EL BETHEL HARHNA chungchanga thusawi ṭhenkhat

1. “Bethel Camp-ah hian Chief Minister-te, Minister dangte, Director-te Sawrkar Officer liante Sawrkar hnathawk chi hrang hrangte Pastor-te, Upate, Contractor-te, Sumdawngte, Kohhran hnathawktute, zirlai chi hrang hrangte, inhlawhfate, zu leh drugs ngawl veite, mi ler leh awm duh dahhote thlengin a bawhin an bawh huai huai a ni ber mai.” 

- ATC Faculty Team

2. 'Chu banpharna chu Kraws banpharna khenbehna ai chuan a la zang zawk fe si a,’ tiin ‘Thiamthu sawi thei lo tih pawlna aṭang khan, banphar tawh tura Lalpa aw mawi tak hriain, zahthlak hle mah se langin banphar zui ve zel tawh tura inhriatna tunah hian ka lo nei thar ve ta a ni, Lalpa chu fakin awm rawh se.

- Rev Rualkhuma, PCI

3. “I hming hi ka Tirhkoh Lalkherha sak a nih kha, Vanlalfaka I ni lawm ni? Tiin mi rawn chhang a, Pathian fak leh chawimawi chu ka hmingphuah chhan a lo ni a, chu ang ngeia awm tur ka nih chu a fiah ta em em mai a ni”

- Rev Vanlalfaka,

Ex Moderator,

Mizoram Synod

4. “Pastor meuhin hnukulh 

ṭeuh maia lawmthu an sawi ta mai chuan mite thinlungah thu a sawi nasa hle.”

- K Hawla Sailo, Falkland

5. “Kohhran tana ngaihnawm tur lam aiin hlawkpuina tur tak zawkin mipui tam ber leh Kohhran Hruaitu tam berin an hmu a, rawngbawltute an tîmna tur khawp aia an rawngbawlna thil ṭha lote han tarlang duh an awm lo niin a lang.”

- ATC Faculty Team

6. “Tlang pahnih, ‘Fa nihna tlang’ leh ‘Bawih nihna tlang’ tih thu a sawi aṭang chuan Pathian fa nihna ka hre chiang a, mahse Pathian bawih ka ni tel a ni tih ka lo hre ngai lo a ni tih Lalpa'n mi hriattir ta a ni, a va ropui em! Lalpa chu fakin awm rawh se! Chuta aṭang chuan tling lo tak chunga a rawngbawl hi ka tum zui ta zel a ni.”

- Upa Sanglianthanga, Tlangnuam

7. “He harhna lo thleng sulhnu hi kan Presbyterian Kohhranah phei chuan hmuh tur leh hriat reng tur a tam khawp mai.”

- Dr H L Malsawma

8. “Evan K Lalhmingliana hi Pathian pasalṭha mi hmantlak leh ṭangkai a ni. Hetiang hi Mizo fate zingah kan nei hi a hlu hle a ni. Amah kan zingah awm tawh lo mah se, a rawngbawlna hlu tak hi Pathianin a la hmang zel ang tih ka ring.’

- Rev Mangchhuana Sailo,

Ex Moderator, Mizoram Synod

9. “El Bethel Harhna khan mi lian leh mi tê, hausa leh rethei, mi fing leh mi mawl, rawngbawltu leh rawngbawltu ni lo a hrut chhuak vek a. Thlei bik nei miah lovin kan changho a ni. Khati khawpa Zoram dung leh vang fan chhuaktu Harhna kha ropui ka ti tak zet a ni. El Bethel Harhna khan Zoram tan rah duhawm tak a chhuah a ni.”

- Rev Lianhmingthanga Sailo

E/S Senior Mizoram Synod.

10. “Kum 1989-1990 bawr velah El Bethel Harhnain khaw ṭhenkhat a hrut a, a hlimte chu an hlim hle a, Mizoram pum a tuam chhuak lem lo.”

