ENGATINGE LALPA TIIN KA ZAWT VE TA HIAL A

Pathianni tuk (7.6.20) a lo inherchhuak a, ka biakhlatna chu ka han en chuan Mizoramin Covid-19 natna vei kan neih belh thu leh mi 33 lai natna vei mek kan neih thu ka han chhiar a. A hma aṭanga Bible thute nen hmehbel theih awma kan neih te ka ngaihtuah a, tun ṭumah zawng Isua kum nia an sawi, 33 nen chuan hmeh belin, he hun khirh kan tawh chhoh mek lakah hian beiseina thar min han pe leh a. Pathian hnenah chuan 'Lalpa, ka lawm e' tih ringawt chuan ka ṭawngṭai a; hei hi Trinity Thianghlim Pathianni a lo ni a.

Khawvelin a buaipui mek Coronavirus chuan Khawvela cheng ve tho kan nih angin Mizoram pawh hun rei tak inralrinna hun kan neih hnu chuan min luhchilh chho ve ṭan ta le! Ram ṭhenkhatin a vanglai an pelh chhoh mek laiin India ramah chuan a ni telin kan pung chho zel a, kan Zoramah ngei pawh positive kan neih belh ta zut mai le!

Ram changkang zawk leh ropui zawka kan ngaihte chu he virus hian rûn chho zelin, thil tithei zawk nia kan ngaihte pawn buai namen lovin an buaipui ta! India ram pawn buaipui chho vein lockdown pawh ni 80 dawn kan kalpui ta a. Mizoramin positive kan neih hmasak ber ṭumin mipui kan chiai-in inkharkhip kan kalpui a, kan fîr hle a nih kha.

Kan ram, Mizoram ah meuh he natna hi a lo luh takah chuan hmachhawn dan kan thiam a ngai lehzualin, ruahmanna ṭha leh mipuite kan pawimawh zual a, kan medical lamte pawhin cho rual loh ral hmachhawn turin ke an pen a ṭul ta a nih si hi le. Kan vannei em em nia lang chu positive hmuhchhuah hmasa, Pastor Hruaia aṭang khan zir tur tam tak kan nei a. Kan rin Pathian tak pawh kan tan a ṭhat zia leh inbuatsaih chhoh dan hi min zirtir­in hun ṭha min pe tam tawk ni hian ka ngai ve tlat a nih chu. He virus enkawl hautak zia leh khirh zia a takin kan hria a, invenna kawngah pawh kan phak tawk inenkawlna kan neih - inkarhlata awm, pawn chhuah tam loh leh kut silfai uar tih te hi a mawl ber pawn kan hre bel hlei hlui tawh a. Tin, he natna hi thihpui tam viau tawh mah se, damchhuak leh an tam zawk thu leh ṭhalai leh taksa lama harsatna nei sa lo tan phei chuan dampui lehna hun ṭha an ngah tih pawh kan hre ṭheuh tawh awm e.

Kan ram dinhmun thlirin ram hausa kan ni lo a, Mizoram phei chu kan dinhmun a hniam hle tih a chiang a. Chuvangin kan phak tawk te tein nundan phung her rem a ngai chho a. Chumi hre ran chuan kan ram hruaitute pawhin dan an siam a, chutiang tur chuan mipuite pawn ke kan pen thiam a ngai tak zet a, Sorkar thu­chhuak pawh ngaipawimawha kan tih tur dik tak hi ti ngei ngei ila. Hun khirh kan tawn mek hi kan chhungkua ṭheuhah inhrilh tawn a, kan hmachhawn theih dan tur hi mimal tin kan pawimawh a ni tih hi i inhrilh hre nawn fo teh ang u khai.

Heti chunga Pathian zah­ngaihna leh khawngaihna kan la chang hi ti hian ka ngaihtuah ta a. Sap hla pakhat 'Why me Lord' thu kha ngaihtuah chhuakin eng ngati nge Lalpa hetiang dinhmun min thlentir tih hi ka zawhna a lo ni ve ta chiah pek a nih chu. Kan theih chin a tlem zia Lalpa'n min hriatpui a, kan beiseina leh in­nghahna awm­chhun chu tia Amah kan kohna aw chu lo ngaithlain, A hmangaihna avang chauh chuan kan tan a zahngaihna a lantir a. He natna hi a enkawlna tur vaccine la hmuchhuak chiah lo mah se, damna a awm a ni tih kan hriat theih nan leh chu damna kan chan theih nan chuan harsatna hripui karah hian kawng dik kan zawh ve tur min ruatsak a. Chu kan mawhphurhna chu Lalpa chuan kan kutah a dah ta a ni tih hi ka ring nghet tlat a. Chu hun ṭha chu bawhpelha a awm loh nan leh kan mamawh chhanna neitu Lal Isua chu kan hnaih zual zel a, a ṭanpuina dil chung leh kawng dik zawh tura ke kan pen chhuah a ngai a. Kan thlarau a boral mai loh nan Amahah kan inkawltir a, a puihna kan dil fo hi a pawimawh hle a ni.

"Lord help me Jesus,

I've wasted it so,

Help me Jesus I know what I am.

Now that I know that I've need you so,

Help me Jesus,

My soul's in your hand."