HERO OF MY LIFE
A lo vahnaah a biang chu mau lian ṭha zet mai hian a rawn chhun tlang zawt mai a, a mit a khap sawk a. A na thawkhat tih chu zawh kher a ngai lo. Mahse, a tawrhna chu kan chhungkaw tan a ni. "A na lo e, lehlam hian chaw chu ka ṭhial mai dawn alawm," a ti mai a; a fapa chuan eng ang pawhin chik mah ila, na hmel zu han pu ngai hlek lo a!
Kan la naupang chumchiap zual hle. Ṭhenawmpa chemte aiin a chemte chu a lian a, motor chu a khalh thiam vek a, thlawhna pawh a nei chu awm se a khalh thiam nghal dawn thu a sawite khan ka ngaisang zual a, ṭhiante pa ai khan ka ‘hero’ a ni zual hliah hliah ṭhin. Mahse, ka rilrua tuh a lo tum kha mi hnuaia kun nghal ngawt lova, mahnia ding thei tura chona min hmachhawntir kha a ni si.
School min kaitir a, ka mamawh ka sawi chu a theih ang anga min tihsak hram a tum ṭhin a, engmah kha hrethiam rual ka la ni si lo. Kutziak mawi tak nei turin min fuih ṭhin a, ṭap pur chungin ka thiam theih loh thu ka sawi ṭhin a. Mahse, kutziak mawi tak chu a lo zahawm bikzia hi, tun thleng pawh hian.
Hmun hranah ka awm a, min ngai mah se a tilang duh ngai lova. Ka haw chang apiangin kuthnathawh ngaisang turin min fuih a, min fehpui a, huanah ka tih theih tawk ti turin min kalpui ṭhin. Peih lo zet chunga ka zui chhuah chang pawhin hlim takin min hawpui leh thei ṭhin.
A kim lo, a ṭhen pawh ka hre thei lo a ni ber mai. Mahse, kuminah June ni 18 hi Father's day a ni an ti a, kan ṭhianpa pakhatin min rawn hrilh ve nawlh a. Heng zawng zawngah hian ka ‘Hero of my life’ chu ‘ka pa’ ngei chu a ni tih ka hre zual a. Ka tan chuan a hmelṭhatna a la chuai lova, a vun te chu a zur ṭan an ti a, mah se ka pawm ve lo. A vun chu a la nel thap reng a, hmana min hmangaihna ang khan min la hmangaih reng tih ka hria. Khawvelah hian piang nawn leh thei ngai pawh ni ila ka hmangaih leh fan ang a, ka pa ni turin ka la thlang nawn leh ngei bawk ang.
Pa te hi zawng an lo ropui a ni e. Hei vang hi a ni ang, ram tam takin an ram chu motherland tia an sawi lai a, kan ngaihsan leh min duhsaktu ṭhin Germany erawhin an ram an sawi dawn apianga zah taka Fatherland tia an sawi bik tlat ṭhin hi ni. In chhung luma kan in thlamuanna ber pawh pa te hi an ni si a.
- Lalvansanga Pautu