June 11.6.2020 DATA LEH A BEHBAWM

DIPR chuan June 12, 7:00am khan June 11 chhunga Covid-19 detected case an puangzar leh a. Hetiangin: 

"Dt.11.6.2020 sample test zat -176; positive hmuh chhuah thar- 2 (Mipa 1 leh Hmeichhia 1); kum- 23 & 22; District- Aizawl & Siaha. Tun hnaia state pawn aṭanga lo haw, quarantine facility a awm ve ve an ni" tiin. 

June 11 bikah positive rate hi a tlahniam leh a, 2.6% vel chiah a ni. Chutih rualin DIPR thupuan leh Mizoram Covid Dashboard @ https://mcovid19.mizoram.gov.in/ hi a kal rual hlei thei lo niin a la lang cheu! June 10 zinga an update hma khan test zah kha 2747 niin isolate zah kha 191 a ni. June 11 zing an update hma (June 10 an update hnuah pawh) khan test zah leh isolate zat hi a la ngai reng! He thu hi ka ziak nghe nghe. 

June 12 kha chuan test zah leh isolate zat pawh a che ve ta a, a lawmawm. June 12 an update hmain test zat hi 3152 ah lo kai tawhin isolate zat hi 205 a lo kai ve ta! Mahse, update hnua danglam chu case zah leh Hospitalized zah chiah a ni! DIPR-in an update rualin dashboard nen ka en kawp a, dashboard-ah update a luh meuh chuan 10mins vel a ral hman. Hriat thiam har leh pakhat chu update a luh hian case detetect zat leh Hospital a dah luh zat chiah a che!

Dashboard hrim hrim hian mipui rilru a tibuai viau thei bawk. Quarantine facility leh Home Quarantine-ah an inzah thuak a, Home Quarantine-ah hian Qua­rantine facility aṭanga chhuak Home quarantine te kha an chhiar tel zel ti dawn ila data hi a che khat mai bawk si a. Sawifiahna dah tel zeuh theih ni ta se a duhawm. Heti zah hi Home Quarantine kan neih a la rinawm chiah bawk si lo... Nge heti zah hi mahni in lamah kan lo nawr liam tawh zawk!? 

Test zah hi swab sample lak rualin, result update hmain a in update zel a nih hmel a, a fuh chiah loh hmel. Swab lak khan test a la ni lo a, test tura process mek chauh a la ni. Eng emaw avangin swab sample an lak kha laktlak lohin paih ngai ta se, test zat kha paih leh hnuhnawh a ngai tel dawn tlat. Chuvangin test, cases, hospitalized & isolated te hi result update rual khan che rual ta chauh se data a chiri lo zawk ang. 

Sample an lak dan te pawh hi hriat châkawm tak chu a ni.. Symptoms nei leh vulnerable deuh hlek hi an ti hmasa em tih te, random-in an la pawp pawp nge a chhuak hnai tur apiang an la zawk? Symptoms nei leh vulnerable bik khi an la hmasa zel a nih chuan positivity rate hi a hniam zel thei a. A indawtin an la chho tawp a nih chuan positivity rate hi sang chho hret dawnin a lang thung. A chhan chu Quarantine facility-ah kai thar an awm thei tlat a, an lo in kai chhawng thei miau si a. A hmaa sawi anga risk sang zawk a lang an test hmasak chuan positive apiang lak hran niin in kai darh theihna chance kha a pawt hniam zel lo thei lo. Home quarantine leh Quarantine facility data hi an inzat deuh reng a, khawi aṭangin nge an test tam tawh zawk a, an detect tam zawk tih pawh hi a pawimawhin a rinawm. 

Tuna dashboard-in data a tarlan hi a dik a nih chuan (test zat hi a chunga sawi ang khian a in update nge la update hmaih ka chiang lo tlat a) Mizoram Covid-19 Positive rate pawh 3.3% velah a tlahniam leh ta hret a. Hei ngawt pawh hi lawmawm. Tuna rate anga a kal zel chuan Quarantine facility & Home quarantine tawh zawng zawng te test chhuah an nih hunah mi 508 dang hmuchhuak leh tur ang kan ni vel mek dawn tihna a ni a. Chuti a nih chuan tuna hmuh chhuah tawh nen case 612 lai nei thei dinhmunah kan ding tihna a ni. 

Quarantine facility a awm mek te hi a tlangpuiin a huhova an riah a ngai deuh zel a. Home quarantine te lah social media lamah an lo fimkhur tawk loh thu leh guideline an zawm ṭhat loh thawm a ri nawk reng bawk a. Hei tak hi fimkhur kan ngaihna tur chiah chu a ni. "Khung hranin an awm a, hlauhthawn tur a awm lo e" kan tih mek lai hian quarantine a awm mek te hi Quarantine facility a ni emaw Home a ni emaw pawh ni se, in kai chhawng palh lo tura fimkhur a nih si loh chuan hotspot-ah a chang daih thei. Kai an tam nafam chuan control zawh loh hun a thleng thei dawn tih a chiang reng mai si a. 

Quarantine facility hlimthla leh video social media a kan hmuh te en hian thla a muang lova, an fimkhur tawk lo ni pawhin a lang. Sorkar lam pawh hian monitor se a duhawm mang e aw... Entirna atan mask vuah miah lovin: 

- Ṭhenkhatah an lo zaiho dual dual a. 

- Ṭhenkhatah an lo ṭawngṭaiho a

- Ṭhenkhatah card an lo deng ho a

- Ṭhenkhat an hmai an lo incheisak

   suau suau a. 

A zawng zawng kan sawi kim seng lo ang, hei chin ngawt pawh hian risk a siam belh theih dan a chiang reng a. A huhovin kan awm a, 'physical distancing a theih tak tak loh...' tih vanga inthlahdah ngawt ai chuan a theihna lai apianga fimkhur khan risk a siam tlem dawn hrim hrim kan ngaihtuah tel a ngaiin a lang. Loh theih lohna vanga inhnaih taka awm a ngaih chang a awm a nih pawhin a theih chinah chuan mahni inveng tura close contact nei lo tura an lo inven ve hram hram a ngai a ni. 

Chuti a nih loh a, tuna kalphung hi thlak a nih si loh chuan RT-PCR negative tawh te pawh facility chhung aṭangin an lo positive palh leh theihna chance a awm dawn a ni. Chuti a nih phei chuan testing atana sum hman kha a lo thlawnin a lungral tihna a ni ang. 

Mi hi, kan hmelhriat an nih avangin Covid-19 lakah an fihlim ngawt lova, risk exposure an neih leh neih loh a zir zawk a ni. Tu lakah pawh kan fimkhur phawt tur a ni. 

Nang chu lo fimkhur la, lo him la, lo hlim ang che.