HRIPUI LENG KARA NUNNA DUHAWM HLANTU - H. LALVENMAWII

H. Lalvenmawii, ka uizia leh a chhungte ka tawrhpui takzet a ni tih lantir nan he thuziak hi ka hlan e. 

Hmeichhe awmnem tih hriat sa fahran ni si hi, a va awmnem lo tak em! 

Kum 18 mi lek ni a, June 9, 2020 (Thawhlehni) chawnhu dar 1:00pm boral ta,  ram leh hnam chhana a inpekna hian mi naran hi mi ropuiah a siam a. Amah siamtu Pathian, a nu leh pa unaute a va chawimawi em - Maveni hian. 

Kan tunlai khawvel awngrawp tak tawhah hian, mahni inphata ralna hmun a ni tih hriain amah a pen chhuak a, hlim takin Mizoram tan a duty a, phut let a nei ve lo! 

Ni sa, ruah sur leh thosi karah mahni in lum pawh luah hleithei lovin a tih theih tawka sang ber a lantir a, a ram leh hnam hi a va chawimawi em.

Mipa kan ni a, he kan nau, kan farnu ni bawk hi; kan tluk lo leh phawt mai. A tlawmngaihna, a huaisenna leh a rinawmnate hi ka va awt em. 

A duty laiin a damlo a, theihtawp chhuahin a in ti pachangin ka ring a. A duty na hmunah hian signature hlu tak a hnutchhiah ta a ni. Ka tluk ngai dawn lo a ni.

Hripui hlauhawm leng vel kara mahni nun thapa ral ngam tlemte zinga mi, Lai nu chhul chhuak hi fahrin manhla a va ni em! Zo hnahthlak kan unaute zawng zawng tana a hnarkaitu i ni a, 'kan dam leh tlang khatah kan thih leh ruam khatah' tihna nun nena i zinkawng i khar hi a va mawi em. 

I chûn leh zuate an hrilhhai turzia ka hria. Ni khua a lo rei ang a, hun leh ni a liam ang a, chutih hunah pawh chuan, i chhungkua, i û leh nau te, ram tana i thawhpuite hi Riakmaw iang âr ang an vaih khua a sei dawn mang e. 

Fam dairìal chang a, i liam ta mai hi kan la tiam lul lo, dârtui luan (hmelṭha) hi dâr ang tawng leh turin khawvelah i awm tawh ngai dawn si lo; i pamhmai em atin ni.

Fam khaw changa i han thi/ boral vang vang mai tur hi chu a va pamhmai em. Fam-rolung mualah hal loten suihlung rualin, Vangpui thla leh Sikni a lo ên changin i hmangaih Mizoram hi i rawn hre ve reng dawn nia. 

Kan thinlungah rial ang ralin mual i liam tawh dawn si lo. Van kawtthler mawi aṭangin, he hringlam khawvel hi lo thlir ve fo la, rauthla lêng vangkhua pela rauthla-te siang lawina rûn i belh hi, kan phal nem maw; Lunglohtui dãwnin hawilopar i thliah hma loh zawng - Hringlam khuavêl hi lo hawi fo ṭhin rawh aw....

Rial ang i dai zo ta, hahdamin leiah chawlh nuam le. I sulihnu chauh hi i hmangaih i ram leh hnamin an hriatreng tur chu a lo ni ta. Hriatrengna ṭha leh duhawm lo ni zel rawh se.