhenkhat chu a kawltuin mimal thil­ah hman a duh avangin mimal motor anga a lan theih nan chung motor-a AMC official sticker-te chu a pawh thlak tir hlauh thung niin an sawi. He thil hi khawhar in velah te pawh kan hotuten fiamthu titaka an sawi rik sep sepna a rei tawh a, AMC a thawk ṭhen­khat phei chu an nuih a za ru hle niin sawi a ni. Heng motor zinga ṭhenkhat phei hi chu sorkar driver aiin hotunu pasalin a khalh tam zawk ang te an ti mai mai.

Mi ṭhenkhatin parking fee awl duh vangin AMC motor ni miah loah dan lo anga AMC official sticker an lo bel ve rikngawt laiin hotu ṭhenkhat thung chuan mimal hlawkna leh hamṭhatna atana hman an duh avangin mimal motor anga lantir tumin AMC motor ṭhenkhata AMC official sticker inbel ṭha hle hle lai an lo pawtthla ve thung niawm tak a ni a, khawvel hi chu a inkawlkalh ṭhin mang e!

A dik loh dan leh a zahthlak dan thua nep bik awm lem lo, inkhap chuang bik tur awm lo, zawlbuk a e tang ve ve an ni tihna ni a, Zawngrengtea serthlum vengte pawh an ang dawn dawn mai a, a vengtu pawh ven tel a ṭul tihna a ni mai em le?

- Robert Lalliana Fachhai, Chanmari West