TUNGE KAN MP (RS) TUR?

June 19, 2020 maiah khian Mizoram aṭanga Rajya Sabha member thlan tur a ni a, mi pathumin nomination an file tawh - MNF aṭangin K. Vanlalvena, INC aṭangin Dr. Lallianchhunga leh ZPM aṭangin B. Lalchhanzova te an ni. Anni pathumte hian nomination file fel tawhin Returning Officer pawhin a lo pawm vek a, vote thlak chiah kan hmabak ta. 

Member of Parliament hi Rajya Sabha-ah member 250 awmin chung zinga member 12 chu India President-in a ruat ṭhin a, member dang 238 te chu state leh UT-a MLA ten an thlang ṭhin. Mizoram tana Rajya Sabha member pakhat kan neih ṭhin pawh hi state MLA te’n an thlan ṭhin avangin vawiinia kan MP thlan chhuah tur pawh hi MLA 40 kan neih te thlan chhuah tur a ni. June 19 a MP kan thlan chhuah tur pawh hi mipui aiawha MLA kan thlan chhuahte thlan tur a nih avangin MLA election anga mipuiah campaign vak ngai lo tur a ni a, mipui lam tibuai lutuk loa thlan theih tur a ni. 

MLA 40 aṭanga thlan tur a nih chuan tu party-in nge MLA ngah ber tih chu zawhna awm hmasa ber a ni. Sorkarna siamtu MNF te hian member 40 ah MLA 27 an nei a, Congress-in member 5 neiin ZPM in member 7 an nei a, BJP in member 1 an nei bawk a ni. Heti chuan MNF Party Official candidate K. Vanlalvena chu tling thei mai tura ngaih sa a ni. Ṭhenkhat chuan MNF MLA aṭang hian party dang candidate vote te hi a ruka vote duh an awm mai te ring an awm a, chu bakah Congress party leh ZPM MLA te hian lungrualin MNF candidate hi an beih rawn duh mai ang em te an ti bawk. Congress leh ZPM te hi a rukin lo thawkin lo lungrual ta pawh nisela MLA 12 (7 + 5) chauh an neih avangin MNF official candidate hi an khin thlak phak hmel chuang lo. 

BJP lahin member pakhat chuah an neih avangin an thawm a ring teh chiamin a rinawm si lo a, khawi lam hawi zawng pawhin thle mah sela awmzia a awm tam kher lo maithei bawk. 

Mizo National Front (MNF) Party aṭanga MLA 27 te hi an pawimawh ta hle mai a, tunhma deuh aṭanga titi vela Pu Zoramthanga side leh Dr. R. Lalthangliana side tia sawi neuh neuh awm hi tak tak niin Dr. Thangtea side te hian 27 aṭang hian a ruka pengin candidate dangte hi an vote duh kher ang em? Vote duh ta pawh nisela eng zat nge uire duh ang? An ngam tak tak ang em? tih zawhna khirh tak tak a awm phah lo thei lo a. 

Ka mimal ngaihdanah chuan tumah hi an pengin candidate dangte hi vote duhin ṭha ti hle pawh nisela an vote duh kherin ka ring lo a, an ngam ka ring hek lo. A chhan point lian tak pakhat awm thei chu ‘MLA fang an awm lo’ hi a ni. 

Hetiang hian han sawi zau ila. Tun MNF sorkarah hian MLA 27 lai awmin Council of Minister-ah mi 6 an awm a, Minister of State-ah mi 6 bawk awmin Speaker pakhat bak MLA 10 te leh MLA hlui 4 te chu Board Chairman-ah an awm vek bawk. Protocol thilah Minister of State rank an ni bawk. 

GAD-in Notification a tihchhuaha kan hmuh danin SEDP Board Chairman te chuan Minister an nih anga an hlawh bak hlawh dang an nei dawn lo a, Minister ni lo Vice Chairman te erawh chuan thla tinin Rs. 40,000 an hlawh thung dawn a ni. Anni bakah hian Speaker leh Dy. Speaker pakhat ve ve awmin MLA pakhat chu Deputy Chief whip a ni bawk a, MLA pakhat chu Youth Commission Chairman a niin MLA pakhat leh chu Lunglei District High Power Committee Vice Chairman a ni bawk. Heti hian MNF Party-in MLA an neih 27 zingah tumah MLA fang an awm lo tihna a ni. 

Hei vang hian tunge sorkarna siam lo lam lehnghal chu vote pe duh ang? Kan hriat ṭheuh angin MLA nih ringawt pawh hi hamṭhatna tam tak a awm a, opposition MLA nih aiin rulling MLA nih chu hamṭhatna a la awm zawk zel lehnghal. Tuna kan rulling MLA zingah tumah MLA fang an awm tak lohah phei chuan vote uire tir duh an awm a rinawm lo a, an peng duh lo ang tih hi ka beng tih tluka chiang ang a ni. 

Chhan dang pawh ala awm thei ngei bawk ang a, heng vang hian tuna MLA kan nei 40 te zing aṭang Rajya Sabha Member of Parliament kan neih tur pawh hi mimal ang zawnga a thluk theih vak hmel loin mipui zinga duh leh duh loh lo sawi vakin awmzia a awm loh hmel. 

Mizoram politics thlirin central politics lamin kan Mizoram politics-ah bu a rawn khuar ngheh hmel bawk si avangin tuna MP kan thlan turah ngei pawh hian MNF Official candidate hi a tlin hmel nghal mai bawk. Hei hi a taka sawi chian fak a har maithei nain CAB (CAA) chungchangah ngei pawh khan ngaihtuah peih te chuan kan hrethiam ngeiin a rinawm. Kan CM ber ṭawngkam tam tak aṭang te pawhin kan hrethiamin a rinawm. ZPM leh Congress party aṭanga MP atana candidate te ngei tan pawh hian tlin a huphurhawm thei nghal a ni. 

Chuvangin, kan duh emaw duh lo emaw K. Vanlalvena hi Rajya Sabha member thar atan campaign hah ngai loa tling tura ngaih mai hi a hahdam thlak hmel. Nimahsela, heti chung hian kan MP thar hian Parliament House chhunga a chet dan a zirin mipuiin ngaihdan kan lo nei leh ngei ang a. Central-a sorkarna siamtu BJP leh a thurualpuite thlekna lam lama a thlek ve mai mai chuan Mizo kristian te thinlungah a boruak a sang lua lo maithei bawk e.