Zet u Zu bawk aw...

Tunlai lockdown laia thil lar em em mai chu 'Amawii' tih a ni. Social media lamah Amawii tih an sawi sup sup pawh khan keini ang rual chuan kan lo hrethiam ve leh lawk lova, a hre chiangte lah chuan tunlai ṭawng lerh (slang) ang maiin an lo hmang tawh a. Amawii chu Zet U Zu sawina a ni. 

Kan naupan deuh lai kha chuan 'Biaksailovi' kha kan hre ṭhin a, 'K Chuang Biaksailovi' kha zu sawina a ni a, tunlai zu khap burna hnuaia zu hming thar chu Amawii a ni thung. 

He hming lo chhuah dan an sawi hi Amawii package drinking water neituten khawngaihin min lo hrethiam se, a sawi hnawm zawnga ziah pawh ka tum lova, Amawii chu tui in chi package drinking water a ni a. Aizawl daia Rangvamual leh a chhehvelah hian zu pack na tur sahar (sarang) a van tak vang pawh a ni mai thei a, ṭhenkhat chuan Excise leh Police bumna angin an sawi bawk a, Amawii tui dahna bur ruakah local zu an thun ṭhin a, check-tute pawhin an kal tlang tir zung zung ṭhin an tia.

Chu Amawii a ni emaw, zu a ni emaw, local a ni emaw, pehṭeh pawh ni rawh se, a hming hrang hrang pawh chu lo vuah ta tehreng ila, zu khap bur tura intiam sorkar hian he ṭawngkam thar lo chhuak khawpa zu zalenna ramah Mizoram chu a chhuah ta mek a ni. Tute nge phalna neia awmze neia zu zawrh duh lova kan titawp nghal vek dawn ti tute kha le? 

Dan anga zu ṭha zawk zawrh titawptu chuan dan lova zu chhe tak zawrh hi a titawp thei lo em ni? He sorkar hian zu hi politics khelhna atan chauh em ni a hman duh? A ngaimawh a nih chuan Mizoramah hian zu zuar in sang tam an awm miah lo ang, a ti tawp thei lo em ni le?

Zu zawrh kha ka support hran lova, mahse zu chhiah kha a uiawm ka ti thar ta em a ni. Zu chhiah uiawm ka tih chhan chu Covid-19 a lo thlen chuan sorkar hnathawk hlawh kan ba ṭhen dawn tih kan Chief Minister meuhvin a sawi a, pawisa kan nei lova ni. Zu zawrh hrim hrim aiin a chhiah kha ka duh a, a chhan ka sawifiah dawn a ni. 

Zu hi awm ta miah lo se, zu chhiah hi ka it miah lovang, mahse chhiah chhung lut miah lovin zu hi a tam em em tho si. Zu quality chhe em em, kan ṭhalaite thih hma phahna tur khawpa chhia chu in lo thei lovin an in luai luai a, mahse sorkar chuan Re 1 pawh zu chhiah a dawng si lo. 

Dan bawhchhetu zu zuar ngam an hausa thur thur mai. Hei hi a ni politics khelhna atan zu an hmang em ni ka tih chhan chu, in hriatthiam ve ka ring. He thil hi zu issue ang ni lovin, economics lam leh sociology lam aṭanga thlir zawngin Mizo mipui hian i debate ang u.