- Rev C Vanlalhruaia,

Ex Moderator,

Mizoram Synod.

11. “El Bethel Camping-a ka kal ve kha ka nunkawng leh eizawnna kawng  inṭanna bul a lo ni reng a ni. El Bethel rawngbawlna hi ka tan chuan Pathian nen kan inlaichinna bul ṭanna a ni a, he rawngbawlna hi awm lo se chuan vawiina malsawmna ka dawn zo zai leh dinhmunte hi ka dawng pha lo ang.”

- Dr Vanlalsiama Chhangte,

Managing Director,

Ebenezer Medical Centre.

12. “El Bethel Harhna kha hlu ka tiin ngaihawm ka ti khawp mai a, Zoram mipui min nghawng dante kha ka ngaihtuah kir leh hian a huapzo ka ti hle mai, mi tin, mi lian leh mi tê, sawrkar officer lian ber ber leh kan politician langsarho zawng zawng te, Kohhran rawngbawltu zawng zawngte thlengin El Bethel tem ve miah lo nih kha chu kan ngaih a ngam zan lo deuh chu a nih kha maw le!”

- Upa C Hmingthanga,

Mission Vengthlang.

13. “El Bethel rawngbawlna, an method dangdai tak hi Kohhran mi chi hrang hrang leh Kohhrana awm ve lote thlengin an lawm em em mai a, Speaker Evan KL Hmingliana thusawi leh a Bethel method-te hi sawisel ahnekin an ngaina em em mai a, Thlarau lamah kan hlawkpui a, thawhlawm lamah kan pun phah thur thur ṭheuh bawk a. Chuvang chuan he Harhna hi Mizoram Harhna ropui ber huapzau leh fan chhuak thui ber leh daih rei ber leh rawngbawltu nghet chherchhuak nasa ber tih loh theih a ni lo ve.”

- Rev Darchungnunga, PCI.

14. Ngawlveihoah suffer/chiri  thawm a awm lo! Pathian Thlarau hnathawh thlengin camp-na hmun leh a chhehvel chu Thlarauvin a luah ni berin a lang.  Pathian thu lo thusawi tur dang an hre miah lo a ni ang tih loh theih lohvin Pathian thu sawiho chu an hlimpui ber a ni ringawt mai."

- Rev C Laltanliana

15. Mi tam tak chuan Mizoram Kohhran chanchinah hetiang renga mi thinlung kaiharhtu hi a la awm lo niin an hria.

- ATC Faculty

16. El Bethel Harhna hnathawh chu mite'n Pathian thilpek an uar phah a, Rinna Thlaichi a lo chhuak a, ṭawngṭai beihpui an nei a, Kohhran inkhawm an pung bawk a ni.

- Rev Dr R Thanmawia, BCM

17. Pu KL Hmingliana hi Pathian pasalṭha, mi hmantlak leh ṭangkai tak a ni. Hetiang mi, Mizo fate zinga kan nei hi a hlu a ni. Amah kan zingah awm tawh lo mah se, a rawngbawlna hlu tak hi Pathianin a la hmang zel ang tih ka ring. 

- Rev Mangchhuana Sailo

Ex Moderator

18. Amah ka ngaihsanna em em chu, Pathian chhiahhlawh nih tlin a dilna ber mai kha a ni. Speaker dangte aia ka ngaihsanna ber chu Pathian zia inngaihtlawmna nun chhang let ve lo, thiamthu reng reng sawi ve duhna nei lo va, a nihna kha a ni.

- Rev Lalsangbera

19. El Bethel Evangelical Team rawng­bawlna kha Pastor leh Upate rawng­bawlna aiin a hlu a… An rawngbawlna khan rahchhuah siamin thawhlawm a tipung a, Chhungkaw tluchhe tawh tam takte'n Kristian Chhungkua an din thar leh a, Kohhran hrang hrangten a rawngbawlna an chhim a, mi za zela 91chuan a rawngbawlna an tuipui.

