Zawl thupuan leh thim thuah hnih

Mihring rilru zir mi ropui tak, Carl Jung chuan rilru natna nei mi chi hrang hrang a zir chian hnuah, mihring hian hriatna inṭawm kan nei niin a hria a, chu chu a hmingah collective unconscious a vuah.

Chutiang ema ropui chu ni lo mah se, mihring khaw khat, hmun khata cheng hian hriatna inṭawm kan neiin ka hre ve ṭhin a. Kum eng emaw zat liam ta aṭang khan, kan Aizawl khawpui hi him tawk lova hriatna kan lo nei tawh ṭhin a, ṭhianzaho zingah phei chuan titinaah kan sawi fo tawh ṭhin a ni. Zawl thupuana hmuhovin an sawi hmain kan sawi daih tawh tihna a nih chu.

Hawi velin, kan khawpuiah hian planning a fel lo tih a lang a, tui paihna a mumal lo va, chin tawk awm lovin concrete in a bawk fer fur mai bawk si a. Kan lei a nghet bawk si lo va. Chuvangin, awlsam takin harsatna kan la tawk thei a ni tih kan hre mai. Kan khawpui hi a mawi tawh lo va, rilru a tihah a ni.

Mihenkhatin mumang lamah an lo hmu a nih pawhin a mak lo ve. Hman ni lawka Sapho lo kal ka lenpui ṭum pawhin, Sappa pakhat chu a nui huk a, "Lir a nghin loh nan in ṭawngṭai nasa hle dawn a ni maw!" a ti hlawl mai.

Tun hnaiah mi ṭhenkhatin khua rel chhiatna thleng chu zawl thupuan nen hmeh belin, chhiatna rapthlak thleng tur nen an sawi zawm a. Kan in sak dan kan thlak loh chuan chhiatna a thleng ang tih hre turin zawl thupuan hmuh a ngai lo. Mi nawlpui rilruah a chiang sa vek.

Ni chhuah dawn­ah ar a khuang a, ni hi ar khuan vanga chhuak a ni e ti ila a dik hauh lo vang. Thil inzawm lo tur suih zawm hi mihring kal sualna bul a ni.

Mizoram hian minpui kum te pawh a lo pal tlang tawh a; hman deuh lawkah chhim lamah phei chuan nasa takin lei a min a nih kha. Khua rel chhiatna a ni. Tunah a thleng ang a, nakinah pawh a la thleng fo vang.

- Zoramsanga