- Rev Lalchawimawia ATC

20. Zah leh mualpho huamin Chanchinṭha a tlangaupui tak zet a, Mizo Kohhran hian amah leh a rawngbawlna hi a theihnghilh ngai tawh lovang.  Khawvel hi a pangngaiin a kal zel a nih chuan amah leh a rawngbawlna chanchin hian kan Pathian thuzirhote hi Doctorate degree a hlan fo dawn a ni.

- Rev Lalpiangthara

21. A rawngbawlna kawnga a innghahna zozai kha a ropuizia leh a hlutzia zawk lam kha sawi thiam seng ila a va duhawm dawn em ve le! Lal Isuan a pa hnenah a in tur no la kiang turin a dil a, Pu Hminga pawhin a dil ve ṭhin a ni. Nimahsela, Lalremruat in tur no a la a ni, tih kha a dinna khar nan a lo hmang diam tawh a nih chu.

Lalpa rawng hi bawl zui zel thei se ka duhsak ngawih ngawih a, keiniho rawngbawlna aiin an rawngbawlna hi Lalpa tan a hlawkthlak hlein ka hria a, Ngawlveite mipat hmeichhiat kawnga chak lote tlu leh hnungtawlh leh piangthar lote ni mai lovin, rawngbawltute pastor te, upa te, sande sikul zirtirtu te leh Missionary leh Evagelist-te ngei pawhin an rawngbawlna kawngah hian, zirtur kan ngah lutuk tlat. Chuvangin, Lalpa rawng hi bawl zui zel thei se ka ti ngawih ngawih a ni.

- Rev Dr Rochunga Pudaite, USA

22. Pa Hminga hi a la thi lo a ni, a rawngbawlna zawng zawngte kha mi thinlungah a la nun reng avangin Pa Hminga hi a la nung reng a ni

- Rev H Lengluta, BCM

23. Rawngbawltute reng reng tan pawh chapter (Bung) a rawn hawng a, rawngbawltute hian kâwmkár leh daiahte rawngbawlna puan in kan zauh a ṭul zia mi kawhhmuh hle a ni

- Rev Lalzuithanga

24. Pathian aw hi hriat leh ka dil ber a ni a, ‘Thiamthu sawi thei lo’ tih chu ka thinlungah a rawn ri tlut tlut mai a, chu chu damchhung daih a ni ang… Thiamthu sawi thei lo tih pawlna aṭang khan bán phar tawh tura Lalpa pawlna aw mawi ka hria a, zahthlak mah se langin banphar zui ve zel tawh tura inhriatna tunah hian ka lo nei ve leh thar ta a ni. Min pawlna hrim hrim kha ka lawmna dam chhung daih tur a ni.

- Rev Rualkhuma

25. “Ka Bethel-naah chuan, ‘Thuhnuairawlh leh rilrua inngaitlawm tak ka ni’ tih hlir mai hi lo langin ‘Ani'n min pui ang’ tih ringin chu rawngbawl hna mawhphurhna rit tak thawk zel thei turin a hnenah ka inkawltir thar ta a ni.”

- Rev S Lalmuana

26. “Evangelist-te hi Pathian hmanlai an awm a, El Bethel hi a hman lai mek niin ka hria. Aizawl khawpui hi ka bial aṭangin Beram pa ki nen kan ham chim dawn!”

- Rev C Laltanliana

27. “Aizawl khawpui hi Bofor Laipuiin kan kap ang a, a chim duai duai mai dawn a ni.”

- Rev Darchungnunga

28. “Mizoram chhunga rawng­bawltu kan neih zingah rawng­bawlna hnuhma famkim taka ziaka hnutchhiah leh rawngbawlna chanchin chhui theih tura sulhnu nei ṭha awmchhun chu Pu K Lalhming­liana hi a ni mai awm e.”